NUMBERS 24
24
1Áko Béílam éí Bóhólníihii bił hózhǫ́ǫgo Ízrel dine'é yik'iizhdoodliiłígíí yaa ákoniizį́į́'; átséédą́ą́' biniyé ałnáájídáhígíí álíleego bee ééhózingo bee nahadláii t'áadoo bíkajiyáa da, nidi t'óó honoojíijigo jidéé'į́į́'. 2Nít'éé' Béílam hajííghalgo Ízrel bidine'é danilínígíí bik' ehgo dabiníbaal yii' dabighango dziiłtsą́, áko Diyin God biNíłch'i hak'i hoole'. 3Áádóó hane' bee ak'idi'dootį́įłii baa ahozhniilne'go ájíní,
Bíyor biye' Béílam kódííniid;
bił ééhózingo oo'íinii ání:
4kóní, Diyin God bizaad yidiizts'ą́ą'ii éí Aláahgo Ayóó'ábóodziilii bił ádzaago yiyiiłtsą́ągo ni'jį' íítłizh, nidi t'áá yiníł'į́:
5Jéíkab dine'é nohłíinii, dooládó' nihiníbaal danizhóní da;
Ízrel dine'é nohłíinii, dooládó' nihighan nizhóní da!
6Téehgi át'éego índa tooh nílį́ bibąąhgóó dáda'ak'ehígi át'éego,
Bóhólníihii éí álooz naazkaadii k'eiidííláigi át'éego,
índa tábąąhgóó gad yíl'áhígi át'éego k'ee'ąą nídeel'á.
7Bida'ásaa' bii'dóó tó wó'ą yííłį́į doo índa t'óó ahayóí tooh danílínígíí bibąąhgóó ba'áłchíní náás ahoolchíiłii kéédahat'į́į doo.
Aláahgo binanit'a'í éí Éígag aláahgo naat'áanii nilíinii yiláahgo ayóó át'ée doo,
índa bibee óhólníihgo bił haz'áanii ts'ídá ayóó át'éego haz'ą́ą doo.
8Diyin God éí Ííjip kéyahdę́ę́' ch'ééhoní'eezh; jó, béégashii ałchinii bidee' báhádzidii há nahalin;
ał'ąą dine'é hwe'ana'í danilíinii ałtso íidoołdįįł,
índa dabits'in niidiyootih,
áádóó bik'aa' yee yigházdiyoołt'oh.
9Náshdóítsoh bitsiijį' ditł'ooígíí ayóó át'éegi át'éego sitį́,
áádóó náshdóítsoh át'éhígi át'éego háishą' nábididoołt'eeł?#Gen. 49:9.
T'áá háiida nik'ijidlíii bik'ihojidlíi doo, índa t'áá háiida hóyée'go ná haadzíi'ii hóyée'go bá ha'doodzih.#Gen. 12:3.
Béílam áhodooníiłii yaa hoolne'
10Áko Béílak éí Béílam yich'į' báhóóchįįdgo bíla' yee ahíideezkadgo Béílam ííłní, Shi'ana'í bidíníídzįįł biniyé níká i'ííł'a'; shoo, díí táadi t'óó bik'ijiisínídliid. 11Éí bąą k'ad nílááh, náálwoł; jó, ayóó át'éego ił nílį́įgo ándeeshłííł nisin nít'éé', nidi ił ídlį́ bits'ą́ąjį' Bóhólníihii t'ą́ą́' ánóhsin nít'éé'. 12Ákohgo Béílam éí Béílak áyidííniid, Shą́ą́', ná hane' nidei'áhí shich'į' ííníł'a' yę́ę kóbidííniid ni'. 13Azhą́ béésh łigaii áádóó óola éí Béílak bikin bii' hadeezbingo sheidee'aah nidi, Bóhólníihii yee haadzíi'ii bilááhgóó t'áá shí shíniik'eh yá'át'éehgi, doodaii' doo yá'át'éehgi ádeeshníłígíí doo bíneesh'ą́ą da; Bóhólníihii yee haadzí'ígíí t'éiyá bee hadeesdzih. 14Jó, k'ad shidine'é bich'į' déyá; hágo, díí bee nił ch'íhonish'aah: beiníłką́ądi díí dine'é éí nidine'é kódeidoolííł. 15Áádóó Béílam éí hane' bee ak'idi'dootį́įłii yaa áho'niilne'go ání,
Bíyor biye' Béílam kódííniid;
bił ééhózingo oo'íinii ání,
16kóní, Diyin God bizaad yidiits'a'ii áádóó Aláahgo Ayóó'át'éii bits'ą́ą́dóó ił ééhózin bił bééhózinii índa Aláahgo Ayóó'ábóodziilii ił ádzaii yiníł'íinii ni'jį' íítłizh, nidi t'áá yiníł'į́:
17Yiideestsééł, nidi k'ad éí dooda; dínéesh'įįł, nidi áyídíjį' éí dooda; Jéíkab dine'é bits'ą́ą́dóó Sǫ' hadoogááł
índa Ízrel dine'é bits'ą́ą́dóó Naat'á Gish hahodooleeł;
éí t'áá ałch'ishjí Mó'ab dine'é atíidoolííł áádóó Sheth dine'é t'áá ałtso iidoołdįįł.
18Íídam dine'é áádóó bikéyah Síyer hoolyéegi hweda'ana'í bíí' dazhdooleeł,
nidi Ízrel dine'é éí ts'ídá doo nídanilyées da doo.
19Jéíkab dine'é bits'ą́ą́dóó bóhólníih dooleełii hahodooleeł;
kin haal'áagi dadzidziihígíí áhodi'dooldįįł.
20Ákohgo Ámalek dine'é yich'į'go náádéét'į́į'go hane' bee ak'idi'dootį́įłii yaa nááhálne'go ání,
Ał'ąą dine'é bitahdóó Ámalek dine'é dajílíinii hó alą́ąjį' ts'ídá bidziilgo dah jookah nít'éé',
nidi nihoolzhíishdi hool'áágóó áhodi'dooldįįł.
21Áádóó Kííni dine'é yich'į'go náádéét'į́į'go hane' bee ak'idi'dootį́įłii yaa nááhálne'go ání,
Kééhót'į́įgi nihoníłdzil ni,
índa tsétáht'ahgi nit'oh dah síní'ą́.
22Ákót'ée nidi Ásher dine'é yisnááh ániilaago adanizlóozjį' Kííni dine'é éí t'áadoo nídoodleełí da.
23Áádóó Béílam éí hane' bee ak'idi'dootį́įłii yaa nááhalne'go ání,
Yíiyáhą́ą Diyin God díí yaa nídiidzáago háísh hináa doo?
24Nidi Kítim tábąąhdę́ę́' tsinaa'eeł nihidoo'ołgo Ásher dine'é áádóó Ííber dine'é yich'į' nahodiyoołnaał,
áko hó ałdó' hool'áágóó áhodi'dooldįįł.
25Ákohgo Béílam nídii'na'go t'áá bí bighangóó anáádzá; Béílak ałdó' dah nídiidzá.
Currently Selected:
NUMBERS 24: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
