Yoni 21

Yesuʼa geʼamo neʼafiya vayaʼmo seveniʼa vayaʼaitegamo afole aiʼniya gemae

1Henagaʼamo geʼamo neʼafiya vayaʼmo mago ani kotuʼmo agiʼamo Taipiliyasi ani kotu agiʼnaleʼmo maiʼnageno Yesuʼa halate afole aiʼniye. Ina kavaʼmo huno apakaetegamo afole aiʼniye. 2#Yo 1:45-51; 20:24Saimoni Pitaʼagi Tomasifeʼmo lagoʼya mafaʼae, huʼa agi neʼaya vekagi Natanieloʼa Kena taonimo Galeliya kotega vekagi Sepeti mafaʼnelanagi magoʼe lole vekalaʼmo geʼamo neʼafiʼa vekalanagi huʼa magokepi lokaeʼa maiʼnae. 3Saimoni Pitaʼa muki vayaʼaifeʼmo hunoʼaeʼmo, uʼna umenimo maleʼneʼna noyamemo aligesuve, huno hapa paiʼnigeʼapaeʼmo, mukiʼamo magokepi lokaeta ugune, huʼa ha paiteʼa sipifiʼmo uʼa haiʼa maiteʼa uʼnayana muki haniʼilagamo noyamemo oʼaliʼnae. 4Yegemo haineʼnigenoʼaeʼmo Yesuʼa ani agiʼnaleʼmo he tino maiʼnigeʼapaeʼmo Yesuʼa maiʼniye, huʼa oʼageʼnae. 5#Yo 20:14; Lu 24:41Yesuʼa hunoʼaeʼmo, neya ve anagane, huno, mago noyame aliʼnafiye, huno apafi geʼnigeʼapaeʼmo, haʼao, oʼaliʼnone, huʼa ha paiʼnagenoʼaeʼmo, 6#Lu 5:4-7umenimo alita sipimo lamaga haopaleʼmo yaga auta maleyo, huno, noyamemo aligayanagi, huno hapa paiʼnigeʼa umenimo aliʼa yaga auʼa maleʼnageno asole noyamemo eʼa haiʼeʼa havai teʼnageʼa heʼa halauʼnayana lusi kava huno kana huʼnigeʼa heʼa ohalauʼnae. 7#Yo 13:23; Mt 14:29Yesuʼa agaefeʼmo hauʼniya vekamo geʼamo neʼafiya vekamoʼa Pitafeʼmo hunoʼaeʼmo, ani vekamo Ala kava neʼmae, huno ha paiʼnigeno Pitaʼa ani gemo afitenoʼaeʼmo aliʼyaʼmo alisiyafeʼmo kukenaʼamo asagino maleʼniyatetiʼmo alino vaiteno anipiʼmo asagauno aiʼniye. 8Sipimo afagiʼaleʼmo oʼmaleʼnafa ani agiʼnaleʼmo maleʼnayaʼmofeʼmo mago geʼamo neʼafiya vayaʼmo sipifi maiʼneʼa umenimo heʼa halauliʼa eʼnae. 9Mopafiʼmo emiʼeʼa ageʼnayana mago noyameʼe peleti mayaʼeʼmo ata hokanufaleʼmo kae maleʼnigeʼa ageʼnae. 10Yesuʼa hunoʼaeʼmo, hemenimo aliʼnaya noyamefatiʼmo mago aliteyo, huno hapa paiʼnigeno 11#Lu 5:6Saimoni Pitaʼa sipifiʼmo uno haino umenimo heno halaulino eno ani agiʼnaleʼmo maleʼniye. Mukiʼamo alopa noyamemo 153ʼamo uʼa haiʼa maiʼnayaʼmonanafa umenimo aino kapalu oʼaeʼniye. 12Yesuʼa hunoʼaeʼmo, etapa neʼyaʼmo alita neyo, huno hapa paiʼnigeʼapaeʼmo geʼamo neʼafiya vayaʼmogi huʼapaeʼmo, Ala kava nekeʼmae, huʼa ageʼnayaʼmofeʼmo ina lagamae, huʼa afi gesayafeʼmo koli huteʼa ge huʼa afi okeʼnae. 13#Yo 6:11Inagi Yesuʼa eno peleti mayamo alino apamiteno noyameʼeʼmo ani kava huno alino apamiʼniye. 14#Yo 20:19,26Yesuʼa faliʼniyatetiʼmo halate he tinoʼaeʼmo napa tali afinaʼmo geʼamo neʼafiya vayaʼai apaulagaleʼmo afole aiʼnigeʼa ageʼnae.

Yesuʼe Pitaʼeʼmo ge huge afige huʼnaʼa gemae

15 # Mt 26:33; Yo 1:42 Neʼyaʼmo neteʼapaeʼmo Yesuʼa Saimoni Pitafeʼmo hunoʼaeʼmo, Yoni mafaʼneʼamo Saimoniyo, huno, nagaefeʼmo kahau kayamopafiʼmo kahauʼnigeka ani vayaʼaina aeka apakaseka maiʼnapiye, huno afi geʼnigenoʼaeʼmo, Ala kava nene, huno, ago nageʼnanana kagaefeʼmo nahauʼniye, huno ha paiʼnigenoʼaeʼmo, nagae aikeli sipisipi vayaʼmo neʼyaʼmo apamiyo, huno ha paiʼniye. 16#Ap 20:28Halate napa tu afinaʼmo Yesuʼa hunoʼaeʼmo, Yoni mafaʼneʼamo Saimoniyo, huno, nagaefeʼmo kahau kayamopafiʼmo kahauʼnifiye, huno afi geʼnigenoʼaeʼmo, Ala kava nene, huno, he ago nageʼnanana kagaefeʼmo nahauʼniye, huno ha paiʼnigenoʼaeʼmo, nagae sipisipi vayaʼaiteʼmo yagaika apato, huno ha paiʼniye. 17#Yo 13:38; 16:30Halate napa tali afinaʼmo Yesuʼa hunoʼaeʼmo, Yoni mafaʼneʼamo Saimoniyo, huno, nagaefeʼmo kahauʼnifiye, huno afi geʼnigenoʼaeʼmo Pitaʼa Yesuʼmo napa tali afinaʼmo nagaefeʼmo kahauʼnifiye, huno afi geʼniyaʼmofeʼmo aipamoʼmo kana huʼnigenoʼaeʼmo, Ala kava nene, huno, kagaemo muki kavaʼamo ago ageʼnanana kagaefeʼmo nahauʼniye, huno ha paiʼnigenoʼaeʼmo, nahauʼniya sipisipi vayaʼaina neʼyaʼmo apamiyo. 18Alagi lama gemo kaha nepauve, neya vekamo maiʼnekaeʼmo kukenakamo kagaikamo alika vaitekaeʼmo kagesa afiʼnana kotegamo afaʼa utaleka neʼane. Henagaʼamo kosuna letekaeʼmo kayaʼmo aeka hayo huʼnisanageno kukenakamo vaino kateteno visanafeʼmo okahauʼnisiya kotegamo kavalelino ugiye, huno ha paiʼniye. 19#Mt 16:24-25; Mk 1:17; 2 Pi 1:14Yesuʼmo Pitaʼa haiya agufa kavaʼmo huno falisifigeno Gotiʼa agiʼaleʼmo alino asaga huno atesiya kavafeʼmo alino ave lisiyafeʼmo ani gemo huʼniye. Ani gemo hutenoʼaeʼmo Pitafeʼmo hunoʼaeʼmo, nakame huvo, huno ha paiʼniye.

Yesuʼa hauʼniya vekaeʼmo ava gemo huʼniya gemae

20 # Yo 13:23-25 Pitaʼa aino afe leno ageʼniyana geʼamo neʼafiya vayapatiʼmo Yesuʼa hauʼniya vekamo anakame huno eʼnigeno ageʼniye. Ani vekamoʼmo hogoteʼa neʼyaʼmo neʼnaya afinaʼmo Yesu haopaleʼmo maiʼnenoʼaeʼmo Ala kava nene, huno, kavalelino uno hosu vayaʼaina apamisiya vekamo ina laʼmae, huno afi geʼniya vekamae. 21Pitaʼa ageteno Yesufeʼmo hunoʼaeʼmo, ani vekalegamo na agufa kavaʼmo afole aigiye, huno afi geʼnigeno 22#Mt 16:28Yesuʼa hunoʼaeʼmo, afaʼa maiʼnisigeʼna emiʼnegauve, huʼna hisuvana kagae yaʼmo ohaneʼniye. Kagaemo nakame huvo, huno ha paiʼniye. 23Yesuʼa ani gemo huʼniyaʼmofeʼmo ani konaga vayaʼmogi apakaiʼapimo ge huʼapaeʼmo, ani vekamo ofalisiyafeʼmo huʼniye, huʼa huʼnae. Huʼnayaʼmonanafa Yesuʼa hunoʼaeʼmo, ofaligiye, huno osuʼnifa afaʼa maiʼnisigeʼna emiʼnegauve, huʼna hisuvana kagae yaʼmo ohaneʼniye, huno huʼniye. 24#Yo 19:35Ani vekamoʼmo ani gemo ago avoʼmo kae maleʼnigeno hemenimo ani kavafeʼmo faigoko geʼamo nehiye. Lagaemo huʼniya gemo afitetaeʼmo lama gemo huʼniye, huta afiʼnone. 25#Yo 20:30Yesuʼa magoʼe huno muki kavaʼamo huʼniyaʼmonanafa muki huʼniya kavaʼamo avoʼmo kaesunana asole mukumo hanesigeno ma mopafiʼmo hanesiya kaʼmo ohaneʼniye, huʼna nagesamo afiʼnove.

Currently Selected:

Yoni 21: kyg2013

Highlight

Copy