PHILIPPIANS 1
1
K'é ha'níinii
1Paul áádóó Timothy, Jesus Christ yá naal'a'í niidlíinii, Christ Jesus dayoodlą́ągo Diyin God bidiyį́į́' danilíinii Fílipaigi#1:1 Gríis kéyah náhokǫsjígo Masedóniya hoolyéedi kin haal'á Fílipai hoolyéé nít'éé'. Áadi Paul ts'ídá áłtsé nahasne'ígíí yíníłta'. Acts 16:12. kéédahat'íinii t'áá ałtso, da'oodlání yá naazíinii índa da'oodlání yaa ádahalyáanii t'áá óóltą'go bich'į' naaltsoos íilnééh:
2Diyin God nihiTaa' áádóó Bóhólníihii Jesus Christ bibee ajooba' índa bibee ach'į' hózhǫ́ náhásdlį́į'ii yee nihik'ijidlíi doo.
Paul éí Fílipaigi oodlání danilíinii yá sodilzin
3T'áá nihénínáshnih bik'eh shiDiyin God bich'į' ahééh nisin. 4T'áá áłahjį' t'áá nihá sodiszin bik'eh shił hózhǫ́ǫgo t'áá ánółtso nihá ná'ooshkąąh. 5Ts'ídá áłtséedi hane' yá'át'éehii deisoohdląąd yę́ędóó díí jį́į́góó bee ahił daniidlínígíí baa ahééh nisin. 6Díí t'áá íiyisí shił bééhózin: Diyin God naanish yá'át'éehii nihiyi' yaa nídiidzáhígíí éí náásgóó nihinaalnishgo Jesus Christ nádzá bijį́įjį' ałtso ła'yidoolííł. 7T'áá ánółtso shijéí bee ayóó'ánihíínísh'níigo bąą kót'éego nihaa nitséskees dooígíí shá bohónéedzą́, háálá awáalyaaí nishłį́įgo, doodaii' doo awáalyaaí nishłį́į da nidi, hane' yá'át'éehii bich'ą́ą́h yáshti'go índa bohoníłdzilgo áshłéhígíí shá ashja'ósingo, Diyin God yee shaa joozba'ígíí t'áá ánółtso shił ałts'ą́ą́' da'nołk'iiz. 8Jesus Christ bibee ayóó'ó'ó'níinii bee t'áá ánółtso ayóó át'éego nihídin nishłį́įgo Diyin God shá bił bééhózin. 9Díí bíká sodiszin: ił ééhózin índa ts'ídá át'éegi ak'i'diitįįh, éí nihe'ayóó'ó'ó'ni' t'áá bił lą'ígo nihee dahólǫ́ǫ doo. 10Áko yá'ádaat'éehii nihił béédahózingo bee lą́ nida'ayohłeeh doo. Índa Christ nádzá beiníłką́ąjį' yá'át'éehgo nitsídaahkeesgo t'áadoo bee nihik'ídahót'ahí da doo. 11Áádóó Jesus Christ bee ts'ídá t'áá ákogi é'ét'é bineest'ą' nihee nídahoodleeł doo biniyé nihá bíká sodiszin, áko éí bee Diyin God ayóó ájít'éhígíí bééhodoozįįł, índa bee haa ha'niih doo.
Hinishnánígíí éí Christ át'é
12Shik'isóó, shich'į' áhóót'įįdígíí éí hane' yá'át'éehii hózhǫ́ náás kwíidoolííł biniyé shich'į' áhóót'įįdgo nihił béédahózin doo nihósh'ní. 13Christ biniinaa awáalyaaí nishłínígíí#Acts 28:30. éí aláahgo naat'áanii bisiláo aa ádahalyáanii t'áá ałtso áádóó diné t'áá ałtsogóó bił béédahoozin. 14Awáalyaaí nishłínígíí bąą Christ bee ałk'isóó dajílínígíí k'asdą́ą́' t'áá ádzíłtso ałdó' Bóhólníihii bee dahadziilgo ádaho'diilyaa, áko t'áadoo bik'ee hoł daayé'í, índa t'ah náábíláahgo doo dadzisti'góó Diyin God bizaad bee yádajiłti' dadzizlį́į́'.
15Ákondi ła' da'oołch'į́įdgo áádóó saad ídei'áahgo Christ yaa dahalne', nidi ła' éí yá'át'éehgo nitsáhákees bee yaa dahalne'. 16Saad dahółǫ́ǫgo ach'ą́ą́h nidaa'na'go Christ yaa dahalne'ígíí éí t'óó ádaat'į́įgo ádaaní; awáalyaaí nishłį́įgo díí bee hóda'iits'ih dashó'níigo ádaat'į́. 17Nidi yá'át'éehgo nitsídaakeesígíí éí ayóó'ádashó'níigo Christ yaa dahalne', háálá awáalyaa sédáago hane' yá'át'éehii bich'ą́ą́h yáshti' doo biniyé nishi'deeltį́įgo hoł béédahózin. 18Ákoshą' hait'ée doo? Háni'diínee', t'áá azlį́'ígi át'éego baa nijikai, t'óó ádajit'į́įgoda, éí doodaii' t'áá aaníí ádajit'į́įgoda, Christ baa dahojilne'ígíí éí bąą shił hózhǫ́. Áádóó t'áá aaníí bąą shił hózhǫ́ǫ doo.
19Háálá shá sodadołzingo áádóó Jesus Christ biNíłch'i Diyinii shíká adoolwołgo shéédidoochiłgo shił bééhózin. 20Ts'ídá doo t'óó shaa yáhodoosįįł daígíí t'áá awołí bee bíká shił chohoo'į́įgo neíníshłí, nidi ts'ídá t'áadoosti'ee k'ad hinishná índa t'áá át'é yę́ęgi át'éego hinishnáá léi', doodago éí dasétsą́ą́ léi', t'áá sézį́į́ nít'éé' shee Christ baa ha'niih doo. 21Háálá hinishnánígíí éí Christ át'é, áádóó dasétsánígíí éí a'ídeeł át'é. 22Nidi t'áá hinishnáago éí naanish yá'ádaat'éehii lą'ígóó ła'náádadeeshdliił, áko nidideesh'áłígíí éí doo shił bééhózin da. 23Háálá díí naakigo haz'ánígíí t'áá íiyisí baa nitséskees. Dashdooya'go Christ bił hojílǫ́ǫ laanaa nisin, háálá áájí íiyisí yá'át'ééh. 24Ákondi t'áá hinishnáago éí aají t'ah aláhídi át'éego nihá bohónéedzą́. 25Díí t'áá íiyisí shił bééhoozin, éí t'áá hinishnáa doo, áádóó t'áá ánółtso nihił honishłǫ́ǫgo nihe'oodlą' danéeséeh doo, áko éí bąą nihił dahózhǫ́ǫ doo. 26Áko nihaa nánísdzáago shinahjį' t'ah biláhígo Christ Jesus baa dadzíínóhłíi dooleeł.
27Áyąądą́ą́' Christ baa hane' yá'át'éehii nizhónígo bik'eh deínóhkáah le', áko nihaa níyáago, éí doodaii' doo aadi naasháa da nidi, t'áá aheełt'éego danołdzilgo nidasoozį́įgo áádóó t'ááłá'í nitsáhákees bee hane' yá'át'éehii deinohdlánígíí bee ahąąh deínółdzíiłgo nihaa náhodiists'į́įh doo. 28Nihits'ą́ą́jí danilíinii ts'ídá t'áadoo bik'ee nihił daayé'í. Jó, éí áhodidooldįįłígíí bee hwéédahózinii át'é, nidi nihíjí t'éiyá yisdánihidi'doo'niłígíí Diyin God bits'ą́ą́dę́ę́' bee nihééhózinii át'é! 29Háálá doo t'óó Christ deidoohdląął t'éí biniyé nihik'idahodzisdli' da, nidi Christ bá ti'dahwiidoohnih ałdó' biniyé nihik'idahodzisdli'. 30Áko hane' yá'át'éehii yits'ą́ą́jí danilíinii t'áá shizááká bich'į' naasdzilgo dashoołtsą́#Acts 16:19-40. áádóó k'ad shaa dahodoohts'a'ígi át'éego nihí ałdó' t'áá nihizááká nidaałdzil.
Currently Selected:
PHILIPPIANS 1: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
