Apa 1

Yesuʼa hunoʼaeʼmo, Goti Aunemeʼamo aliʼna atesugeno lapakaetegamo eminegaiye, huno hapa paiʼniya gemae

1-2 # Mk 16:19; Lu 1:3; 24:49-51 Tiyofalasigae, huʼna, Nagaemo hogoteʼna kagaefeʼmo mago mukufiʼmo Yesuʼa aliʼyaʼamo aepa faino aliʼniya afinatetiʼe alime alime neʼegenoʼaeʼmo Gotiʼa kokuʼnapiʼmo avalelino uno haiʼniya afinaʼefeʼmo Yesuʼa muki huʼniya kavaʼe alino apaya maleʼniya geʼaʼeʼmo ava gemo huʼna avoʼmo kaeʼnove. Yesuʼa Goti Aunemeʼamo himamuʼaletiʼmo apa vayaʼamo lekana paino apateʼniya vayaʼaifeʼmo hunoʼaeʼmo, Ani aliʼyaʼmo alita maiyo, huno hapa paitegenoʼaeʼmo Gotiʼa avalelino kokuʼnapiʼmo uno haiʼniye. 3#Lu 24:36-49; Ap 10:41Yesuʼa faliʼniyatetiʼmo he tinoʼaeʼmo apaulagaleʼmo fotiʼa afinapatiʼmo alu afina alu afinaʼmo afole aite afole aite huʼniye. Agaemo muki afinaʼmo muki kavaʼamo apaulagaleʼmo huʼnigeʼa ageteʼapaeʼmo, ago he tino afaʼa maiʼniye, huʼa magoke apakesamo afiʼnae. Afole aino maiʼnenoʼaeʼmo Gotiʼa yagaino neʼapateya kavafeʼmo alino apaya maleʼniye. 4#Lu 24:49; Yo 14:16-17; Ap 2:33Yesuʼe apa vayaʼaʼeʼmo aliʼa anupa huʼa maiʼneʼapaeʼmo hapa painoʼaeʼmo, Yulusalemu taonifatiʼmo ataletapa oʼuta maiʼniyo. Afoʼnimoʼmo hunoʼaeʼmo, lapakaetegamo aliʼna atesugeno emiʼnegaiye, huno naha paiʼnigeʼna ava gemo huʼna lapa paiʼnova vekaeʼmo agava maiyo. 5#Mt 3:11Yoniʼa anilafapiʼmo aniʼmo faleno apatetenoʼaeʼmo aise afinaʼmo utesigeʼna Goti Aunemeʼaletiʼmo aniʼmo faleʼna lapategauve, huno hapa paiʼniye.

Yesuʼa kokuʼnapiʼmo uno haiʼniya gemae

(Mk 16:19-20; Lu 24:50-53)

6 # Lu 24:21 Apa vayaʼaʼe Yesuʼeʼmo aliʼa anupa huʼa maiʼneʼapaeʼmo Yesufeʼmo, Ala kava nene, huʼa, Hemenimo halate Yu vayaʼmo alika he tika latesanageta muki vayaʼaiteʼmo yagaita apatesupiye, huʼa afi geʼnagenoʼaeʼmo, 7#Mk 13:32Afoʼnimoʼmo lekana pai maleʼniya afinaʼe kanaleʼeʼmo agaiʼa yanageno hainu afinaʼmo afole aisifigetapa oʼafigae. 8#Mt 28:19; Lu 24:48; Ap 2:32; 3:15; 5:32Oʼafigayaʼmonanafa Goti Aunemeʼamo aote Aunemeʼamo lapakaeteʼmo emineno lokiya vaino lapatesigetapa Yulusalemu taonifinagi muki Yutiya kotegagi Sameliya kotegagi muki ma mopamo loleʼe loleʼe atupalegagi hutapa nava gemo aeta hakalo hutapa hapa paimale hapa paimale hugae, huno hapa paitegenoʼaeʼmo 9#Yo 6:62Gotiʼa kokuʼnapiʼmo avalelino uno haino hiyapiʼmo faleʼnigeʼa ageʼnageno uno haino faleʼniye. 10#Lu 24:4Kokuʼnapiʼmo aulu heʼa ageʼa maiʼnageʼanaeʼmo lole vekalaʼmo yaveyave kukena vailiʼnaʼa vekalaʼmo malage huʼana afole aiteʼanaeʼmo apakaeʼeʼmo magokepi he tiʼana maiʼnaʼae. 11#Mt 26:64; Lu 21:27Maiʼneʼanaeʼmo, Galeliya vayane, huʼana, Na kava higetapaeʼmo kokuʼnapiʼmo aulu nehae. Ani vekamo Yesuʼa lapakae folagapatiʼmo Gotiʼa kokuʼnapiʼmo avalelino uno haiʼnigetapa ageʼnaya kava huno halate eminegaiye.

Yutasi aimuʼyaleʼmo mago vekamo lekana paiʼa ateʼnaya gemae

12 # Lu 24:50-53 Apa vayaʼmo avemo agiʼamo Alifiʼaepalegatiʼmo ataleʼa halate Yulusalemu taonifiʼmo uʼa avaʼyi huʼnae. Alifiʼaepa avemo Yulusalemu haopaleʼmo haneʼnigeʼa aiseʼa yatala hugekana kaʼmo sapati afinaʼmo uʼeʼa nehaya agufa aupa kaʼmo haneʼniye. 13#Mt 10:2-4Uʼa avaʼyi huteʼapaeʼmo nehavaya nopiʼmo anagamo aeno hanagi maleʼniya nopilagamo uʼa haiʼa maiʼnae. Ani nopiʼmo maiʼnaya vayaʼai apakiʼapimo Pitaʼagi, Yoniʼagi, Yemisiʼagi, Eʼnaluʼagi, Filipiʼagi, Tomasiʼagi, Matolomiyuʼagi, Matiyuʼagi, Alifiyasi mafaʼnemo Yemisiʼagi, Yu vayaʼmo apakaiʼapileʼmo yagaisayafeʼmo hauʼniya vekamo Saimoniʼagi, Yemisi mafaʼnemo Yutasiʼagi huʼa maiʼnae. 14#Yo 6:42; 7:5Ani vayanagi mago aʼne anaganagi Yesu itaʼamoʼmo Maliyaʼagi Yesu aganaʼamogimogi huʼa magoke apaipa apakesamo aliteʼa aliʼa anupa huʼa maiʼneʼa nunumuʼmo huge ge huʼa afige huʼa maiʼnae.

15Ketogufaʼa afinaʼmo utegeʼapaeʼmo ani konaga vayaʼmo vani hataleti tuvetiʼa vayaʼmo aliʼa anupa huʼa maiʼneʼapaeʼmo Pitaʼa he tino hapa painoʼaeʼmo, 16#Sam 41:9Vayaʼnimogitapae, huno, Goti Aunemeʼamoʼmo akeyaʼvilaga Yutasiʼa Yesuʼmo atafauʼa kalavusi huʼa atesaya vayaʼmo kaʼmo alino ho huno apave liʼniya vekamoʼmo hisiya kavafeʼmo ava gemo laginago vekamo Nevinifeʼmo ha paiʼnigeno avoʼmo ago kae maleʼniye. Ani avoʼmo kae maleʼniya gemo ago afole aiʼniye. 17Yesuʼa lekana paino ateʼnigeno lagaeʼeʼmo magokepi lokaeno aliʼyaʼmo alino maiʼniye, huno hapa paiʼniye. 18#Mt 27:3-10Yutasiʼa ani agufa hosu kavaʼmo hisiyafeʼmo miyaʼmo amiʼnae. Miyaʼmo aliteno uno mago mopamo miya faiteno ani mopaleʼmo asagauno aiʼnigeno aipamo aino lakufaeno asagauno aiʼniye. 19Muki Yulusalemu taonifi maiʼnaya vayaʼmogi ani gemo afiteʼapaeʼmo ani mopamo agiʼamo Kola mopae, huʼa agi ateʼnae. Yu gefatiʼmo agiʼamo, Aikelatamagayagae, huʼa agi ateʼnae. 20#Sam 69:25; 109:8Pitaʼa magoʼe gemo hunoʼaeʼmo, Ani vekaeʼmo ava gemo Samu Mukufiʼmo avoʼmo kae maleʼniya gemoʼmo hunoʼaeʼmo,

Mago vekamoʼmo agae nopiʼmo uno haino oʼmaisigeno afaʼa hanegaiye,

huno avoʼmo kae maleteno magoʼe gemo Samu Mukufiʼmo avoʼmo kae maleʼniya gemoʼmo hunoʼaeʼmo,

Mago alu vekamoʼmo agae aimuʼyaleʼmo eno aliʼyaʼmo aligiye,

huno avoʼmo kae maleʼniye. 21-22#Yo 15:27Avoʼmo kae maleʼniyaʼmofeʼmo lagaepatiʼmo mago vekamoʼmo Yesuʼa faliʼniyatetiʼmo he tiʼniya kavafeʼmo faigoko geʼamo huno aeno hakalo huno hapa paisiyafeʼmo lekana paita ategaune. Yoniʼa aniʼmo faleno apateʼniya afinatetiʼmo maime maime eno Yesuʼa kokuʼnapiʼmo avalelino uno haiʼniya afinaʼmo maiʼniya vekamo Yesuʼe lagaeʼeʼmo magokepi lokaeno umenitata huno maiʼniya vekamo lekana paita ategaune, huno hapa paiʼniye. 23Lole vekalaʼmo Yosefeʼa alu agiʼamo Masamasiʼa magoʼe huno alu agiʼamo Yasatasiʼmo lekana paiʼa atete Mataiyasiʼa lekana paiʼa atete huʼnae. 24#Yo 2:25Lekana paiʼa anateʼneʼana nunumuʼmo huʼapaeʼmo, Ala kava nene, huʼa, Muki vayaʼai apaipafiʼmo neʼapakane. Mani lole vekalapatiʼmo lekana paika ateʼnisana vekamo alika lave liyo. 25Yutasiʼa aliʼyaʼamo ataleno uno faliteno koʼalegamo lamino maiʼniyaʼmofeʼmo lekana paika ateʼnisana vekamoʼmo Yutasi aimuʼyaleʼmo eno apa vekamo maiʼneno Yutasiʼa aliʼniya agufa aliʼyaʼmo aligiye, huʼa nunumuʼmo huʼnae. 26Anakiʼanimo alu ya alu yateʼmo avoʼmo kaeteʼa maleʼnageno Mataiyasi agimo afole aiʼnigeʼa apakaemo leveniʼa apa vayaʼeʼmo aliʼa magokepi ateʼnae.

Currently Selected:

Apa 1: kyg2013

Highlight

Copy