متّی ۲۲
۲۲
جشنٚ عروسی مٚثٚل
۱ ایوار دِه عیسی مثلأنٚ اَمرأ اوشأنَ بفرمأسته: ۲ «آسمانٚ پادشایی ایتأ شاهَ مأنه کی خو پسرٚ رِه عروسی بیگیفته. ۳ اون خو نوکرأنَ اوسه کوده تا کسأنی‌یَ کی دعوت بوبوسته‌بید، دوخوأنید کی جشنٚ دورون حاضرَ بید، ولی اوشأن نخوأستید کی بأیید. ۴ ایوار دِه نوکرأنَ دیگری اوسه کوده و بوگفته: ‹کسأنی‌یَ کی دعوت بوبوستیدی بیگید هسأ بیساطٚ جشنَ مهیا بوکودم، می گابأن و چاق و چله گوساله‌یأنٚ سرَ وأوم و همه چی آماده ایسه. پس بأیید عروسی.› ۵ ولی اوشأن محل ننَه‌ییدی و بوشوییدی، ایتأ بوشو خو مزرعه میأن و اویتأ خو کارٚ سر. ۶ بقیه‌یم اونٚ نوکرأنَ بیگیفتیدی، اذیت و آزار بوکودیدی و بوکوشتیدی. ۷ شاه وختی بیشنأوسته، اونَ غیظَ گیفته، خو سربازأنَ اوسه کوده و قاتلأنَ بوکوشته و اوشأنٚ شهرَ به آتش فأکشه. ۸ بأزین خو نوکرأنَ بوگفته: ‹جشنٚ عروسی آماده‌یه، ولی کسأنی کی دعوت بوبوسته‌بید لیاقتٚ شرکت کودنَ نأشتیدی. ۹ پس بیشید شهرٚ میدانٚ میأن و هر کی‌یَ بیده‌ییدی، دعوت بوکونید تا بأیه عروسی.› ۱۰ نوکرأن بوشوییدی کوچه‌یأنٚ سر و هر کی‌یَ بیده‌ییدی، چی خُب و چی بد، خوشأنٚ اَمرأ بأوردیدی و عروسی تالار، مهمانأنٚ جأ پورَ بوسته.
۱۱ «وختی کی پادشا بمو مهمانأنَ بیدینه، ایتأ مردأکَ بیده کی لیباسٚ مناسبٚ عروسی دونکوده‌بو. ۱۲ اونَ وَورسه: ‹اَی رِفِق، چوطو بدونٚ لیباسٚ مناسبٚ عروسی بمویی اَیه؟› او مردای جوابی نأشتی. ۱۳ او وخت پادشا خو نوکرأنَ بوگفته: ‹اونٚ دس و پایَ دَو‌دید و بیرون تاریکی میأن تأودید، جایی کی گریه کونیدی و خوشأنٚ دندانأنَ سر به سر سابیدی.› ۱۴ چونکی کسأنی کی دعوت بوبوستیدی زیادیدی ولی اوشأنی کی اینتخاب بوبوستیدی کم ایسیدی.»
سؤال درباره‌یٚ مالیات فدن
۱۵ بأزین فریسیأن بیرون بوشوییدی و کس‌کسٚ اَمرأ مشورت بوکودیدی کی چوطویی تأنیدی عیسایَ خودشٚ گبأنٚ اَمرأ به دام تأودید. ۱۶ اوشأن خوشأنٚ شاگردأنَ و طرفدارأنٚ هیرودیسٚ پادشایَ عیسی ورجأ اوسه کودیدی و بوگفتیدی: «اوستاد، دأنیم کی تو آدمٚ صاف و صادقی ایسی و خودا رأیَ هوطو کی ایسه یاد دیهی و هیکسٚ جأ نترسی چونکی آدمأنٚ ظاهیرَ نیگاه نوکونی. ۱۷ پس تی نظرَ اَمرَ بوگو: آیا قیصرَ#۲۲:۱۷ قیصر، رومٚ امپراطور لقب بو مالیات فدن روایه یا نه؟» ۱۸ عیسی اوشأنٚ حیله‌یَ بفهمسته و بوگفته: «اَی ریاکارأن، چره مرَ ایمتحان کونیدی؟ ۱۹ ایتأ سکه کی شیمی مالیاتَ اونٚ اَمرأ فدیدی، مرَ نیشأن بدید.» اوشأن ایتأ سکه‌یٚ یک دیناری عیسایَ فدَه‌ییدی. ۲۰ عیسی اوشأنَ وَورسه: «نقش و نامی کی اَ سکه رو نهَه، کی‌شینه؟» ۲۱ جواب بدَه‌ییدی: «قیصرٚ شین.» بفرمأسته: «اونچی کی قیصرٚ شینه قیصرَ فدید و اونچی کی خودا شینه خودایَ فدید.» ۲۲ وختی عیسی گبأنَ بیشتأوستیدی، تعجب بوکودیدی و اونَ بنَه‌ییدی و بوشوییدی.
ایزدواج و قیامت
۲۳ هو روزٚ میأنی صَدّوقیأن کی مورده‌یأنٚ دوواره زندَه بوستنَ اینکار کونیدی، عیسی ورجأ بموییدی و اونَ وَورسه‌ییدی: ۲۴ «اوستاد، موسی اَمرَ بفرمأسته کی اگه ایتأ مردای بی‌اولاد بیمیره، اونٚ برأر وأستی خو بمرده برأرٚ زنٚ اَمرأ عروسی بوکونه، کی خو برأرٚ رِه نسلی باقی بنه#۲۲:۲۴ تثنیه بابٚ ۲۵ آیه ۵. ۲۵ اَمی میأن هفت‌تأ برأر ایسَه‌بید، اوّلی برأر عروسی بوکوده و چون تا وختٚ مردن زأکی نأشتی، خو وِیوه بوبوسته زنأکَ خو برأرٚ رِه باقی بنَه. ۲۶ هَطویم دوّمی و سوّمی تا هفتمی برأر. ۲۷ آخرٚ سر او زنأکم بمرده. ۲۸ هسأ بوگو بیدینیم، روزٚ قیامتٚ میأن، او زنای کویتأ جٚه او هفت‌تأ برأرٚ زن به حیساب اَیه، چونکی همه‌تأن اونٚ اَمرأ عروسی بوکوده‌بید؟»
۲۹ عیسی اوشأنَ بفرمأسته: «شومأن گومراه‌ییدی، چونکی نه خودا کلامَ خُب شنأسیدی و نه خودا قودرتَ! ۳۰ قیامت روزٚ رِه نه زن بریدی و نه مردَ بیدی، بلکی همه‌تأن آسمانٚ فرشته‌یأنٚ مأنستن بیدی. ۳۱ ولی در موردٚ قیامتٚ مورده‌یأن، مگر نخوأندیدی کی خودا شمرَ چی بوگفته؟ ۳۲ اون بفرمأسته: ‹منم خودایٚ ایبراهیم و خودایٚ ایسحاق و خودایٚ یعقوب.›#۲۲:۳۲ خروج بابٚ ۳ آیه ۶ اون خودایٚ مورده‌یأن نی‌یه، بلکی خودایٚ زنده‌یأنه.» ۳۳ مردومأن وختی عیسی گبأنَ بیشتأوستیدی، اونٚ تعلیمٚ جأ قاقَ بوستیدی.
پیله‌ترین حوکم
۳۴ وختی فریسیأن بیشتأوستیدی کی چوطویی عیسی خو جوابٚ اَمرأ صَدّوقیأنٚ دَهنَ دٚوٚسته، ایتأ جا جمَ بوستیدی. ۳۵ ایتأ جٚه اوشأن کی معلّمٚ شریعت بو، اَ منظورٚ اَمرأ کی عیسایَ به دام تأوده، اونَ وَورسه: ۳۶ «اَی اوستاد، پیله‌ترین حکمٚ شریعت کویتأیه؟» ۳۷ عیسی جواب بده: «‹خوداوند، تی خودایَ تومامی‌یٚ تی دیل و تومامی‌یٚ تی جان و تومامی‌یٚ تی فیکرٚ اَمرأ موحبت بوکون.›#۲۲:۳۷ تثنیه بابٚ ۶ آیه ۵ ۳۸ اَن اوّلی و پیله‌ترین حکمه. ۳۹ دوّمی حکمم، اوّلی حکمٚ مأنستن، مهمه: ‹تی همساده‌یَ تی جانٚ مأنستن موحبت بوکون.›#۲۲:۳۹ لاویأن بابٚ ۱۹ آیه ۱۸ ۴۰ تومامی‌یٚ موسی شریعت و پیغمبرأنٚ نیوشته‌یأن اَ دوتأ حکمٚ جأ بمو.»
مسیح کی پسر ایسه؟
۴۱ هو وختی کی فریسیأن دورٚ هم جمَ بوسته‌بید، عیسی اوشأنَ وَورسه: ۴۲ «شیمی نظر در موردٚ مسیح چیسه؟ اون کی پسر ایسه؟» جواب بدَه‌ییدی: «داوودٚ پسر.» ۴۳ عیسی بوگفته: «پس چوطو داوود، روح‌القدس الهامٚ مره اونَ ‹خوداوند› دوخوأده؟ چونکی داوود گه:
۴۴ «‹خوداوند، می خوداوندَ بوگفته:
«می راسٚ دس بینیشین
تا تی دوشمنأنَ تی پا جیر تأودٚم.»›#۲۲:۴۴ مزمور ۱۱۰ آیه ۱
۴۵ «اگه داوود اونَ ‹خوداوند› دوخوأنه، اون چوطو تأنه داوودٚ پسر ببه؟» ۴۶ هَنٚ وأسی هیکس نتأنستی اونٚ جوابَ بده و بعدٚ او روز دِه هیکس جرأت نوکوده عیسی جأ اَ جور سؤالأن وَورسه.
Currently Selected:
متّی ۲۲: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media