EPHESIANS 6
6
A'áłchíní índa da'ashchíinii
1Áłchíní danohłíinii, Bóhólníihii binahjį' danihishchíinii bik'eh dahonoł'į́, háálá éí ts'ídá t'áá ákogi é'él'íinii át'é.#Col. 3:20. 2Nizhé'é índa nimá nił nilį́įgo íínísin; díí bee haz'áanii alą́ąjį' bee nihoot'áanii bił niilyáii át'é, 3áko nił yá'áhoot'éeh doo, índa nízaadgóó ni' bikáa'gi hinínáa doo.#Ex. 20:12; Deut. 5:16. 4Azhé'é danohłíinii, t'áadoo niha'áłchíní bánídahołchįįhí,#Col. 3:21. nidi t'áá hashkée nidanohtin, índa hazhó'ó nidanohtin, éí Bóhólníihii bina'nitinígíí bee niha'áłchíní danohsé.
Naalte' danilíinii índa naat'áanii danilíinii
5Naalte' danohłíinii, nihokáa'gi nihinanit'a'í nihił danilį́į le'; yéé' nihitah dahodíłtłidgo Christ bik'eh dahonoł'ínígi át'éego nihijéí t'áá át'é bee nihinanit'a'í bik'eh dahonoł'į́. 6Nihinanit'a'í binááł t'óó diné bił hólzhǫ́ t'éí biniyé ádaaht'į́įgo éí dooda, nidi Christ yá naalte' danohłį́įgo nihijéí tł'ááhdę́ę́' Diyin God íinízinii bida'oł'į́. 7Bóhólníihii bá nidaał'a'ígi át'éego bídanohdlį́įgo nihinanit'a'í bá nidaałnish, diné bá na'anishígi át'éego éí dooda. 8Háálá nihił béédahózin, t'áá háiida naalte' jílį́įgo, doodaii' doo naalte' jílį́į da nidi, yá'át'éehgo ájooníłígíí t'áá éí bik'ehgo Bóhólníihii hach'į' ninádi'yoodlééł.#Col. 3:22-25. 9Naat'áanii danohłíinii, nihinaalte' bich'į' haasdzí'ígi át'éego nihí ałdó' t'áá ákódaaht'į́; nihíkáiish'ááł t'áadoo dabidohníní. Nihił béédahózingo, biBóhólníihii, t'áá éí ałdó' nihiBóhólníihii, éí yá'ąąshdi hólǫ́,#Col. 4:1. áádóó diné doo ła' ał'ohgo yaa nitsíkees da.#Deut. 10:17; Col. 3:25.
Níłch'i bida'iiníziinii binanit'a'í bich'į' na'abaahii
10Shik'isóó danohłíinii, díí bee hanáánásdziihgo bee ninisht'ééh, Bóhólníihii bee áádóó yee ayóó ábóodziilii bee danihidziil le'. 11Béésh éé' bee na'abaahii Diyin God nihaidiní'ánígíí t'áá át'é bee hadadohne', áko níłch'i bida'iiníziinii binanit'a'í binahagiz bik'ijį' bídanooł'ą́ągo nidasoozį́į doo. 12Háálá bitsį' áádóó bidił dahólóonii doo bił da'ahiigą́ą da, nidi doo daat'į́į́góó aláahdi bídahólníihii, áádóó dabidziilii, áádóó díí k'ad nahasdzáán bikáa'gi chahałheeł bee bídahólníihii, índa níłch'i bida'iiníziinii t'áadoo bee néelą́'ígóó yádiłhił biyi' nahaz'ą́ądi dahólóonii bił da'ahiigą́. 13Ákót'é bąą béésh éé' bee na'abaahii Diyin God nihaidiní'ánígíí t'áá át'é bee hadadohne'go tsi'ooldahgo bił yoołkáłígíí bich'į' nidaałdzilgo bídanooł'ą́ą doo, índa ałtso bik'eh dasidoohdlį́į́'dóó bik'ijį' nidi wołí bee nidasoozį́į doo. 14Éí bąą t'áá aaníinii bee áká dasoołzaazgo,#Is. 11:5. áádóó ts'ídá t'áá ákogi é'ét'é béésh éé' nihijéíts'iin bąąh nidasooł'ą́ągo nidasoozį́,#Is. 59:17. 15áádóó hane' yá'át'éehii bee k'é hwiindzinii baa ch'ídahoyoh'aah doo biniyé bee hasht'e'ádadíínółzingo bee kééh dadíínół'eez.#Is. 52:7. 16Nihe'oodlą' nihinaage' ádeínóhsingo bine' nidaohdzi', áko naayéé' níłch'i bida'iiníziinii binanit'a'í bideezla' diltłi'ii t'áá ałtso bits'ą́ą́' dadínóołtsis. 17Áádóó béésh ch'ah bee yisdá'iildéehii#Is. 59:17. índa Níłch'i Diyinii bidiltłish nídahidoohnííł, jó, Diyin God bizaad éí diltłish át'é. 18T'áá áłahjį' Níłch'i Diyinii bee sodadołzin índa nída'oohkąąh. Díí biniyé t'áadoo ádahodoołzéhí hada'ísídół'į́į́', wołí bee Diyin God bidiyį́į́' t'áá ałtso sodizin bee bá nída'oohkąąh. 19Shí ałdó' shá sodadołzin, áko hane' yá'át'éehii doo bééhózin da yę́ę saad bohónéedzáanii shaa deet'ą́ągo t'áadoo shizéé' nahonitł'aaí doo sisti'góó bee yáshti' doo. 20Háálá éí biniyé yil'aadii béésh da'ahólzha'í bee dahaastł'óonii nishłį́, áko doo sisti'góó hane' yá'át'éehii t'áá baa hashne' dooleełígi át'éego baa hashne' doogo shá sodadołzin.
K'é ha'níigo bee naaltsoos niilt'i'ii
21K'ad ánísht'éii áádóó baa naasháhígíí nihił béédahodoozįįł biniyé Tíkakas,#Acts 20:4; 2Tim. 4:12. nihik'is ayóó'óó'níinii índa ba'ahódlíigo Bóhólníihii yá naal'a'ígíí t'áá ałtso yee nihił hodoolnih. 22Ts'ídá díí biniyé nihich'į' ahóół'a', éí kodi nihił áhoot'éii nihił béédahodoozįįł, áádóó aají nihijéí bił nídahozhdooshǫǫł ałdó' biniyé akǫ́ǫ́ ahóół'a'.#Col. 4:7,8.
23Diyin God aTaa' áádóó Bóhólníihii Jesus Christ bibee ach'į' hózhǫ́ náhásdlį́į'ii áádóó bibee ayóó'ó'ó'níinii oodlą́ bóóltą'go ałk'isóó danilíinii yee bik'ijidlíi doo. 24Ayóó'ó'ó'ní t'áá yit'éhí yit'éii bee nihiBóhólníihii Jesus Christ ayóó'ádayó'nínígíí t'áá ałtso Diyin God bibee ajooba' yee yik'ijidlíi doo.
Currently Selected:
EPHESIANS 6: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
