Apa 2

Goti Aunemeʼamo alino ateʼnigeno emineʼniya gemae

1 # Mon 23:15-21; Loa 16:9-11 Yu vayaʼai hopa afinaʼmo agiʼamo Petikosi afinaʼmo afole aiʼnigeʼapaeʼmo muki apakesamo afiʼa fatago huʼnaya vayaʼmo magoke apaipa apakesamo aliteʼa mago nopiʼmo aliʼa anupa huʼa maiʼnae. 2Maiʼnagenoʼaeʼmo malage huno kokuʼnapatiʼmo lusi yasimo aliteno age aigekana huteno maiʼnaya nopiʼmo uno haino havai teʼniye. 3#Mt 3:11Agayana ata vaikana yaʼmoʼa aino atagu faeno aote aote huno muki vayaʼai apakufaleʼmo leʼnigeʼa ageʼnae. 4#Ap 4:31; 10:44-46; 19:6; Mk 16:17Goti Aunemeʼamo aote Aunemeʼamoʼmo muki vayaʼai apaipafiʼmo faleno uno haino havai teteno apavenafuʼnamo alino afe leʼnigeʼapaeʼmo alu apake alu apakemo aepa faiʼa aiʼnae. 5Ani afinaʼmo Yu vayaʼmo mono nehaya afinaʼmogeʼa muki kotegatiʼmo ete ete huʼa Yulusalemu taonifiʼmo maiʼnae. 6Alu apake alu apakemo aiʼnageʼa asole vayaʼmogi afiteʼapaeʼmo eʼa aliʼa anupa huʼa maiʼnageʼapaeʼmo keʼapifati keʼapifatiʼmo huʼnageʼa afiteʼapaeʼmo, na agufa kavaʼmo afole aiʼnifi, huʼa huteʼa alu apakesa alu apakesamo afiʼnae. 7#Ap 1:11Afiteʼa hapau aiteʼapaeʼmo ani aiʼnaya apakeeʼmo apakesa afifi huʼnigeʼapaeʼmo, Ani apakemo neʼaiya vayaʼmo Galeliya kotega vayaʼmo maiʼnayana 8haiya kava huʼnigeʼapaeʼmo itati afotimogi gefatiʼmo nehageta muki vayaʼamogita lagaiti getifati getifatiʼmo neʼafune. 9#2 Ti 1:15Lagaemo Patiya vayaʼmo eta maige Mitiya vayaʼmo eta maige Elami vayaʼmo eta maige Mesopotemiya vayaʼmo eta maige Yutiya vayaʼmo eta maige Kapanosiya vayaʼmo eta maige Ponitasi vayaʼmo eta maige Esiya vayaʼmo eta maige 10Filisiya vayaʼmo eta maige Pamifiliya vayaʼmo eta maige Isipi vayaʼmo eta maige Sailini taoni haopalega Lipiya kotega vayaʼmo eta maige Lomu vayaʼmo eta maige huʼnone. 11Lagaemo Yu vayaʼe alu nofi vayaʼmogita Yu mono kavaʼmo akame nehuna vayaʼeʼmo eta maiʼnone. Lagaepatiʼmo Kaliti vayaʼmo eta maige Alapi vayaʼmo eta maige huʼnonaʼmonanafa lagae gefatiʼmo Gotiʼa lokiya kavaʼmo himamuʼaletiʼmo huʼniya kavafeʼmo ava gemo nehageta neʼafune, huʼa huʼnae. 12Muki vayaʼmogi afiʼa hapau aiteʼa apakesa alaʼamo afiteʼapaeʼmo apakaiʼapi apakaiʼapimo huʼapaeʼmo, Ani kavaʼmo aepaʼamo na agufa kavane, huʼa ge huʼa apafige apafige huʼa maiʼnae. 13Huʼa maiʼnayaʼmonanafa mago vayaʼamogi huʼapaeʼmo, Lusi aniʼmo neteʼapaeʼmo negi nagi nehae, huʼa huteʼa huʼa faipa huʼa apateʼnae.

Pitaʼa aeno hakalo huno hapa paiʼniya gemae

14Ani gemo huʼnagenoʼaeʼmo Pitaʼa leveniʼa apa vayaʼeʼmo lokaeno maiʼneno he tino muki vayaʼaifeʼmo aepa faino alopa gefatiʼmo hapa painoʼaeʼmo, Yu vayaʼnimogitapaʼe Yulusalemu taonifiʼmo maiʼnaya vayaʼmogitapaʼeʼmo geʼnimo afiyo. Ani kavaʼmo aepaʼaeʼmo lapa paiguvanagi afiyo. 15Lapakaemo hutapaeʼmo, Ani vayaʼmogi aniʼmo neteʼa negi nagi nehae, hutapa lapakesamo neʼafiyaʼmonanafa hemenimo netepiʼmo yegemo ago leno hakale huʼniya afinaʼmogeʼa negi nagi nosae. 16#Yol 2:28-32Negi nagi nosafa mago vekamo agiʼamo Yoveliʼa Gotitegati gemo alinineno aeno hakalo huno hapa nepaiya vekamoʼmo avoʼmo kae maleʼniya gemo hemenimo ago afole aiʼniye. Yoveliʼa hapa painoʼaeʼmo,

17Gotiʼa hunoʼaeʼmo, Hano hisiya afinaʼmo Nauneʼnameʼmo aniʼmo lakigekana huʼna muki ve aʼnemo apamiguve. Mafaʼnetapimogiʼe aʼmafaʼnetapimogiʼeʼmo nagae gemo aeʼa hakalo hugae. Neya vayatapimogimo alagamuna agegegana huʼa agegae. Kosu vayatapimogimo alagamuna agegae. 18He, aliʼyaʼnimo neʼaliya ve aʼneʼmo Nauneʼnameʼmo aniʼmo lakigekana huʼna apamisugeʼa aliʼneʼa nagae gemo alini uʼa aeʼa hakalo huʼa hapa paigae. 19-20Noʼagaya agufa kavaʼmo kokuʼnapati huteʼna aliʼna apave liguve. Ma mopafiʼmo alu kavaʼmo huʼna apave liguve. Atamo leteno halina aisigeno yegemo olegaiye. Kaimoʼa haesaʼage huteno kolakana nehisigeno Ala kava neʼmo afinaʼmo hogote afinaʼamo afole aigiye. 21#Lo 10:13Afole aisigeʼapaeʼmo muki vayaʼmogi Ala kava neʼmo agiʼamo aesaya vayaʼai apakufamo alino katino apategaiye,

huno huʼniye. 22#Yo 3:2Isaleli vayaʼmogitapamo geʼnimo afiyo. Yesuʼa Nasalasa kotega vekaeʼmo ava gemo huʼna lapa paisuvafeʼmo huve. Gotiʼa Yesutetiʼmo lokiya kavaʼmo huge noʼagaya agufa aune kavaʼmo huge alu kavaʼmo huge huʼniya kavatetiʼmo hunoʼaeʼmo, nagaetegatiʼmo emineʼniya vekae huno alino lapave liʼniye. Yesuʼa lapakae folagapiʼmo ani kavaʼmo ago huʼnigetapa ageʼnae. 23#Ap 4:28; 1 Pi 1:20Hogoteno Gotiʼa agesa afitenoʼaeʼmo, ani kavaʼmo afaʼa afole aigiye, huno ge hu maleʼnenoʼaeʼmo ago alino lapayapiʼmo ateʼniye. Ateʼnigetapa avalelitutapa hosu vayaʼmo keʼaepa gemo akame nosaya vayaʼai apayapiʼmo ateʼnae. Lapakaemo ani vayaʼai apayapatiʼmo Yesuʼmo malipu yosaleʼmo nili aitetapa alita he tita atetetapa kamitimo amagiʼnae. 24#Ap 3:15Faliʼnigenoʼaeʼmo Gotiʼa faliʼniya nofipatiʼmo hatu maeno ateteno kanolufatiʼmo ago alino he tino ateʼniye. Faliʼniya kavaʼmoʼa alagi afaʼa atafauno oʼategaiye. 25#Sam 16:8-11Laginago vekamo Neviniʼa Yesufeʼmo ava gemo hunoʼaeʼmo,

Nagaemo muki afinaʼmo Ala kava neʼmo naulagaleʼmo maiʼnigeʼna ageʼnove. Lamaga nayateʼmo maiʼniyaʼmofeʼmo atete osuguve. 26Maiʼniyaʼmofeʼmo naipafiʼmo namogaga neʼauve. Navayafatiʼmo namogaga neʼauve. Navayagunagu huʼna agava neʼmauvanageno nagufaʼnimo alagepa huno hanesigeʼna maiʼna haga legauve. 27#Ap 13:35Kagaemo ani kavatefeʼmo nagupi mafaʼnemo kanolufiʼmo afaʼa oʼnatalegane. Kagaemo hukaeʼmo aote vekaʼnimo agufamo atalesugeno okasaligiye, huka huʼnane. 28Kagaemo maige maige huʼna maisuva kaʼmo ago alika nave liʼnane. Kaulagaleʼmo naipafiʼmo namogaga neʼaiya kavaʼnimo alika maleka havaiteka nategane,

huno avoʼmo kae maleʼniye. 29#1 Kin 2:10; Ap 13:36Vayaʼnimogitapae, huno, Neviniʼa ani gemo huʼniyaʼmonanafa laginago vekamo Neviniʼa faliʼnigeʼapaeʼmo kiʼa ateʼnaya kanoluʼamo hemenimo lagaetegamo afaʼa haneʼniye. 30#2 Sam 7:12; Sam 89:3-4; 132:11Neviniʼa aune vekamo maiʼnigenoʼaeʼmo Gotiʼa ha painoʼaeʼmo, kaginago vayapatiʼmo Kalaisi vekamo aliʼna afole aiʼna atesugeno kini vekamo maiʼneka yagaiʼnana kava huno kini vekamo maiʼneno yagaino apategaiye. Lama gemo nehuve, huno hu maleʼniye. 31#Sam 16:10Neviniʼa afole aisiya kavaʼmo ageʼnenoʼaeʼmo Kalaisi vekamo faliʼniyatetiʼmo he tisiya kavafeʼmo hunoʼaeʼmo, nagupi mafaʼnemo kanolufiʼmo oʼnatalegane, huno huʼniyaʼmofeʼmo Kalaisi agufaʼamo okasaliʼniye. 32#Ap 1:8Gotiʼa mani vekamo Yesuʼmo ago alino he tino ateʼnigeta ageteta aeta hakalo huta hapa nepauna vayaʼmo maiʼnone. 33#Ap 1:4; 7:55-56Gotiʼa ago alino he tino ateteno kokuʼnapiʼmo avalelino uno haino lamaga haopaleʼmo ateʼnigeno maiʼniye. Muki yaʼmo Afoʼamoʼmo hogoteno, kamiguve, huno ha paiʼniya Aunemeʼamo ago amiʼnigeno Yesuʼa Goti Aunemeʼamo aniʼmo lakigekana huno alino ateʼnigeno emineʼnigetapaeʼmo hemenimo lapakaemo ani afole aiʼniya kavaʼmo ago agetetapa afiʼnae. 34-35#Sam 110:1Neviniʼa kokuʼnapiʼmo uno ohaiʼniyaʼmonanafa ani gemo hunoʼaeʼmo,

Ala kava neʼmoʼa ala kava neʼnieʼmo ha painoʼaeʼmo, Lamaga nahaopaleʼmo fai maiʼnegeʼnao kame vayakamo apamagiteʼna aliʼna kaiya afeʼalumelagamo apategauve,

huno avoʼmo kae maleʼniye. 36#Ap 5:30-31Ani gemo huʼniyaʼmofeʼmo muki Isaleli vayaʼmogitamo ani kavafeʼmo magoke laipa lagesamo aligetao. Lapakaemo ani vekamo Yesuʼmo yosaleʼmo ago nili aiʼnaya vekaeʼmo Gotiʼa hunoʼaeʼmo, Ala kava nene, huno ateteno Kalaisiʼae, huno lekana paino ateʼniye.

37 # Lu 3:10,12; Ap 16:30 Ani gemo afiʼnagenoʼaeʼmo apaipafiʼmo aeʼnigeʼa Pitaʼe muki apa vayaʼefeʼmo huʼapaeʼmo, Vayatimogitapae, huʼa, haiya kavaʼmo hisune, huʼa ge huʼa apafi geʼnae. 38#Lu 24:47; Ap 3:19Pitaʼa hunoʼaeʼmo, Lapaipamo alita afe letetapa Yesu agiʼaletiʼmo aniʼmo falegenoʼao Gotiʼa hosu kavatapimo alino ataleteno Aunemeʼamo fikumo lapamaeno lapamino. 39#Aiy 57:19Gotiʼa hunoʼaeʼmo, Nauneʼnameʼmo lapamiguve, huno huʼniya polomasi geʼamo lapakaefenagi mafaʼne anagatapiʼenagi afagitegamo maiʼnaya vayafenagi huno hapa paiʼniye. Ala kava netimo Gotiʼa eyo, huno muki keya aeno ge hisiya vayaʼaifeʼmo ani gemo hapa paiʼniye. 40#Loa 32:5; Fl 2:15Huno hapa paitenoʼaeʼmo Pitaʼa magoʼe gemo huno apakesamo huno halo aino aeno hakalo huno hapa paitenoʼaeʼmo, Ehetapiye, huno, Gotiʼa hosu kavaʼmo nehaya vayaʼmo kayoʼmo apamisiyategatiʼmo ataletapa lapaune hetaletapa vigenoʼao lapakufamo alino katino lapateno, huno hapa paiʼniye. 41#Ap 2:47; 4:4; 5:14Hapa paiʼniya geʼaeʼmo apakesamo afiʼa fatago huteʼa apamogaga aiʼnageʼapaeʼmo aniʼmo faleʼa apateʼnae. Ani afinaʼmo asole vayaʼmo tali tauseniʼa vayaʼmo Goti mafaʼnemo hamaleʼnageno Gotiʼa siosi vayaʼaʼeʼmo magokepi alino anupa huno apateʼniye. 42#Ap 20:7Apa vayaʼmogimo Goti geʼamo alagepa huʼa aliʼa apaya maleʼnageʼa afige apakaeʼeʼmo afalu afalu kavaʼmo huʼa alagepa huʼa magokepi lokaeʼa maige Ala kava neʼmo kaveʼmo nege nunumuʼmo huge huteʼapaeʼmo atafauʼa alagi huʼa maiʼnae.

Apakesamo afiʼa fatago huʼnaya vayaʼai kavafeʼmo huʼniya gemae

43 # Ap 5:11 Ani kavaʼmo huʼa maiʼnageʼapaeʼmo muki vayaʼmogimo hapau aiteʼa koli huʼnageʼapaeʼmo apa vayaʼmogimo muki noʼagaya agufa lokiya kavaʼmo huʼnae. 44#Ap 5:12; 6:8; 4:32-35Muki apakesamo afiʼa fatago huʼnaya vayaʼmo magokepi lokaeʼa maiʼneʼa kagemi yaʼapimo aliʼa fako huʼa apakaiʼapimo apamiteʼapaeʼmo nagaiʼni yaʼmo haneʼniye, huʼa osuʼa maiʼnae. 45Kagemi yaʼapiʼe mopaʼapiʼeʼmo maketi huʼa moni aliteʼa apakae vayapatiʼmo mago yaʼapimo ohaneʼniya vayaʼmo ani aliʼnaya monimo apamiʼnae. 46#Lu 24:53Muki afinaʼae afinaʼaeʼmo magoke apaipa apakesamo aliʼa maiʼneʼa Yu vayaʼai alopa mono nopiʼmo uʼa haiʼa aliʼa anupa huʼa maige apaote apaote huʼa noʼapifiʼmo Yesu kaveʼmo nege magokepiʼmo lokaeʼa maiʼneʼa nege huʼa maiʼnae. Neʼyaʼmo neʼneʼapaeʼmo apamogaga aiteʼa yagu yaga apaipamo kaliʼa maiʼneʼa 47#Ap 2:41; 6:7; 11:21,24Goti agiʼaleʼmo aliʼa asaga huʼa maiʼnae. Muki vayaʼmogimo Goti mafaʼneʼaifeʼmo hapao ke heʼnageʼapaeʼmo alagepa huʼa maiʼnae. Ala kava neʼmoʼa muki afinaʼae afinaʼaeʼmo mago vayaʼai apakufamo alino katino apateteno siosi vayaʼaʼeʼmo magokepi alino anupa huno apateʼniye.

Currently Selected:

Apa 2: kyg2013

Highlight

Copy