Yoni 20

Yesuʼa ago he tiʼniya gemae

(Mt 28:1-8; Mk 16:1-8; Lu 24:1-12)

1Hogote afinaʼmo kotino alino ha oleʼnigenoʼaeʼmo Maliyaʼa Maganala kotega a kanomo kanolulega uno ageyana yafa kaʼmo avayaleʼmo aiʼana akani maleʼnaʼa yafaʼmo avayaleʼmo ohaneʼnifa aluyatega haneʼnigeno ageʼniye. 2#Yo 13:23Ageteno nagu nagu huno uno Saimoni Pitaʼe mago geʼamo neʼafiya vekamo Yesuʼa hauʼniya vekaʼeʼmo maiʼnaʼategamo unoʼaeʼmo, apakaemo Ala kava neʼmo agufaʼamo yafa kapatiʼmo alini uʼa haiyaʼaleʼmo maleʼnafi huta oʼageta ataleta eʼnone, huno hana paiʼnigeʼana 3Pitaʼe alu vekamo geʼamo neʼafiya vekaʼeʼmo kanolulega uʼnaʼae. 4Magokepi nagu nagu huʼana uʼanaeʼmo alu vekamoʼa Pitaʼmo ago aeno agaseno hogoteno uno yafa kateʼmo avaʼyi huteno 5ape huno ageʼniyana Yesuʼa hayaeʼana ateʼnaʼa kenaʼageʼmo haneʼnigeno ageʼniyana faleno uno ohaiʼniye. 6-7#Yo 11:44Saimoni Pitaʼa akame huno eno yafa kapiʼmo faleno uno haino ageʼniyana Yesuʼa hayaeʼana ateʼnaʼa kenaʼageʼmo haneʼnigeno ageʼniye. Agenopaleʼmo kino neʼaliya akasipimo kenaʼeʼmo magokepi ohaneʼnifa lo aeno aote maleʼnigeno haneʼniye. 8Alu vekamo geʼamo neʼafiya vekamo hogoteno nagu nagu huno uno avaʼyi huʼniya vekamoʼa yafa kapiʼmo uno haino agetenoʼaeʼmo agesa afino fatago huʼniye. 9#Ap 2:24-32; 1 Ko 15:4Huʼniyaʼmonanafa ani afinaʼmo Goti mukufi gemoʼa hunoʼaeʼmo, faliteno he tigiye, huno hu maleʼniya geʼaeʼmo anakesamo oʼafiʼnaʼae. 10Inagi geʼamo neʼafiʼa vekalaʼmo ateʼana noʼanilegamo uʼnaʼae.

Maliyaʼa Yesuʼmo ageʼniya gemae

(Mt 28:9-10; Mk 16:1-8; Lu 24:1-12)

11Uʼnaʼaʼmonanafa Maliyaʼa eno yafa kaʼmo avayaleʼmo he tino maiʼneno aviʼyaʼmo nehunoʼaeʼmo ape huno yafa kapiʼmo ageʼniyana 12lole enisole vekalaʼmo yaveyave kukena vailiʼnaʼa vekalaʼmo maiʼnaʼageno anakeʼniye. Yesuʼmo alini uʼa haiʼana maleʼnaʼa yateʼmo mago vekamo agenopaleʼmo maiʼnigeno mago vekamo aiyalegamo maiʼniye. 13Anakaemo huʼanaeʼmo, Ane, huʼana, na kava higekaeʼmo aviʼyaʼmo nehane, huʼana ge huʼana afi geʼnaʼageno Ala kava vekaʼnimo alini uʼa haiyaʼaleʼmo maleʼnafi huʼna oʼagove, huno hana paiteno 14#Lu 24:16; Yo 21:4aino afe leno ageʼniyana Yesuʼa he tino maiʼnigeno ageʼniyana Yesuʼmae, huno oʼageʼniye. 15Yesuʼa hunoʼaeʼmo, Ane, huno, na kava higekaeʼmo aviʼyaʼmo nehane. Ina lafeʼmo kahauya nehane, huno afi geʼnigeno Maliyaʼa hoyafiʼmo aliʼyaʼmo neʼaliya vekamo maiʼniye, huno agesa afitenoʼaeʼmo, kagaemo haiya kava hane, huno huteno, kahao ke hovanagi agufaʼamo alinika uka maleʼnisana yategaeʼmo naha paiyo. Uʼna aliniʼna ugesuve, huno afi geʼnigeno 16Yesuʼa hunoʼaeʼmo, Maliyao, huno huʼnigeno aino afe leno Himulu gefatiʼmo hunoʼaeʼmo, Lamonai, ina ge huno, Tisao, huno huʼnigenoʼaeʼmo, 17#Lo 8:29; Hi 2:11-12afoʼnimotegamo uʼna ohaiʼnovaʼmofeʼmo nanu okiyo. Naganaʼnimogifeʼmo uka hapa paikaeʼmo, kokuʼnapi Afoʼnimoʼmo Gotiʼnimotegamo Afotapimoʼmo Gotitapimotegamo uʼna haiguve, huno huʼniye, huka uka hapa paiyo, huno ha paiʼniye. 18Maliyaʼa Maganala kotega aʼmoʼa uno geʼamo neʼafiya vayaʼaifeʼmo hunoʼaeʼmo, Ala kava neʼmo ago ageʼnove, huno hapa paiteno Yesuʼa ha paiʼniya gemo hapa paiʼniye.

Yesuʼa geʼamo neʼafiya vayaʼai apaulagaleʼmo afole aiʼniya gemae

(Mt 28:16-20; Mk 16:14-18; Lu 24:36-49)

19 # Yo 19:38 Ani afinaʼmo hogote afinaʼmogeʼa hani huʼnigeʼapaeʼmo Yesu geʼamo neʼafiya vayaʼmogi Yu vayaʼaifeʼmo koli huteʼapaeʼmo nopiʼmo loki ae maleʼa maiʼnayaʼmonanafa Yesuʼa aliʼa anupa huʼa maiʼnaya folagapiʼmo he tino maiʼnenoʼaeʼmo, lapaipamoʼmo falu hino, huno hapa paitenoʼaeʼmo 20#Yo 16:22; 19:34; 1 Yo 1:1aya agusalaʼmo alino ataleno apave liteno haopamo alino apave liʼniye. Ageteʼapaeʼmo geʼamo neʼafiya vayaʼmogi apamogaga aiʼnae. 21#Yo 17:18Yesuʼa halate hunoʼaeʼmo, lapaipamoʼmo falu hino, huteno, Afoʼnimoʼmo alino nateʼnigeʼna emiʼneʼnova kava huʼna aliʼna lapatesugetapa ugae, huno hapa paiteno 22apakaeteʼmo avamusaʼmo aitenoʼaeʼmo, Aote Aunemeʼamo aliyo, huno hapa paiteno, 23#Mt 16:19Lapakaemo mago vayaʼaifeʼmo, Gotiʼa hosu kavatapimo alino ataleʼniye, hutapa hapa paisagenoʼaeʼmo ago alino ataleʼniyanageno hosu kavaʼapaimo ohanegaiye. Ani ge hutapa mago vayaʼaifeʼmo Gotiʼa hosu kavatapimo alino oʼataleʼniye, hutapa hapa paisagenoʼaeʼmo alino oʼataleʼniyanageno hosu kavaʼapimo afaʼa hanegaiye, huno hapa paiʼniye.

Tomasiʼa Yesuʼmo ageʼniya gemae

24 # Yo 11:16; 14:5; 21:2 Yesuʼa afole aiʼniya afinaʼmo Tomasiʼmo tuolofuʼa vayapati vekaeʼmo lagoʼya mafaʼae huʼa agi neʼaya vekamo ani afinaʼmo eno apakaeʼeʼmo magokepi lokaeno oʼmaiʼniye. 25Oʼmaiʼniyaʼmofeʼmo geʼamo neʼafiya vayaʼmogi Tomasifeʼmo huʼapaeʼmo, Ala kava neʼmo ago ageʼnone, huʼa ha paiʼnagenoʼaeʼmo, ayatalapiʼmo nili aiʼnaya kaʼmo oʼagege ati yagaina nayatetiʼmo ayatalapi nili aiʼnaya kapiʼmo oʼvaige haopafiʼmo hayo aeʼnaya kapiʼmo nayaʼmo oʼvaige hisuvana, he tiʼniye, huʼna nagesa oʼafiguve, huno hapa paiʼniye. 26Anaga hogote salefiʼmo halate geʼamo neʼafiya vayaʼmo nopiʼmo Tomasiʼeʼmo magokepi lokaeʼa maiʼnae. Kitaleʼmo loki ae maleʼnayaʼmonanafa Yesuʼa aliʼa anupa huʼa maiʼnaya folagapiʼmo he tino maiʼnenoʼaeʼmo, lapaipamoʼmo falu hino, huno hapa paiteno 27Tomasifeʼmo hunoʼaeʼmo, ati yagaina kayaʼmo nayatalapiʼmo vaika ago. Kayaʼmo alika ataleʼneka ati yagaina kayatetiʼmo hayoletiʼmo nahaopafiʼmo aeʼnaya kapiʼmo vaiyo. Vaiteka kagesamo afika fatago nosana kavakamo ataleka kagesa afika fatago huvo, huno ha paiʼnigeno 28Tomasiʼa hunoʼaeʼmo, Ala kava neʼnimo Gotiʼnimogae, huno ha paiʼnigenoʼaeʼmo, 29#1 Pi 1:8kagaemo nageʼnanaʼmofeʼmo kagesamo afika fatago nehapiye. Oʼnageʼnayaʼmonanafa nagaefeʼmo apakesamo afiʼa fatago huʼnaya vayaʼmo aulena vayaʼmo maiʼnae, huno ha paiʼniye.

Apakesamo afiʼa fatago hisayafeʼmo avoʼmo nekaove, huno huʼniya gemae

30 # Yo 21:25 Yesuʼa geʼamo neʼafiya vayaʼai apaulagaleʼmo muki noʼagaya agufa aune kavaʼmo magoʼe huno huʼniya kavafeʼmo mani mukufiʼmo avoʼmo okaeʼnove. 31#Yo 3:15; Lo 1:17; 1 Yo 5:13Lapakesamo afita fatago hutetapaeʼmo, Yesuʼa Kalaisi vekamo Goti Mafaʼneʼamo maiʼniye, hutetapa maiʼnetapaeʼmo agiʼaletiʼmo alagepa hutapa maige maige hutapa maisayafeʼmo mani gemo huʼna avoʼmo kae maleʼnove.

Currently Selected:

Yoni 20: kyg2013

Highlight

Copy