Malakai 1
1
Gotiʼa Isaleli vayaʼaifeʼmo hau ayamopafiʼmo hauʼniya gemae
1 #
Ham 1:1
Ala kava neʼmoʼa Malakaifeʼmo ha paiʼnigeno alininuno Isaleli vayaʼaifeʼmo hapa paiʼniye. 2#Loa 7:6-8; Lo 9:10-13Ala kava neʼmoʼa hunoʼaeʼmo, Lapakaefeʼmo nahau nayamopafiʼmo nahauʼniye, huno huʼnigeʼapaeʼmo, Lagaefeʼmo kahau kayamopafi kahauʼnisiyaʼmoʼmo haiya agufa alagepa kavaʼmo lagaetega nehane, huʼa ge huʼa afi geʼnagenoʼaeʼmo, Isoʼa Yekopu nepuʼamoʼmo maiʼnigeʼana konagalaʼmo maiʼnaʼaʼmonanafa Yekopufenagi aginago vayaʼaifenagi huno nahau nayamopafiʼmo nahauʼniyaʼmonanafa 3#Iyi 25:13-14Isofenagi aginago vayaʼmo Itomi vayaʼaifenagi huno oʼnahauʼniye. Oʼnahauʼnigeʼna aveleʼmo maiʼnaya mopamo aliʼna hosu huʼna ataleʼnogeʼa afela kalamo eʼa maiʼnae. 4#Aiy 9:9-10Itomi nofi vayaʼmogimo huʼapaeʼmo, Lagaemo maiʼnona kotegamo no atufaʼageʼmo haneʼniyanageta halate aita atagineta eta noʼmo kigune, huʼa huʼnayaʼmonanafa Ala kava neʼmoʼnamo huʼnaeʼmo, Apakaemo noʼmo afaʼa kigayaʼmonanafa nagaemo halate heʼna halagape vaiʼna atalegauve, huʼna huʼnove. Vayaʼmogimo ani kofeʼmo huʼapaeʼmo, hosu vayaʼmogi kone, huʼa huʼnae. Ala kava neʼmoʼa ani vayaʼaifeʼmo muki afinaʼae afinaʼaeʼmo aipamo leno neʼapateya vayane, huʼa hugae. 5#Sam 35:26-27Lapakaemo Isaleli vayaʼmogitapamo agetetapaeʼmo, Ala kava neʼmoʼa Isaleli vayaʼmo maiʼnaya mopamo malaga haneʼniya mopaleʼmo maiʼnaya vayaʼmogi ala agiʼamo neʼamiye, hutapa hugae.
Ala kava neʼmoʼa mono huʼa neʼapataya vayaʼaifeʼmo ge hapauʼniya gemae
6 #
Hat 20:12; 1 Ti 6:12; Aiy 64:8 Ala kava neʼmo muki vayaʼaiteʼmo yagaino neʼapateya vekamoʼmo hunoʼaeʼmo, Mafaʼne anagaʼmogimo afoʼapimogi ala apakiʼapimo neʼapamiye. Aliʼyaʼmo neʼaliya vayaʼmogimo aliʼyaʼmo afoʼamo geʼamo neʼafiye. Nagaemo Afotapimoʼnamo maiʼnovana na kava higetapaeʼmo ala nagiʼnimo noʼnamiye. Yagaiʼna nelapatova vekamo maiʼnovana na kava higetapaeʼmo koliʼnimo osutapa naiyafiʼmo noʼmaiye. Nagaemo mani gemo mono hutapa neʼapataya vayaʼmogitapamo nagiʼnieʼmo lapavenatuʼnaʼmo hetapa atalegekana kavaʼmo nehaya vayaʼmogitapaeʼmo lapa nepauvaʼmonanafa lapakaemo hutapaeʼmo, haiya kava huta kagikaeʼmo lavenatuʼnaʼmo heta atalegekana kavaʼmo nehune, hutapa nehae.
7 #
Mon 21:6
Ala kava neʼmo muki vayaʼaiteʼmo yagaino neʼapateya vekamoʼmo hunoʼaeʼmo, Lapakaemo nagae hiʼyalamuteʼmo hosu ofalinimo huʼnae, huʼna lapa paiʼnogetapaeʼmo, haiya kava huta kagikaleʼmo alita afepi nekatone, hutapa huʼnageʼnaeʼmo, Lapakaemo Ala kava neʼmo hiʼyalamufeʼmo lapavenatuʼnaʼmo hetapa atalegekana kavaʼmo nehaya kavatetiʼmo nagiʼnileʼmo alitapa afepi neʼnatae. 8#Mon 22:19-25Lapakaemo apaulagamo ali huʼniya afumo ofalini namiya kavaʼmo hosu kavaʼmo osuʼnafiye. Apaiyamo hosuʼniya afumo ofalini namige kaita hapauʼniya afumo ofalini namige huʼnaya kavaʼmo hosu kavaʼmo osuʼnafiye. Lapakaemo yagaino nelapateya gamani vekatapimo ani agufa afumo amiyo. Amisagenoʼaeʼmo amuse huno lapategaifiye. Amisageno alitenoʼaeʼmo lapakaetegamo alagepa kavaʼmo hugifiye, huno lapa paiʼniye. 9#Yol 1:13-14Malakaiʼa hunoʼaeʼmo, Mono hutapa nelataya vayane, huno, Gotiʼa fikumo laha maeno lamisiyafeʼmo nunumuʼmo hutapa lateyo, huno hapa paiʼniye, Ala kava neʼmoʼa hunoʼaeʼmo, Lapakaemo ani hosu kavaʼmo nehayanageʼna nunumuʼmo nehaya gemo afiteʼna lapa maesufiye. 10#Aiy 1:11-13; Mka 3:11Nagae hiʼyalamuteʼmo afa ofalinimo okaesiyafeʼmo lapakaepatiʼmo ina laʼmo mono nopiʼmo kita kigiye. Ala kava neʼmo muki vayaʼaiteʼmo yagaiʼna neʼapatova vekamoʼnamo huʼnaeʼmo, Lapao ke nosove, huʼna nehuve. Lapakae lapayapatiʼmo ofalini namisageʼnaeʼmo oʼaliguve. 11#Aiy 59:19; Sam 141:2; Lo 15:9Yu nofi vayapatiʼmo oʼmaiʼnaya vayaʼmo yegemo haine neʼeya kotega maiʼnaya vayanagi yegemo uno lamino nefaleya kotega maiʼnaya vayanagi muki haopalegamo maiʼnaya vayanagi huʼa ala nagiʼnimo namigae. Nagiʼnilefeʼmo muki haopalegatiʼmo alagepa atu neʼaiya laʼnefamo kaeteʼa kanale ofalinimo afaʼa namigae. Ala kava neʼmo muki vayaʼaiteʼmo yagaiʼna neʼapatova vekamoʼnamo huʼnaeʼmo, Muki ma mopafi nofi vayaʼmogimo ala nagiʼnimo namiteʼa nagiʼnileʼmo afaʼa aliʼa asaga huʼa nategae, huʼna nehuve.
12 #
Mal 1:6; Iyi 36:21-23 Ala kava neʼmoʼnamo huʼnaeʼmo, Nagiʼnileʼmo afaʼa aliʼa asaga huʼa nategayaʼmonanafa lapakaemo alitapa afepi neʼnatae. Lapakaemo hutapaeʼmo, Ala kava neʼmo ofalini hiʼyalamuʼmo alagi hosuʼniya yane. Ani hiʼyalamuteʼmo ofalinimo nehaya yafeʼmo lavenatuʼnaʼmo heta atalegekana huta ataleʼnone, hutapa nehaya kavatetiʼmo nagiʼnileʼmo alitapa afepi neʼnatae. 13#1 Sam 2:29; Mka 6:3Lapakaemo mago hosu kavatapimo haneʼniyana, Ani mono kavafeʼmo alagaʼmo lahae, hutetapa hosu lapaugosamo kaliʼnae. Lapakaemo kumaya apavaleʼnaya afu ofalinigi apaiyamo hosuʼniya afu ofalinigi kaita hapauʼniya afu ofalinigi hutapa avalelitetapa namiʼnae. Ani agufa hosu ofalinimo aligufiye. 14#Ap 5:1-10; Le 15:4Ala kava neʼmoʼnamo huʼnaeʼmo, Nagaemo ala kini vekamo maiʼnovaʼmofeʼmo humi natesiyafeʼmo hisiya vekamoʼmo ve sipisipiʼamo avaleteno nagaetegamo alagepa kavaʼmo hisiyafeʼmo, ani kavaʼmo huguve, huno agoʼyamo ataleteno mago hosu afumo ofalini namisigeʼnaeʼmo lokiya lifanamo huʼna atesugeno alagepa huno oʼmaigiye, huno hapa paiʼniye.
Currently Selected:
Malakai 1: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
