Mako 16

Yesu ashukuka ku bafwa

(Mateo 28:1-8; Luka 24:1-12; Yoani 20:1-10)

1Ilyo ubushiku bwe Sabata bwapitile, Maria Mandalena, Maria nyina wakwa Yakobo, na Salome bashitile amafuta ya cena icisuma pakuti baye basube icitumbi cakwa Yesu. 2Kanshi lucelocelofye ubushiku bwakutampa umulungu#16:2 Pa bushiku bwakutampa umulungu: Epa mulungu pa sondo. baya ku nindi ninshi elyofye akasuba katula. 3Balaipushanya abati, “Bushe nani aleya tukunkulushishako icilibwe ukufumya pa mwinshi wa nindi?” 4Nomba bati baloleshe, bamona ukuti icilibwe icali icikalamba nganshi nabacikunkulushapo. 5Cilya baingila mu nindi, bamona umulumendo ekele lubali lwa ku kulyo, afwele no mwingila uwabuuta. Awe batiina nganshi. 6Nao abeba ati, “Mwitiina, mulefwaya Yesu umwina Nasaleti, uo batanike. Ala nabuuka, talimo muno. Moneni apo, epo bamulalike. 7Nomba kabiyeni muye eba abasambi bakwe na Petelo ukuti, namutangilila ku Galile. Eko mukaya mumona nga filya fine amwebele.” 8Awe abanakashi bafuma mu nindi, bafulumuka ulubilo, baletutumafye, nacibapesha amano. Kabili tabaebeleko muntu nelyo umo, ico bali no mwenso.

Yesu amonekela kuli Maria Mandalena

(Mateo 28:9-10; Yoani 20:11-18)

9[Lucelocelo ubushiku bwakutampa umulungu ilyo Yesu abuukile ku bafwa, uo abalilepo ukumonekela ni Maria Mandalena, uo atamfishemo imipashi yakowela cine lubali. 10Nao epakuya shimikilako abo Yesu aleenda nabo abaleloosha no kulila. 11Nomba bena nangu baumfwile kuli Maria Mandalena ukuti Yesu nakabili ali umumi elyo no kumumona namumona, nalyo line tabasumine.

Yesu amonekela ku basambi babili

(Luka 24:13-35)

12Kabili panuma Yesu aisa monekela mu musango umbi ku basambi babili abaleya mu mpanga. 13Awe nabo babwelelamo ku banabo no kuya bashimikilako, lelo nabo bene tababasumine nakalya.

Yesu amonekela ku basole ikumi limo na umo

(Mateo 28:16-20; Luka 24:36-49; Yoani 20:19-23; Imilimo 1:6-8)

14Elyo pakulekelesha aisa monekela ku basole ikumi limo na umo, cilya bali pakulya. Alabebaula pa mulandu wakubulwa icisumino no kumalala kwa mitima yabo, pantu bakeene ukusumina abo abamumwene ilyo abuukile ku bafwa. 15Elyo abeba ati, “Kabiyeni mu fyalo fyonse, mulebila Imbila Nsuma ku bantu bonse. 16Uwasumina no kubatishiwa abatishiwa, akapusuka. Lelo uwakaana ukusumina wena akaba no mulandu. 17Elyo ne fishibilo fyacipeshamano ifyo abansumina bakalacita nifi, bakalatamfya imipashi yakowela pakubomfya ishina lyandi, bakalalanda na mu ndimi ishipya. 18Kabili bakalaikata insoka, elyo nga banwa icakwipaya umuntu tacakalebacita nangu cimo. Bakalatambalikila na maboko yabo pa balwele, nabo bakalapola.”

Yesu asendwa ku mulu

(Luka 24:50-53; Imilimo 1:9-11)

19Nomba ilyo Imfumu Yesu yapwa ukulanda nabo, yasendwa ku mulu eko yaya ikala lubali ku kulyo kwakwa Lesa. 20Elyo abasambi bena basalangana baya balebila mpanga yonse. Imfumu nayo yalebomba nabo, yalekosha na mashiwi yabo ku fishibilo fyacipeshamano balecita.]#16:20 Amashiwi yali mu fipande 16:9-20, muli ba Baibele bamo tamwaba.

Currently Selected:

Mako 16: ILL15

Highlight

Copy