متّی ۲۳
۲۳
عیسی مسیح رهبرأنٚ مذهبی‌یَ گوشزد کونه
۱ او وخت عیسی رو به مردوم و خو شاگردأن بوکوده و بوگفته: ۲ «دینٚ علما و فریسیأن، موسی مسندٚ سر نیشته‌ییدی. ۳ پس اونچی شمرَ گیدی، گوش بوکونید و انجام بدید، ولی اوشأنٚ مأنستن عمل نوکونید، چونکی اونچی‌یَ کی تعلیم دیهیدی، خودشأن بجا نأوریدی. ۴ سنگینٚ بارأنَ مردومٚ دوشٚ سر نیهیدی ولی خودشأن حاضر نی‌ییدی ایتأ جٚه او بارأنٚ حرکت دَئنٚ وأسی حتی خوشأنٚ ایتأ پنجه‌یَ تکان بدید. ۵ هر چی کونیدی، اَنٚ وأسی‌یه کی مردوم اوشأنَ دیندارتر بیدینید؛ خوشأنٚ آیه‌دأنأنَ#۲۳:۵ کیتابٚ موقدّسٚ آیه‌یأنَ نیویشتیدی، چرمٚ کیسه میأنی نهیدی و دٚوٚستیدی خوشأنٚ بازو یا پیشانی‌یَ (تثنیه بابٚ ۶، آیه ۸). پیله‌تر و خوشأنٚ ردا دامنَ پهن‌تر چأکونیدی. ۶ دوس دأریدی کی مهمانی‌یأنٚ میأن بوجور بینیشینید و کنیسه‌یأنٚ میأن بهترین جایَ بدأرید. ۷ و کوچه بازارٚ میأنی مردوم اوشأنَ سلام بیگید و ‹اوستاد› دوخوأنید. ۸ ولی شومأن نوأستی ‹اوستاد› دوخوأده بیبید، چونکی تنها ایتأ اوستاد دأریدی، و شومأن همه‌تأن کس‌کسٚ اَمرأ برأریدی. ۹ هیکسم زیمینٚ سر ‹پئر› دونخوأنید، چونکی تنها ایتأ پئر دأریدی کی آسمانٚ میأن ایسَه.#۲۳:۹ البته منظور اَن نی‌یه کی دِه شیمی پئرَ «پئر» دونخوأنید، بلکی شیمی روحانی رهبرأنَ «پئر» دونخوأنید یا پئر دوخوأدنٚ اَمرأ باعث نیبید کی کسی مغرورَ به، چون اَ لقب فقط خودا رِه شایسته‌یه. ۱۰ و معلّمم نوأستی دوخوأده بیبید، چونکی فقط ایتأ معلّم دأریدی کی مسیحه. ۱۱ اونکی شیمی میأن جٚه همه پیله‌تره، شیمی خدمتکار بِه. ۱۲ چونکی هر کی بخوأیه خورَه پیله‌دأنه نیشأن بده، خوار و ذلیل بِه و اونکی بخوأیه خورَه کوجه‌دأنه نیشأن بده، ارج و قربٚ ویشتری پیدا کونه.
۱۳ «وای بر شومأن، اَی دینٚ علما و فریسیأنٚ ریاکار! شومأن آسمانٚ پادشایی درَ مردومٚ‌ره دَودیدی؛ خودتأن واردَ نیبیدی و ونألید اوشأنی‌یم کی خوأییدی، بیشید بودورون.
۱۴ «وای بر شومأن، اَی دینٚ علما و فریسیأنٚ ریاکار! شومأن جٚه ایطرف وِیوه زنأکأنٚ خانه‌یَ غارت کونیدی و جٚه طرفٚ دیگر تظاهرٚ وأسی شیمی دوعایَ طول و درازه ده‌ییدی. هَنٚ وأسی شیمی مکافات خیلی سختترَ به.
۱۵ «وای بر شومأن، اَی دینٚ علما و فریسیأنٚ ریاکار! شومأن دریا و خوشکی جأ دوأریدی تا اینفر شیمی دینَ قوبیل بوکونه و وختی اَ کارَ بوکودیدی، اونَ دو برابر جٚه خودتأن ویشتر سزاورٚ جهندم چأکونیدی.
۱۶ «وای بر شومأن، اَی رأنمایأنٚ کور کی گیدی: ‹اگه کسی معبدَ قسم بوخوره، ترسی نأره، ولی اگه به طلایی کی معبدٚ دورون نهَه قسم بوخوره، وأستی خو قسمَ وفا بوکونه.› ۱۷ اَی جاهیلأنٚ کور! کویتأ سرتره؟ طلا یا معبدی کی طلایَ تقدیس کونه؟ ۱۸ و بازم گیدی: ‹اگه کسی قوربانگاهَ قسم بوخوره، ترسی نأره، ولی اگه پیشکشی‌یی‌یَ کی اونٚ سر نهَه، قسم بوخوره، وأستی خو قسمَ وفا بوکونه.› ۱۹ اَی کورأن! کویتأ سرتره؟ هدیه، یا قوربانگاهی کی هدیه‌یَ تقدیس کونه؟ ۲۰ کسی کی قوربانگاهَ قسم خوره، ینی هم به قوربانگاه و هم هر چی‌یَ کی اونٚ رو نهَه، قسم بوخورده. ۲۱ و هر کی‌یم کی معبدَ قسم خوره، هم معبدَ و هم خودایی‌یَ کی اونٚ دورون ساکن ایسَه، قسم بوخورده. ۲۲ و هر کی‌یم آسمانَ قسم بوخوره، خودا تختَ و اونی‌یَ کی اونٚ رو نیشته، قسم بوخورده.
۲۳ «وای بر شومأن، اَی دینٚ علما و فریسیأنٚ ریاکار! شومأن نعناع و شیویت و زیره ده‌یکَ فدیدی، ولی احکامٚ مهمتری شریعتٚ دورون بمو کی شومأن اوشأنَ نادیده گیریدی، مثلٚ عیدالت و رحمت و امانت. وأستی هم اَشأنَ بجا بأورده‌بید و هم اوشأنَ خأطرَ ندَه‌بید. ۲۴ اَی رأنمأیأنٚ کور! شومأن پشه‌یَ صافی جأ ردَ کونیدی، امّا شوتورَ فٚوٚریدی!
۲۵ «وای بر شومأن، اَی دینٚ علما و فریسیأنٚ ریاکار! شومأن ظرفأنٚ بیرونَ پاکَ کونیدی، ولی اونٚ دورون حق‌کوشی و ناپرهیزکاری جأ پوره. ۲۶ اَی فریسی کور! اوّل وأستی ظرفأنٚ دورونَ پاکَ کونی کی اونٚ بیرونم پاکَ به.
۲۷ «وای بر شومأن، اَی دینٚ علما و فریسیأنٚ ریاکار! شومأن قبرأنٚ سفیدکاری بوبوسته‌یَ مأنیدی کی اوشأنٚ ظاهیر قشنگ به نظر اَیه، ولی اوشأنٚ دورون پور جٚه مورده‌یأنٚ خاش و نجاستٚ جوراجوره! ۲۸ شومأنم هَطو مردومٚ جُلُو شمرَ دوروستکار نیشأن دیهیدی ولی شیمی باطن پور جٚه ریاکاری و شرارته.
۲۹ «وای بر شومأن، اَی دینٚ علما و فریسیأنٚ ریاکار! شومأن پیغمبرأنٚ رِه مقبره چأکونیدی و دوروستکارأنٚ قبرأنَ آراستَه کونیدی ۳۰ و گیدی: ‹اگه اَمی اجدادٚ زمان بِیسه بیم، هرگز انبیا کوشتنٚ رِه اوشأنٚ اَمرأ همدس نوبوستیمی.› ۳۱ پس شومأن ضدٚ خودتأن شهادت دیهیدی کی کسأنی زأکأن ایسیدی کی پیغمبرأنَ بوکوشتیدی. ۳۲ هسأ کی اَطو بوبوسته، پس بیشید و اونچی‌یَ کی شیمی اجداد شروع بوکودیدی، شومأن کاملَ کونید. ۳۳ اَی لأنتی‌یأن! اَی افعی زأکأن! جهندمٚ دورونی چوطو تأنیدی موجازاتٚ جأ جیویزید؟ ۳۴ هَنٚ وأسی‌یه کی من، پیغمبرأن و حکیمأن و علمایَ شیمی ورجأ اوسه کونم و شومأن بعضی‌یأنَ کوشیدی ویا به صلیب فأکشیدی و بعضی‌یأنَ شیمی کنیسه‌یأنٚ میأن شلاق زنیدی و اَ شهر او شهر دونبألَ کونیدی. ۳۵ هَنٚ وأسی همه‌یٚ عادلأنٚ خون کی زیمینٚ سر فووُسته، جٚه خونٚ هابیلٚ عادل تا زکریا خون کی بِرِخیا زأی بو و اونَ بینٚ معبد و قوربانگاه بوکوشتیدی، شیمی گردن دکفه. ۳۶ آمین شمرَ گم کی همه‌یٚ اَ ایتفاقأن اَ نسلٚ دامنَ گیره.
۳۷ «اَی اورشلیم، اَی اورشلیم، اَی شهری کی پیغمبرأن و رسولأنی‌یَ کی تی ورجأ اوسه کوده بیدی، کوشی و سنگسار کونی! چند بار بخوأستم ایتأ مرغٚ مأنستن کی خو جوجه‌یأنَ خو پر و بالٚ جیر جمَ کونه، تی زأکأنَ هوطویی جمَ کونم، ولی تو نخوأستی. ۳۸ هسأ شیمی خانه شِمره ویران باقی مأنه. ۳۹ وأ بدأنید کی دِه مرَ نیدینیدی تا روزی کی بیگید: ‹موبارکه اونی کی به نامٚ خوداوند اَیه.›#۲۳:۳۹ مزمور ۱۱۸، آیه ۲۶»
Currently Selected:
متّی ۲۳: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
