متّی ۲۰
۲۰
تاکستانٚ کارگرأنٚ مٚثٚل
۱ آسمانٚ پادشایی ایتأ صاب باغَ مأنه کی صُبٚ دم بوشو بیرون تا خو انگور باغٚ رِه کارگرأنٚ روز مزد بیگیره. ۲ اون، اوشأنٚ اَمرأ طی بوکوده کی روزی یک دینار هر کدامٚ اوشأنَ فده و اوشأنَ اوسه کوده خو انگور باغٚ دورون کار بوکونید. ۳ نزدیکٚ ساعتٚ نُه#20:3 یهودیأن، آفتابٚ بوجور اَمونَ، صُبٚ اوّلی ساعت دأنستیدی، ینی وختی یونانی متنٚ دورون بینیویشته بوبوسته «سومی ساعت»، ینی ساعت ۹ صُب، چره کی آفتابٚ بوجور اَمونٚ ساعت همیشه نزدیکٚ ۶ صُب ایسه. دوواره بیرون بوشو و چند نفرٚ دیگرم شهرٚ میدانٚ میأن بیده کی بیکار ایسَهبید. ۴ اوشأنَ دوخوأده و بوگفته: «شومأنم بیشید می تاکستان و اینصافٚ اَمرأ شمرَ پول فدم.» ۵ و اوشأنم بوشوییدی. بازم ایوار دِه نزدیکٚ ظهر و هَطویم ساعتٚ سه بعدٚ ظهر بیرون بوشو و هو کارَ تکرار بوکوده. ۶ حدودٚ ساعتٚ پنجٚ بعدٚ ظهر بیرون بوشو و باز چند نفرٚ دیگرَ کی بیکار ایسَهبید، بیده و اوشأنَ وَورسه: «چره تومامٚ روز اَیه بیکار ایسَهییدی؟» ۷ اوشأنم جواب بدَهییدی: «چونکی هیچکی اَمرَ کاری فَنده.» بأزین اوشأنَ بوگفته: «شومأنم بیشید می تاکستان تا اویه کار بوکونید.» ۸ غروب دم، صاب باغ خو مباشرَ بوگفته: «کارگرأنَ دوخوأن و جٚه آخری شروع بوکون تا به اوّلی اوشأنٚ مزدَ فَدن.» ۹ کارگرأنی کی حدودٚ ساعتٚ پنج بعدٚ ظهر کارٚ سر بمو بید، هر کدام ایتأ دینار فیگیفتیدی. ۱۰ وختی نوبتٚ کسأنی فأرسه کی قبلٚ همه بمو بید، فیکر بوکودیدی کی دیگرأنٚ جأ ویشتر فیگیریدی. ولی هر کدامٚ اوشأنم خوشأنٚ ایتأ دینارَ فیگیفتیدی. ۱۱ وختی خوشأنٚ مزدَ فیگیفتیدی، غر غرٚ مره صاب باغَ بوگفتیدی: ۱۲ «اَشأن کی آخرٚ سر بموییدی، فقط یک ساعت کار بوکودیدی و تو اوشأنَ اَمی اَمرأ کی تومامٚ روز آفتابٚ جیر زحمت بکشهییمی، ایجور مزد فدَیی!» ۱۳ صاب باغ وأگردسته ایتأ جٚه اوشأنَ بوگفته: «اَی رِفِق، من کی ترَ ظلمی نوکودم. مگر اَمی قرار ایتأ دینار نوبو؟ ۱۴ پس تی حقَ فیگیر و بوشو! من خوأیم اَ آخری نفرَ تی مأنستن مزد فدم. ۱۵ حق نأرم می پولٚ اَمرأ اونچی کی خوأیم بوکونم؟ تو می دس و دیل بازی وأسییم حسودی کونی؟ ۱۶ هَطویی ایسه کی آخرییأن اوّل بیدی، و اولییأن آخر بیدی.»
عیسی سومی وار خو مرگ و قیامَ پیشگویی کونه
۱۷ وختی کی عیسی اورشلیمٚ طرف شوئون دوبو، رأ میأنی خو دوازدهتأ شاگردَ ایتأ کنار ببرده و اوشأنَ بوگفته: ۱۸ «الأن اورشلیم شوئون دریم. اویه اینسأنٚ پسرَ، سرأنٚ کاهنأن و دینٚ علما دس تسلیم کونیدی، اوشأن، اونَ به مرگ محکوم کونیدی ۱۹ و ایسپأریدی غیرٚ یهودیأنٚ دس تا مسخره ببه، شلاق بوخوره و مصلوب ببه. ولی سومی روزٚ رِه جٚه دونیای موردهیأن قیام کونه.»
یعقوب و یوحنا مارٚ درخوأست کودن
۲۰ او وخت یعقوب و یوحنا مار کی زِبدی زن بو، خو دوتأ پسرٚ اَمرأ عیسی ورجأ بمو و اونٚ جُلُو زانو بزه و اونٚ جأ ایتأ خوأهش بوکوده. ۲۱ عیسی وَورسه: «تی آرزو چیسه؟» بوگفته: «اَنکی قول بدی کی می اَ دوتأ پسرأن تی پادشایی میأن، ایتأ تی راستٚ دس و اویتأ تی چپٚ دس بینیشینید.» ۲۲ عیسی وأگردسته بوگفته: «شومأن نأنیدی چی چیزی درخوأست کودَن دریدی! آیا تأنیدی جٚه او جامی کی من به زودی خوروم، شومأنم بوخورید؟» اوشأن بوگفتیدی: «بله، تأنیم!» ۲۳ عیسی بوگفته: «شکی نییه کی می جامٚ جأ خوریدی، امّا بدأنید کی نیشتنٚ می راستٚ دس و چپٚ دس، میشین نییه کی ببخشم. اَ جایگاه کسأنیشین ایسه کی می پئر اوشأنٚ رِه فراهم بوکوده.»
۲۴ وختی او دهتأ شاگردٚ دیگر اَ ماجرایَ بیشتأوستید، اوشأنَ او دوتأ برأرٚ جأ غیظَ گیفته. ۲۵ عیسی اوشأنَ دوخوأده و بوگفته: «شومأن دأنیدی کی غیرٚ یهودیأنٚ حاکمأن و پیله کسأن خوشأنٚ زیر دستأنٚ رِه آقایی کونیدی و فرمان دیهیدی. ۲۶ امّا شیمی میأنی نوأستی اَطویی ببه، بلکی هر کی خوأیه شیمی میأن پیله کس ببه، وأستی شیمی خادم ببه ۲۷ و هر کی بخوأیه شیمی میأن اوّل ببه، وأ شیمی غولام ببه، ۲۸ چره کی اینسأنٚ پسرم نمو کی اونَ خدمت بوکونید، بلکی بمو تا خدمت بوکونه و خو جانَ خیلییأنٚ نجاتٚ وأسی فدا بوکونه.»
عیسی مسیح دوتأ نابینایَ شفا دهه
۲۹ وختی کی عیسی و اونٚ شاگردأن شهرٚ اَریحایَ ترکَ کودَن دیبید، مردومأنٚ زیادی اونٚ دونبألسر رأ دکفتیدی. ۳۰ دوتأ مردأی کی نابینا بید، رأ کناره نیشتهبید. وختی بیشتأوستیدی کی عیسی اویه جأ دوأرستَن دره، فریاد بزهییدی: «آقا جان، اَی داوودٚ پسر، اَمرَ رحم بوکون!» ۳۱ مردومأن اوشأنَ تشر بزهییدی کی ساکیتَ بید، امّا اوشأن ویشتر ایجگره زنان گفتیدی: «آقا جان، اَی داوودٚ پسر، اَمرَ رحم بوکون!» ۳۲ عیسی بِیسه و او دو نفرَ دوخوأده و وَورسه: «چی خوأییدی شِمره انجام بدم؟» ۳۳ جواب بدَهییدی: «آقا جان، خوأییم کی اَمی چومأن وازَ به و بیدینیم.» ۳۴ عیسی دیل بوسوخته، خو دسَ بنَه اوشأنٚ چومأنَ رو و هو وخت اوشأنٚ چومأن بیده و اونٚ دونبألسر رأ دکفتید.
Currently Selected:
متّی ۲۰: گیلکی (رشتی)
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2010-2019 Gilak Media