متّی ۱۹
۱۹
تعلیم دَئن در موردٚ عروسی کودن و طلاقَ گیفتن
۱ وختی کی عیسی گبأن تومامَ بوسته، اوستانٚ جلیلَ ترکَ کودهبوشو سرزیمینٚ یهودیه کی او طرفٚ رودٚ اردن نهَهبو. ۲ مردومأنٚ زیادی اونٚ دونبأل رأ دکفتیدی بوشوییدی و عیسییم اوشأنَ اویه شفا بدَه.
۳ بعضی جٚه فریسیأنم اونٚ ورجأ بموییدی تا اونَ ایمتحان بوکونید. اوشأن عیسایَ وَورسهییدی: «آیا ایتأ مردأکٚ رِه جایز ایسه به هر دلیلی کی خودش قوبیل دأره، خو زنَ طلاقَ ده؟» ۴ عیسی جواب بدَه: «مگر نخوأندید کی خالقٚ اَ دونیا جٚه اوّل اینسأنَ مرد و زن خلق بوکوده؟#۱۹:۴ پیدایش بابٚ ۱ آیه ۲۷» ۵ و بوگفته: «هَنٚ وأسی مرد خو پئر و مارَ ترکَ کونه و خو زنَ دوچکه و اوشأن دوتأ، ایتأ تن بیدی.#۱۹:۵ پیدایش بابٚ ۲ آیه ۲۴ ۶ اَطویی دِه اوشأن دو نفر نیییدی، بلکی ایتأ تن بوبوستیدی. پس اونچییَ کی خودا وصلَ کوده، اینسأن نوأستی سیوأ بوکونه.» ۷ بوگفتیدی: «پس چره موسی بفرمأسته کی اگه ایتأ مردأی بخوأیه خو زنَ طلاقَ ده، تأنه ایتأ طلاقنامه اونَ فده، بأزین اونَ ولَ کونه کی بشه؟#۱۹:۷ تثنیه بابٚ ۲۴ آیه ۱» ۸ عیسی بوگفته: «شیمی سنگدیلی وأسی بو کی موسی ایجازه بدَه کی شیمی زنَ طلاقَ دید، امّا جٚه اوّل اَطویی نوبو. ۹ وأ بدأنید هر کی خو زنَ غیرٚ خیانتٚ وأسی طلاقَ ده و ایتأ زنٚ دیگری ببره، ینی زنا بوکوده.»
۱۰ شاگردأن اونَ بوگفتیدی: «اگه مرد و زنٚ میأن وضعیت اَطو ببه، عروسی نوکودن بهتره!» ۱۱ عیسی بفرمأسته: «همه نتأنیدی اَ تعلیمَ قوبیل بوکونید، مگر کسأنی کی اوشأنَ عطا بوبوستهبی. ۱۲ چونکی بعضییأن جوری بدونیا اَییدی کی نتأنیدی عروسی بوکونید، بعضییأنم مردومٚ دس ناقصَ بوستیدی کی دِه نتأنیدی زأیدار بیبید، و بعضییأنٚ دیگرم آسمانٚ پادشایی وأسی تصمیم گیریدی عروسی نوکونید. هر کی بتأنه اَ تعلیمَ قوبیل بدأره، وأستی هو جور زندگی بوکونه.»
عیسی کوجه زأکأنَ برکت دهه
۱۳ او وخت مردوم، زأکأنَ عیسی ورجأ بأوردیدی تا اوشأنٚ سر، دس بنه و دوعا بوکونه. ولی شاگردأن مردومَ اَ کارٚ وأسی سرزنش بوکودید. ۱۴ عیسی بفرمأسته: «وئلید زأکأن می ورجأ بأیید و اَشأنٚ جُلُویَ نیگیرید. چونکی آسمانٚ پادشایی اَ جور کسأنٚ شینه!» ۱۵ پس اوشأنٚ سر دس بنَه، اوشأنَ برکت بده و جٚه اویه بوشو.
جوانٚ پولدار
۱۶ ایروز ایتأ مردأی عیسی ورجأ بمو و وَورسه: «اوستاد، چی کارٚ نیکویییَ وأستی انجام بدم تا زندگییٚ اَبدییَ بدس بأورم؟» ۱۷ عیسی جواب بدَه: «چره می جأ دربارهیٚ نیکویی واورسی؟ تنها اینفر نیکویه. ولی اگه خوأیی به حیات رأ پیدا بوکونی، احکامَ بجا بأور.» ۱۸ او مردأی وَورسه: «کُو احکامَ؟» عیسی بوگفته: «‹قتل نوکون، زنا نوکون، دوزدی نوکون، شهادتٚ دوروغ ندن، ۱۹ تی پئر و مارَ ایحترام بنه›#۱۹:۱۹ خروج بابٚ ۲۰ آیه ۱۲ تا ۱۶ و ‹تی همسادهیَ تی جانٚ مأنستن موحبت بوکون.›#۱۹:۱۹ لاویأن بابٚ ۱۹ آیه ۱۸» ۲۰ او جوان بوگفته: «همهیٚ اَ احکامَ بجا بأوردم. دِه چی کم دأرم؟» ۲۱ عیسی جواب بده: «اگه خوأیی کامل بیبی، بوشو و اونچی کی دأری بوفروش و اوشأنٚ پولَ فقیرأنَ فدن کی آسمانٚ میأنی گنج بدأری. بأزین بیأ و می جأ پیروی بوکون.» ۲۲ جوان وختی عیسی گبأنَ بیشنأوسته، اونٚ دیلَ غم دکفته و رأ دکفته بوشو، چونکی مال و منالٚ زیادی دأشتی.
۲۳ او وخت عیسی خو شاگردأنَ بوگفته: «آمین شمرَ گم مال و منالدارأنٚ رِه رأ پیدا کودن به آسمانٚ پادشایی خیلی دوشواره! ۲۴ هَطویم شمرَ گم کی گوذشتنٚ شوتور جٚه سوزنٚ سوراخ راحتتره تا ایتأ پولدارٚ آدم خودا پادشایییَ ورود بوکونه.» ۲۵ شاگردأن وختی عیسی گبأنَ بیشتأوستید خیلی تعجب بوکودیدی و وَورسهییدی: «پس کی تأنه نجات پیدا بوکونه؟» ۲۶ عیسی اوشأنَ فندرسته و بوگفته: «اَ کار اینسأنٚ رِه غیرٚ ممکنه، امّا خودا رِه همه چی ممکنه.»
۲۷ پطرس بوگفته: «هسأ اَمأن همه چییَ ترکَ کودیم و تی جأ پیروی کودَن دریم. چی چیزی اَمی نصیب به؟» ۲۸ عیسی اوشأنَ بوگفته: «آمین شمرَ گم وختی کی دونیایٚ جدیدٚ میأنی همه چی تازَه به و اینسأنٚ پسر شکوه و جلالٚ اَمرأ خو تختٚ پادشایی سر نیشینه، بأزین شومأنم کی می جأ پیروی بوکودیدی، دوازدهتأ تختٚ سر نیشینیدی و ایسرائیلٚ دوازدهتأ قبیلهیَ داوری کونیدی. ۲۹ و هر کی می نامٚ وأسی، خو خانهیَ یا خو برأر یا خو خأخور یا خو پئر یا مار یا زأکَ یا خو ملک و املاکَ ترکَ کودهبی، بأزین صد برابر فیگیره و زندگییٚ اَبدییَ بدس اَوره. ۳۰ امّا خیلییأن کی اوّلییدی، آخر بیدی و خیلییأنم کی آخرییدی اوّل بیدی!»
Currently Selected:
متّی ۱۹: گیلکی (رشتی)
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2010-2019 Gilak Media