NUMBERS 25

Ízrel dine'é éí Béíyal-píyor yich'į' dahodeesáá'

1Shíttimgi Ízrel dine'é kééhat'į́įgo Mó'ab dine'é bitsi'ké yił ajił yaa nídiikai. 2Mó'ab dine'é bidiyin dabidi'níinii yich'į' nááda'iiłniihjį' Ízrel dine'é hágo deiłníigo índa yił da'ayą́ągo áádóó bidiyin dabidi'níinii yich'į' yaa áńdaat'įįhgo nidahałá. 3Áko Ízrel dine'é éí Béíyal-píyor ida'alyaii yikéé' dah diikai; éí bąą Bóhólníihii éí Ízrel dine'é yich'į' báhóóchįįd. 4Áádóó Bóhólníihii éí Mózes ííłní, Diné bitahdóó hastóí aląąjį' naazíinii t'áá ałtso éí Bóhólníihii binááł shą́ą'jį' dahidiinííł, áko Bóhólníihii t'óó báhádzidgo yee bánáháchįįhígíí Ízrel dine'é bits'ą́ąjį' kónídoo'nííł. 5Áko Mózes éí Ízrel dine'é yá ándahodii'aahii ííłní, Nihidine'é bitahdóó Béíyal-píyor ida'alyaii yikéé' dah dahidiikaígíí t'áá ałtso nidaałtseed.

6Shoo, Ízrel dine'é ła' níyáago Mídiyan dine'é asdzání léi' éí Mózes áádóó Ízrel dine'é dah yinéłígíí t'áá ałtso binááł hak'isóó bitahjį' bił yah ajíí'áázh; jó, Ízrel dine'é éí níbaal bii' dahozdísinii bich'éédą́ą'gi daacha. 7Áko Eliyéízar biye' Fíniyas éí Éran náá'iiłniihii nilį́į́ nít'éé' yę́ę binálí díí yiyiiłtsą́ągo dah oonééłdóó dah diiyáago tsiidétáán néidiitą́. 8Áko Ízrel diné áádóó Mídiyan dine'é asdzání bikéé' níbaal góne' yah ajoolwodgo t'áá áłah bitsą́'nii' góne' yighá'níłgeed. Kódzaago Ízrel dine'é éí naałniih bits'áldoh. 9Áko naałniih dahóóghą́'ígíí naadiin dį́įdi mííl ázhnéelą́ą́'.

10Áádóó Bóhólníihii éí Mózes ííłní, 11Eliyéízar biye' Fíniyas éí Éran náá'iiłniihii nilį́į́ nít'éé' yę́ę binálí Ízrel dine'é baa łe'nisinígi át'éego łe'nízingo sháhóóchįįdígíí Ízrel dine'é yits'ą́ąjį' kóyiilaa, áko baa łe'nisingo ábi'niiłdįįdígíí t'áadoo atíshłaa da. 12Éí bąą shá kódidííniił, Jó, hózhǫ́ǫ́jí bee aha'deet'ą́ baa diní'ą́. 13Áko bí doo, índa ba'áłchíní náás ahoolchííłgóó ałdó' daabí doo; nááda'iiłniihii bibee aha'deet'áanii hool'áágóó daabí doo, háálá biDiyin God yá łe'nízingo Ízrel dine'é yá k'ééhásdǫǫd.

14Ízrel dinéhígíí éí Mídiyan dine'é asdzání nilíinii bił naho'diztseed yę́ę éí Zímrai joolyéego éí Símiyan dine'é bizhé'é yę́ę bits'ą́ą́dóó náás ahoolchíiłii Séílu aląąjį' sizíinii biye' jílį́į́ nít'éé'. 15Índa Mídiyan dine'é asdzání bi'diisyínígíí éí Kázbai wolyéego éí Mídiyan dine'é bizhé'é yę́ę bits'ą́ą́dóó náás ahoolchíiłii ła' Zer aląąjį' sizíinii yitsi' nilį́į́ nít'éé'.

16Áádóó Bóhólníihii éí Mózes ííłní, 17Mídiyan dine'é bich'į' nidahoyołnáago nidaałtseed, 18háálá bindahagiz yee nihich'į' nidahwiiłnáá nít'éé'; éí Píyor bich'į' nahadláhígíí índa Mídiyan dine'é bilah Kázbai wolyéii biniinaa nihida'deezlo'; éí Mídiyan dine'é yá aląąjį' sizíinii yitsi' nilį́į́ nít'éé'; Píyor bich'į' nahadláii biniinaa naałniih níłnii' bijį́į́dą́ą́' bi'diisyį́.

Currently Selected:

NUMBERS 25: NVJOB

Highlight

Copy

Want to have your highlights saved across all your devices? Sign up or sign in

Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).

Learn More About Navajo Bible