Mako 15

Yesu na Pilato

(Mateo 27:1-2,11-14; Luka 23:1-5; Yoani 18:28-38)

1Cilya bwaca ulucelo, bashimapepo bacindami, pamo na bakalamba, bakafundisha bamafunde na bashicilye#15:1 Bashicilye: Aba e bakalamba balelongana mu cilye cikalamba ca Bayuda ico baleita “Sanhedrin.” bonse, balongene balepandana ifyakucita. Awe bakaka Yesu, bamusenda, bamutwala na kuli Pilato. 2Elyo Pilato amwipusha ati, “Bushe iwe niwe mfumu ya Bayuda?” Yesu amwasuka ati, “Nausosa.” 3Bashimapepo bacindami bena balamwebelela imilandu iyingi. 4Pilato nakabili aipusha Yesu ati, “Bushe tawayasukepo nelyo cimo? Mona imilandu ubwingi balekwebelela iwe!” 5Lelo Yesu tewakwasukapo nelyo cimo. Awe Pilato camupesha amano.

Pilato apingwila Yesu ukufwa

(Mateo 27:15-26; Luka 23:13-25; Yoani 18:39—19:16)

6Nomba cila nshikunkulu ye Pasaka iya Cakucilila, Pilato alebakakwilapo lyonse umufungwa umo uo abantu balefwaya. 7Kanshi kwaliko umuntu umo uo baleita Balaba, uo baposele mu cifungo pamo na babiye ico baipeye abantu ilyo balelwisha ubuteko. 8Elyo ibumba lyaisa kuli Pilato, lyalamulomba ukuti acite ifyo abacitila lyonse. 9Pilato nao abepusha ati, “Bushe mulefwaya ukuti mukakwile imfumu ya Bayuda?” 10Pilato alishibe ukuti ni ku mufimbilafye bashimapepo bacindami bamuletele Yesu. 11Nomba bashimapepo bacindami balasokawila ibumba ukuti lilombe Pilato abakakwile Balaba. 12Pilato kabili abepusha ati, “Nga kanshi nalacita shani noyu mutila ni mfumu ya Bayuda?” 13Nabo balapundafye abati, “Mutanikenifye!” 14Pilato abepusha ati, “Nga kanshi cinshi ico abifya?” Nabo elyo bacishamo ukupunda abati, “Mutanikenifye!” 15Kanshi Pilato ico alefwaya ukusansamusha ibumba, abakakwila Balaba. Abeba no kuma Yesu ifikoti, elyo abalubwila ukuti baye mutanika.

Bafwika Yesu iŋana ya myunga

(Mateo 27:27-31; Yoani 19:2-3)

16Elyo ifita fyatwala Yesu mukati ka lubansa lwa mwisano, fyalonganya ne mpuka yonse iya fita. 17Fyamufwika umwingila wakashika, fyalema iŋana ya myunga, fyamufwika na ku mutwe. 18Elyo fyatendeka ukulamuposha fileti, “Tupole Mulopwe, we mfumu ya Bayuda!” 19Fyalamufupaula ne tete ku mutwe, fyalamusaka amate. Kabili fyalamufukamina pakumutotela. 20Ilyo fyaleka ukumupumya, fyamufuula umwingila wakashika, fyamufwika ne nsalu shakwe. Elyo fyamutwala kunse kukumutanika.

Batanika Yesu

(Mateo 27:32-44; Luka 23:26-43; Yoani 19:17-27)

21Mu nshila bakumanya umuntu alepita ukufuma mu mpanga, Simoni umwina Kurene, wishi wakwa Alekisanda na Rufusi, eo bapatikisha ukumusendelako umusalaba. 22Elyo batwala Yesu ku ncende iyo beta Gologota, emukutila, “Pa cipanga.” 23Elyo bamupeela no mwangashi uo basakenyemo umuti muri,#15:23 Muri: Muti balesakanya no mwangashi, uo balepeela umuntu batanika pakucefyako ukumfwa ubukali. nomba akaana ukunwa. 24#Amalu 22:18Awe elyo bamutanika. Nomba pakwakana ifyakufwala fyakwe pena, balapendula pakumona ico cila muntu alebuulapo. 25Bamutanike cilya akasuba kasansama pa nshita ya 09:00. 26Umulandu walembelwepo uo bamwipailepo wakuti, “Ni Mfumu ya Bayuda.” 27Kabinge batanike pamo nankwe ifipondo fibili, cimo ku kulyo cimbi naco ku kuso. 28#Esaya 53:12Epakufikilisha ifyalembwa mu Malembo Yamushilo ayakuti, “Apendelwe pamo ne fipondo.”

29 # Ukuf 26:31-33 Kanshi abantu abalepitapo balemutuka balekunta ne mitwe balati, “Eya! Tewe waleti, ‘nkabongolole Tempele, elyo nkalikuula mu nshiku shitatu?’ 30Kanshi ipusushe we mwine, ika na pa musalaba!” 31Mu musango umo wine bashimapepo bacindami na bakafundisha bamafunde balalanshanya balemuseka abati, “Alepususha bambi, nomba afilwa ukuipususha umwine! 32Lekeni Kristu Imfumu ya bena Israeli ike pa musalaba uleke tumone, tusumine!” Kabili nabo bene batanikwe nankwe, nabo balamusaalula.

Yesu afwa

(Mateo 27:45-56; Luka 23:44-49; Yoani 19:28-30)

33Cilya akasuba kafikile pakati ka mutwe pa nshita ya 12:00, imfifi yakupile icalo conse, ukufikafye na lilya kasendeme pa nshita ya 15:00. 34Elyo cilya akasuba kasendama pa nshita ya 15:00, Yesu apunda ne shiwi ilikalamba ati, “Eloi, Eloi, lama sabakatani?” Ekutila, “Lesa wandi, Lesa wandi, cinshi wandekelesesha?” 35Elyo abantu bamo abaiminine mupepi ilyo baumfwa, balasosa abati, “Umfweni, aleita Eliya!” 36Elyo umo abutuka, aya tumpika umwepu mu mwangashi uwakantuka, autunga na kwitete, amutambika ukuti anwe. Asosa nokuti, “Pembeleni, lekeni tumone Eliya nga alaisa mwishapo!” 37Elyo Yesu apunda ishiwi ilikalamba aleka no mweo.

38 # Ukuf 26:31-33 Awe icisalu balecinga mwi Tempele calepuka pakati, ukufuma pamulu ukufika na panshi. 39Elyo umukalamba wa fita umwanda umo uwaiminine apalungatene na Yesu, pakumona umusango afwilamo, asosa ati, “Cine cine uyu muntu ni Mwana Lesa.” 40Kwali na banakashi bamo abaiminine akatalamukila baletamba. Pali aba, palipo Maria Mandalena, bambi ni Maria nyina wakwa Yakobo mwaice na Yose, elyo na Salome. 41Aba banakashi ebalekonka Yesu no kumutangata ilyo ali mu Galile. Elyo kwalifye abanakashi abengi abaishile nankwe ku Yerusalemu.

Bashika Yesu

(Mateo 27:57-61; Luka 23:50-56; Yoani 19:38-42)

42Nomba bwali bushiku bwakupekanya, emukutila pa bushiku bwaletangilile Sabata. 43Mu nshita ya cungulo kwaishile Yosefu wa ku Alimateya, shicilye umo uwacindikwe nganshi. Nao wine alelolela ukwisa kwa Bufumu bwakwa Lesa. Aya napama kuli Pilato, aya lomba icitumbi cakwa Yesu. 44Awe Pilato asunguka pakumfwa ukuti Yesu nafwa kale. Elyo aita umukalamba wa fita umwanda umo, alamwipusha nga cacine Yesu nafwa kale. 45Ilyo aumfwa ku mukalamba wa fita umwanda umo ukuti nifyo fine, Pilato asuminisha ukupeela Yosefu icitumbi cakwa Yesu. 46Yosefu nao ashita insalu iyabuuta. Asamuna icitumbi cakwa Yesu, acipomba mu nsalu, acibika mu nindi iyo bafukwile mu cilibwe. Elyo akunkulushishapo ilibwe pa mwinshi wa nindi. 47Maria Mandalena na Maria nyina wakwa Yose balemonako umo balemubika.

Currently Selected:

Mako 15: ILL15

Highlight

Copy