متّی ۲۱
۲۱
عیسی مسیحٚ ورودٚ شاهانه به اورشلیم
۱ وختی عیسی خو شاگردأن اَمرأ اورشلیمٚ نزدیکَ بوستَن دوبو، فأرسهییدی بیتفاجی دیهات کی کوهٚ زیتونٚ دامنه میأن نهَهبو و دوتأ جٚه اوشأنَ اوسه کوده ۲ و اوشأنَ بفرمأسته: «بیشید او دیهاتی کی شیمی جُلُو نهَه. هَطو تأ وارد بیدی، ایتأ دٚوٚسته اولاغ خودشٚ کُرّه اَمرأ دینیدی. اوشأنَ وازَ کونید، می ورجأ بأورید. ۳ اگه کسی شمرَ حرفی بزه، بیگید: ‹خوداوند اَشأنَ احتیاج دأره› و اون فوری شمرَ ایجازه دهه.» ۴ اَ ماجرا ایتفاق دکفته تا اونچی کی نبی زبانٚ جأ بوگفته بوبوستهبو حقیقت پیدا کوده کی:
۵ «صهیونٚ دُخترَ #۲۱:۵ «صهیونٚ دُختر» ایتأ اصطلاحه کی اورشلیمٚ شهرٚ وأسی به کار شه. بیگید،
‹بیدین، تی پادشا
فروتنی اَمرأ تی ورجأ اَمون دره،
اولاغٚ سر نیشته،
کُرّه اولاغٚ سر.›»#۲۱:۵ زکریا بابٚ ۹، آیه ۹
۶ او دوتأ شاگرد بوشوییدی و عیسی فرمانَ عمل بوکودیدی. ۷ اوشأن اولاغ و کرّه اولاغَ بأوردیدی و خوشأنٚ ردایأنَ اوشأنٚ سر تأودَهییدی و عیسی سوارَ بوسته. ۸ مردومأنٚ زیادییم خوشأنٚ لیباسأنَ رأ سر وأشأدیدی و بعضییأنم درختأنٚ شاخهیأنَ وأوِهییدی و رأ سر بنَهییدی. ۹ مردومأنی کی جُلُو جُلُو شوییدی و کسأنییم کی اونٚ دونبألسر اَمون دیبید، فریاد زنأن گفتیدی:
«هوشیعانا بر داوودٚ پسر!
موبارکه اونی کی به نامٚ خوداوند اَیه!#۲۱:۹ مزمور ۱۱۸ آیه ۲۶
هوشیعانا در بوجورترین آسمانأن!»
۱۰ وختی عیسی بوشو اورشلیمٚ دورون، او شهرٚ مردومأن ذوق و شوقٚ اَمرأ وَورسهییدی: «اَ شخص کی ایسه؟» ۱۱ و جماعتی کی عیسی اَمرأ اَمون دیبید جواب دهییدی: «عیسایٚ پیغمبره کی ناصرهیٚ جلیلٚ شینه!»
عیسی معبدٚ میأنی
۱۲ بأزین عیسی معبدٚ صحنٚ دورون بوشو و کسأنییَ کی اویه خرید و فوروش کودَن دیبید، بیرونَ کوده و صرافأنٚ تختأن و کبوتر فروشأنٚ بیساطأنَ فوگُردأنه ۱۳ و اوشأنَ بفرمأسته: «خودا کلامٚ میأن بینیویشته بوبوسته کی ‹می خانه، خانهیٚ دوعا دوخوأده به›#۲۱:۱۳ اِشعیا بابٚ ۵۶ آیه ۷ ولی شومأن اونَ دوزدأنٚ لانه چأکودیدی.»#۲۱:۱۳ اِرمیا بابٚ ۷، آیه ۱۱
۱۴ معبدٚ میأن، کورأن و شلأن عیسی ورجأ بموییدی و اون، اوشأنَ شفا بدَه. ۱۵ امّا وختی سرأنٚ کاهنأن و دینٚ علما اونٚ عجیبٚ کارأنَ بیدهییدی و هَطویم بیدهییدی کی کوجه زأکأنم معبدٚ صحنٚ میأنی فریاد زنیدی: «هوشیعانا، بر داوودٚ پسر»، اوشأنَ غیظَ گیفته ۱۶ و عیسایَ بوگفتیدی: «ایشنَوی اَشأن چی گیدی؟» جواب بدَه: «بله. مگر نخوأندیدی کی:
‹کوجه زأکأن و شیرخوارهیأنٚ زبانٚ اَمرأ
شتایشَ مهیا بوکودی›؟»#۲۱:۱۶ مزمور ۸ آیه ۲
۱۷ او وخت عیسی اوشأنَ ترکَ کوده و او شهرٚ جأ بوشو بیتعَنْیا و شبم اویه بِیسه.
اَنجیل درختٚ خوشکَ بوستن
۱۸ صُبٚ دم عیسی وأگردستَن دوبو اورشلیم کی رأ میأنی اونَ ویشتأ کوده. ۱۹ رأ کناره، ایتأ اَنجیل درختَ بیده و بوشو اونٚ طرف، امّا جز ولگ چیزی اونٚ شاخهیأنٚ سر نیده. پس وأگردسته درختَ بوگفته: «خوأیم تو دِه هیوخت میوه نأوری.» هو وخت درخت خوشکَ بوسته. ۲۰ شاگردأن کی اَ ایتفاقَ بیدهییدی، تعجبٚ مره عیسی جأ وَورسهییدی: «چی بوبوسته کی اَنجیل درخت فوری خوشکَ بوسته؟» ۲۱ عیسی اوشأنَ بوگفته: «آمین شمرَ گم کی اگه ایمأن بدأرید و شک نوکونید، نه تنها تأنیدی اونچی کی اَنجیل درختٚ سر بمو، انجام بدید، بلکی اگرم اَ کویَ بیگید ‹جٚه تی جا بکنده بوبو و دریا دورون دکف› هَطو به. ۲۲ اگه ایمأن بدأرید، هر اونچی کی دوعا اَمرأ بخوأیید، به دس اَوریدی.»
سؤال کودن در موردٚ عیسی ایقتدار
۲۳ او وخت عیسی معبدٚ صحنٚ دورون بوشو و هَطو کی مردومَ تعلیم دَئن دوبو، سرأنٚ کاهنأن و قومٚ پیله کسأن اونٚ ورجأ بموییدی و بوگفتیدی: «به چی حقّی اَ کارأنَ انجام دیهی؟ چی کسی اَ حقَّ ترَ فدَه؟» ۲۴ عیسی جواب بدَه: «منم ایتأ سؤال شمرَ وَورسم. اگه جواب بدید، منم شمرَ گم چی حقّی اَمرأ اَ کارأنَ کونم. ۲۵ یحیی حقٚ تعمید دَئنَ کی جأ فیگیفته؟ جٚه آسمان یا اینسأن؟» اوشأن خوشأنٚ میأن بحث بوکودیدی و بوگفتیدی: «اگه بیگیم جٚه آسمان بو، اَمرَ گه:‹پس چره اونَ ایمأن نأوردیدی›؟ ۲۶ مردومٚ جأ ترسیم کی بیگیم جٚه اینسأن بو، چونکی همه یحیایَ پیغمبر دأنیدی.» ۲۷ وأگردستید عیسایَ بوگفتید: «اَمأن نأنیم!» عیسی بوگفته: «منم شمرَ نگم به چی حقّی اَ کارأنَ کونم.»
دوتأ پسرٚ مٚثٚل
۲۸ «شیمی نظر در موردٚ اَ مٚثٚل چیسه؟ ایتأ مردای دوتأ پسر دأشتی. بوشو خو اوّلی پسرٚ ورجأ و بوگفته: ‹پسر جان، ایمروز بوشو انگور باغٚ میأن کار بوکون.› ۲۹ وأگردسته بوگفته: ‹نشم.› ولی بأزین پشیمانَ بوسته و بوشو. ۳۰ پئر بوشو خو اویتأ پسرٚ ورجأ و هو گبَ اونَ بزه و پسر بوگفته: ‹شم، آقا جان.› امّا نوشو. ۳۱ کویتأ پسر، خو پئرٚ خوأستهیَ بجا بأورده؟» جواب بدَهییدی: «اوّلی.» عیسی اوشأنَ بوگفته: «آمین شمرَ گم کی باجگیرأن و فاحشهیأن قبلٚ شومأن خودا پادشایییَ رأ پیدا کونیدی. ۳۲ چونکی یحیی بمو دوروست زندگی کودنٚ رأیَ شمرَ یاد بده ولی شومأن اونَ ایمأن نأوردیدی، ولی باجگیرأن و فاحشهیأن ایمأن بأوردیدی. و شومأن با اَنکی اَنَ بیدهییدی، پشیمانَ نوبوستیدی و اونَ ایمأن نأوردیدی.
شرورٚ باغبانأنٚ مٚثٚل
۳۳ «ایتأ مَثَلٚ دیگرَ گوش بدید: ایتأ ارباب ایتأ انگور باغ بیگیفته، اونٚ دورَ حیصار بکشه و اونٚ میأن انگور له کودنٚ وأسی ایتأ چاچه چأکوده. هَطویم ایتأ برجٚ دیدهبانی چأکوده. بأزین او باغَ چنتأ باغبانَ ایجاره بدَه و خودش بوشو سفر. ۳۴ وختی انگورچینی زمان فأرسه، خو نوکرأنَ، باغبانأنٚ ورجأ اوسه کوده کی اونٚ سأمَ جٚه انگورأن تحویل بیگیرید. ۳۵ اوشأن اونٚ نوکرأنَ بیگیفتیدی، ایتأیَ بزهییدی و ایتأیَ بوکوشتیدی و سومییَ سنگسار بوکودیدی. ۳۶ ایوار دِه نوکرأنٚ ویشترییَ اوشأنٚ ورجأ اوسه کوده، ولی باغبانأن اوشأنٚ اَمرأیم هوطو رفتار بوکودیدی. ۳۷ سرٚ آخر خو پسرَ اوسه کوده باغبانأنٚ ورجأ و خو اَمرأ بوگفته کی ‹حتماً می پسرٚ حورمتَ دأریدی.› ۳۸ امّا وختی کی باغبانأن صابباغ پسرَ بیدهییدی، همدیگرٚ بوگفتیدی: ‹اَن باغٚ وارثه! بأیید اونَ بوکوشیم و اونٚ ارثَ صاحاب بیبیم.› ۳۹ بأزین اونَ بیگیفتیدی و انگور باغٚ جأ بیرون تأودَهییدی و بوکوشتید. ۴۰ هسأ وختی صاب باغ بأیه، اَ باغبانأنٚ اَمرأ چی کونه؟» ۴۱ جواب بدَهییدی: «صابباغ بیرحمٚ آدمأنَ، بیرحمی اَمرأ نابودَ کونه و انگور باغَ باغبانأنٚ دیگرَ ایجاره دهه، تا کی انگورچینی وخت اونٚ سأمَ جٚه انگورأن فدید.»
۴۲ او وخت عیسی اوشأنَ بوگفته: «مگر خودا کلامٚ میأن نخوأندیدی کی:
‹او سنگییَ کی معمارأن فیشأدیدی،
سنگٚ اصلییٚ بنا بوبوسته.
خوداوند اَ کارَ بوکوده
و اَمِره عجیب نمأیه.›؟#۲۱:۴۲ مزمور ۱۱۸ آیه ۲۲ و ۲۳
۴۳ «پس شمرَ گم کی خودا پادشایی شیمی جأ فیگیفته به و قومییَ فدَه به کی اونٚ میوهیَ به بار بأورید. ۴۴ هر کی او سنگٚ سر بکفه، خوردَ به، و اگه او سنگ اینفرٚ رو بکفه، اونَ له کونه.»
۴۵ وختی سرأنٚ کاهنأن و فریسیأن عیسی مثلأنَ بیشتأوستیدی، بفهمستیدی کی دربارهیٚ اوشأن گب زِئن دره، ۴۶ پس خوأستیدی اونَ دسگیر بوکونید، ولی مردومٚ جأ ترسهییدی، چونکی اوشأن عیسایَ پیغمبر دأنستیدی.
Currently Selected:
متّی ۲۱: گیلکی (رشتی)
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2010-2019 Gilak Media