Apa 26

Poloʼa agaiʼamo ha maesiya agufa gemo Agalipafeʼmo ha paiʼniya gemae

1Agalipaʼa Polofeʼmo hunoʼaeʼmo, kagaikamo kaha maesana gemo afaʼa hugane, huno ha paiʼnigenoʼaeʼmo, Poloʼa ayaʼmo ataleteno agaiʼamo ha maesiya gemo hunoʼaeʼmo, 2Ala kini vekamo Agalipao, huno, Kaulagaleʼmo he tiʼna maiʼneʼnaeʼmo gemo huʼna naha maesuvafeʼmo Yu vayaʼmogi agoti huʼa nateʼnaya gemo kaha paisuvafeʼmo naipamoʼmo falu huʼniye. 3Kagaemo muki Yu vayaʼmogitamo nehuna kavatiʼe lagesa neʼafuna kavatiʼeʼmo ago ageʼnanaʼmofeʼmo magoʼe huno naipamoʼmo falu nehiye. Kahao ke hove. Alaga okahaeʼninageka geʼnimo afiyo.

4Hogoteʼna mafaʼneʼnileʼmo maiʼneʼnaeʼmo vayaʼniʼeʼmo Yulusalemu taonifiʼmo maime maime eʼnaeʼmo huʼnova kavaʼnimo Yu vayaʼmogimo ago nageʼnae. 5#Fl 3:5-6Yatala afinaʼmo nageʼnayaʼmofeʼmo Falasi vayaʼai kavaʼmo kana huʼniya agufa monoʼmo nehaya kavaʼmo yatala afinaʼmo akame huʼniye, huʼa hapa paigefe hapauʼnisiyana ani gemo afaʼa hapa paigae. 6#Ap 23:6; 28:20Hemenimo agotileʼmo aliʼa he tiʼa nateʼnaya gemo aepaʼamo kaha paiguve. Gotiʼa akeyaʼvilaga laginago vayaʼaifeʼmo hunoʼaeʼmo, ani kavaʼmo huguve huno huʼniya kavaʼmo afole aisiyafeʼmo navayagunagu huʼna agava neʼmauva kavatefeʼmo agoti huʼa neʼnatae. 7Felugaʼe haniʼilagaʼeʼmo tuolofuʼa nofi vayatimogi Gotifeʼmo mono huge apakesamo afiʼa fatago huge huteʼa ani gelefeʼmo apavayagunagu huʼa agava neʼmaiye. Ala kini vekamo Agalipao, huno, Navayagunagu huʼna agava neʼmauva kavatefeʼmo agoti huʼa neʼnatae. 8Yu vayaʼmogitapae, huno, Na kava higetapaeʼmo, Gotiʼa faliʼnaya vayaʼmo afaʼa alino he tino oʼapategaiye, hutapa nehae. 9#Ap 8:3Ani kavaʼmo huʼna Nasalasa vekamo Yesufeʼmo naini huʼna ategauve, huʼna nagesamo afiteʼna agiʼaleʼmo aliʼna afepi ateʼnove. 10Ani agufa kavaʼmo Yulusalemu taonifatiʼmo huʼnove. Mono huʼa neʼapataya vayaʼaiteʼmo yagaiʼa neʼapataya vayaʼmogi mago lokiya gemo huʼa himamuʼnimo alisuva agufa avoʼmo kaeʼa namiʼnageʼna aliteʼna asole apaote vayaʼmo apavaleliʼneʼna kalavusi huʼna apateʼnove. Kanisole vayaʼmogimo, kamitimo apamagigune, huʼa huʼnageʼnaeʼmo nagaeʼeʼmo, he kanalene, huʼnagekeʼmo huʼnove. 11Umenitata huʼna muki Yu vayaʼai mono nopiʼmo kayoʼmo apamiteʼna Yesufeʼmo huʼa faipa huʼa atesayafeʼmo apamagiʼnove. Lusi kava huno naipamo leʼnigeʼnaeʼmo alu nofi vayaʼai taoniʼapifiʼe taoniʼapifiʼeʼmo umenitata huʼna kayoʼmo apamiʼnove.

Poloʼa Goti mafaʼnemo hamaleʼniya kavafeʼmo huno hapa paiʼniya gemae

(Ap 9:3-19; 22:6-16)

12Nagaemo mono huʼa neʼapataya vayaʼaiteʼmo yagaiʼa neʼapataya vayaʼmogimo kaeʼa namiʼnaya avoʼmo aliteʼna ani kavaʼmo hisuvafeʼmo Namasakasi taoni kateʼmo uʼnove. 13Ala kini vekao, huno, Felugakukuʼmo kateʼmo neʼugenoʼaeʼmo ha le yaʼmoʼa yegemo ago aeno agaseʼniya ha le yaʼmo nagaeteʼmo aeno ha leʼnigeta nagaeʼeʼmo magokepi lokaeta uʼnona vayaʼeʼmo ageteta mopafiʼmo asagauta aita lagoʼya faiʼnone. 14Mago vekamoʼmo Himulu gefatiʼmo hunoʼaeʼmo, Solo, Solo, huno, Na kava higeka kaini huka neʼnatane. Pulumakamoʼa aliʼya alinino visiyafeʼmo neʼyagaiya vekamoʼmo agufafiʼmo akoʼya kayotetiʼmo nefaigeno aiyaletiʼmo aeno fayo nehisigenoʼaeʼmo magoʼe huno agafu kigiye. Ani kava huka akoʼya kayoteʼmo aika lanu nepaine, huno naha paiʼniye. 15Naha paiʼnigeʼnaeʼmo, Ala kava nene, huʼna, Kagaemo ina lagae, huʼna afi geʼnogenoʼaeʼmo, Yesuʼnamo kaini huka neʼnatana vekamo maiʼnove. 16He tika maiyo. Aliʼyaniʼmo aliteka geʼnimo aeka hakalo huka hapa paisanafeʼmo lekana paiʼna katesuvafeʼmo kagaeteʼmo afole aiʼnove. Kagaemo nageʼnana kavaʼe aliʼna kave lisuva kavaʼefeʼmo ava gemo huka hapa paigane. 17Nagaemo Yu vayaʼaitegaʼe alu nofi vayaʼaitegaʼeʼmo aliʼna katesugeka uka maiʼnisanageʼnaeʼmo apayapatiʼmo kagufamo aliʼna katiʼna kategauve. 18Apakaemo nagaefeʼmo apakesamo afiʼa fatago hisageʼna hosu kavaʼapimo aliʼna atalesugeʼa Goti apaote vayaʼaʼeʼmo hetamaʼapimo aliteʼa magokepi lokaeʼa maisayafeʼmo kagaemo uka apaulagamo alika ayakeka apateteka hani huʼnisiya yategatiʼmo apayate alinika aika atagi nekeka ha le yategamo apategane. Sataniʼa yagaino neʼapateya kegiʼyafatiʼmo apayate alika apavalelikeka Gotiʼa neʼyagaiya kegiʼyafiʼmo apategane, huno naha paiʼniye, huno ha paiʼniye.

Poloʼa aliʼyaʼmo aliʼniya kavafeʼmo huʼniya gemae

19-20 # Aiy 35:5; 42:7,16; Mt 3:8; Ef 2:2; Kl 1:13; Ap 20:32 Poloʼa hunoʼaeʼmo, Ala kini vekamo Agalipao, huno, ani kokuʼnapati huʼniya gemo amagiʼna oʼataleʼna uʼna Namasakasi taonifinagi Yulusalemu taonifinagi muki Yutiya kotegagi huʼna uʼna Yu vayaʼaifeʼmo ani gemo aeʼna hakalo huʼna hapa paiteʼna uʼna alu nofi vayaʼaifeʼmo aeʼna hakalo huʼna hapa paiʼnove. Nagaemo huʼnaeʼmo, lapaipamo alitapa afe letetapa aitapa atagi netapa Gotitega etetapa muki vayaʼmo alita apave lisayafeʼmo apaipamo aliʼa afe nelaya vayaʼmogi nehaya agufa alagepa kavaʼmo hiyo, huʼna hapa paiʼnove. 21#Ap 21:30-31Ani gemo huʼnovaʼmofeʼmo alopa mono nopiʼmo maiʼnogeʼapaeʼmo Yu vayaʼmogimo natafauteʼa falisuvafeʼmo namagiʼnae. 22Gotiʼa alagepa huno naha maeme naha maeme eʼnigeʼna apaki haneʼniya vayaʼe apaki ohaneʼniya vayaʼefeʼmo aeʼna hakalo huʼna hapa paiʼna maiʼnove. Gotitegati gemo alini eʼa aeʼa hakalo huʼa hapa nepaiya vayaʼmogiʼe Moseseʼeʼmo huʼapaeʼmo, ani kavaʼmo afole aigiye, huʼa hapa paiʼnaya agufa geʼageʼmo huʼna hapa paime hapa paime eʼna maiʼnove. 23#Lu 24:44-47; 1 Ko 15:20Apakaemo huʼapaeʼmo, Kalaisi vekamo Gotiʼa lekana paino ateʼniya vekamo agafu kisigeno faliteno kanolufatiʼmo hogoteno he tigiye. Agaemo he tino Gotiʼa hapa maesiya ha le yafeʼmo Yu vayaʼe alu kotega vayaʼefeʼmo aeno hakalo huno hapa paigiye, huʼa hapa paiʼnae, huno hapa paiʼniye.

24Poloʼa agaiʼamo gemo huno ha maesiyafeʼmo ani gemo nehigenoʼaeʼmo Fesitasiʼa Polofeʼmo hunoʼaeʼmo, kagaemo negi neʼmalane. Asole afinaʼmo mukufiʼmo lekana nepainaʼmofeʼmo kagesamo alino hosu huno kateʼnigekaeʼmo negi nagi gemo nehane, huno ha paiʼnigenoʼaeʼmo, 25Ala vekamo Fesitasiyo, huno, Nagaemo negimo noʼmalove. Hapa nepauva gemo negi gemo nosufa nagesamo haneʼnigeʼna alagi lama gemo nehuve. 26#Yo 18:20Ala kini vekamoʼmo ani kavafeʼmo ava gemo ago afiʼniyaʼmofeʼmo koli osuʼna aeʼna hakalo huʼna ha nepauve. Ago afole yategamo afole aiʼniyaʼmofeʼmo ago afiʼnovana ani kavafeʼmo ava gemo ago afiʼniye. 27Ala kini vekamo Agalipao, huno, Gotitegati gemo alini eʼa aeʼa hakalo huʼa hapa nepaiya vayaʼmogi geʼapieʼmo kagesamo afika fatago nehapiye. Ago kageʼnovana kagesamo afika fatago nehane, huno ha paiʼnigeno 28Agalipaʼa hunoʼaeʼmo, aise afinaʼmo Kalisitini vekamo hamalesuvafeʼmo nagesamo alika naha nepaine, huno ha paiʼnigenoʼaeʼmo, 29he, aise afinaʼmo hemenimo kagaeʼe muki geʼnimo neʼafiya vayaʼeʼmo nagaekana hutapa hamalesayafeʼmo Gotifeʼmo nunumuʼmo nehuve. Nagaekana hutapa maisayafeʼmo nahauʼniyaʼmonanafa nagaekana hutapa seli nofiteʼmo maisayafeʼmo oʼnahaiye, huno ha paiʼniye. 30-31#Ap 23:29; 25:25Huno ha paiʼnigeʼapaeʼmo ala kini vekaʼapimo Agalipaʼagi yagaino neʼapateya vekamo Fesitasiʼagi Menisiʼagi muki vayanagi huʼa he tiʼa kumategamo uʼa lamiʼa apakaiʼapi apakaiʼapimo ge huʼapaeʼmo, Ani vekamo kalavusi agufa kava huno oʼmaiʼniye, huʼa huʼnae. 32#Ap 25:11Agalipaʼa Fesitasifeʼmo hunoʼaeʼmo, Agaemo hogote ala vekamo Sisaʼa agoti huno nategaiye, huno osuʼniyesinana kalavusifatiʼmo afaʼa hatu maeta atesunageno viyesine, huno ha paiʼniye.

Currently Selected:

Apa 26: kyg2013

Highlight

Copy