متّی ۱۸
۱۸
آسمانٚ پادشایی میأن چی کسی پیلهتر دوخوأده به؟
۱ او وخت شاگردأن عیسی ورجأ بموییدی و وَورسهییدی: «کی آسمانٚ پادشایی میأن پیلهتره؟» ۲ عیسی ایتأ زأکَ دوخوأده و اونَ اوشأنٚ میأن بأورده ۳ و بفرمأسته: «آمین شمرَ گم، تا شمرَ عوضَ نوکونید و کوجه زأکأنٚ مأنستن نیبید، هرگز نتأنیدی آسمانٚ پادشایی دورون رأ پیدا بوکونید. ۴ پس هر کی خورَه فروتن بوکونه و اَ زأکٚ مأنستن ببه، بأزین آسمانٚ پادشایی میأن پیلهتره. ۵ و کسأنییم کی اَ جور زأکَ می نامٚ وأسی خوشأنٚ میأن قوبیل بوکونید، مرَ قوبیل بوکودیدی. ۶ ولی هر کییم باعث ببه کی ایتأ اَ جور زأی کی مرَ ایمأن دأره، لغزش بوخوره، اونٚره بهتره کی ایتأ پیله سنگٚ آسیاب اونٚ گردن دٚوٚدید تا بأزین جولفٚ دریا میأنی تأودید کی غرقَ به! ۷ وای بر اَ دونیا کی باعثٚ لغزش ایسه! وسوسه همیشه نهَه امّا وای بحالٚ او کسی کی باعثٚ لغزشٚ دیگرأن به!
۸ «اگه تی دس یا تی پا ترَ بلغزأنه، وأستی اونَ وَوینی و فیشأنی. چون تِره بهتره کی بی دس یا بی پا زندگییٚ جاودانی دورون بیشی تا اَنکی دوتأ دس و پایٚ سالمٚ اَمرأ آتشٚ اَبدی میأن تأودَه بیبی. ۹ و اگه تی چوم ترَ بلغزنه، وأستی اونَ بکنی و فیشأنی، چون تِره بهتره کی ایتأ چومٚ اَمرأ زندگییٚ جاودانی دورون بیشی تا اَنکی دوتأ چومٚ اَمرأ جهندمٚ آتشٚ دورون تأودَه بیبی.
اویرَ بوسته گوسفندٚ مٚثٚل
۱۰ «شیمی حواس بمأنه کی هیچ کدامٚ اَ جور کوجه زأکأنَ تحقیر نوکونید، چونکی شمرَ گم کی اوشأن آسمانٚ دورونی فرشتهیأنی دأریدی کی همیشه می آسمانی پئرٚ رویَ دینیدی. ۱۱ چونکی اینسأنٚ پسر بمو تا اویرَ بوستهیأنَ نجات بده. ۱۲ تو چی فیکر کونی؟ اگه ایتأ مردای صدتأ گوسفند بدأره و ایتأ جٚه اوشأن اویرَ به، او نود و نُهتأ گوسفندَ کویأنٚ میأنی ننِه و اویتأ اویرَ بوسته گوسفندٚ دونبأل نیشه؟ ۱۳ آمین شمرَ گم اگه او گوسفندَ بیأفه، اونٚ وأسی ویشتر خوشحالی کونه تا او نود و نُهتأ گوسفندی کی اویرَ نوبوستیدی. ۱۴ هَطویم شیمی آسمانی پئرٚ خوأسته اَنه کی حتی ایتأ جٚه اَ کوچه زأکأن هلاکَ نیبید.
چوطو وأستی تی خطاکارٚ برأرٚ مره رفتار بوکونی؟
۱۵ «اگه تی برأر ترَ بدی بوکونه، خلوتی بوشو اونٚ ورجأ و اونٚ بدییأنَ اونَ بوگو. اگه تی گبَ گوش بوکوده، ینی تی برأرَ به دس بأوردی؛ ۱۶ ولی اگه قوبیل نوکوده، اینفر یا دو نفرٚ دیگرَ تی اَمرأ ببر، تا ‹هر گبی کی گفته به، دو سهتأ شاهدٚ اَمرأ ثابت ببه.#۱۸:۱۶ تثنیه بابٚ ۱۹، آیه ۱۵› ۱۷ اگه اوشأنٚ گبأنم گوش ندَه، کلیسایَ بوگو؛ و اگه کلیسا گبأنم قوبیل نوکوده، او وخت اونٚ اَمرأ بیگانه یا باجگیرٚ#۱۸:۱۷ مردوم معمولا باجگیرأنٚ جأ دوری کودیدی چونکی ویشترٚ اوشأن فاسدٚ آدمأنی بید کی مالیاتٚ ایضافه مردومٚ جأ خوشأنٚ رِه فیگیفتیدی و دولتٚ رومٚ رِه کار کودیدی کی یهودیهیَ اشغال بوکودهبو. مأنستن رفتار بوکون. ۱۸ آمین شمرَ گم هر چی زیمینٚ سر دودید، آسمانٚ میأن دٚوٚسته به، و هر اونچی کی زیمینٚ رو وأکونید، آسمانٚ میأنی وأکوده به. ۱۹ بازم شمرَ گم کی هر وخت دو نفر جٚه شومأن زیمینٚ سر هر چیزییَ کی خودا جأ خوأییدی کس کسٚ اَمرأ همدیل بیبید، بأزین می آسمانی پئر شیمی خوأستهیَ به انجام رسأنه ۲۰ چون جایی کی دو یا سه نفر می نامٚ وأسی اویه جمَ بید، منم اوشأنٚ میأن حاضرَ بم.»
خادمٚ بیرحم مٚثٚل
۲۱ او وخت پطرس عیسی ورجأ بمو و وَورسه: «آقا جان، اگه می برأر مرَ بدی بوکونه، تا چن وار وأستی اونَ ببخشم؟ هفت وار؟» ۲۲ عیسی بفرمأسته: «ترَ گم نه هفت وار، بلکی هفتادتأ هفت وار. ۲۳ هَنٚ وأسی آسمانٚ پادشایی ایتأ شاه مأنستن ایسه کی تصمیم بیگیفته خو خادمأنٚ مره تسویه حیساب بوکونه. ۲۴ وختی شروع به حیسابرسی بوکوده، اینفرَ پادشا ورجأ بأوردیدی کی ده هیزار قنطار اونَ بدهکار بو. ۲۵ چونکی اون نتأنستی خو قرضَ فده، اونٚ ارباب دستور بده کی اونَ با اونٚ زن و زأکأن و تومام اونٚ مال و منال بوفروشید تا اربابٚ طلب وصول ببه. ۲۶ خادمٚ بدهکار خو اربابَ به دس پا دکفته و بوگفته: ‹ایپچه تحمل بوکون و مرَ مهلت بدن تا همهیٚ می قرضَ فدم.› ۲۷ بأزین اربابٚ دیل بوسوخته و اونٚ قرضَ ببخشه و اونَ آزادَ کوده. ۲۸ امّا وختی کی خادم بوشو بیرون، ایتأ جٚه خو همکارأنَ بیده کی صد دینار اونٚ جأ طلب دأشتی. خو همکارٚ گولییَ بیگیفته، فشار بدَه و بوگفته: ‹می طلبَ مرَ فَدن!› ۲۹ اونم خو همکارَ به دس پا دکفته و مینّتکونان بوگفته: ‹ایپچه تحمل بوکون و مرَ مهلت بدن تا می قرضَ فدم.› ۳۰ ولی اون قوبیل نوکوده، بلکی بوشو و خو همکارَ زندان تأوده تا خو قرضَ فیگیره. ۳۱ وختی کی بقیه خادمأن اَ ماجرایَ بیدهییدی، خیلی ناراحتَ بوستیدی و بوشوییدی خوشأنٚ اربابٚ ورجأ و تومامٚ او ایتفاقَ تعریف بوکودیدی. ۳۲ بأزین ارباب، او خادمَ خو ورجأ دوخوأده و بوگفته: ‹اَی خادمٚ شرور! مگر من تی ایلتماس کودنٚ وأسی تومامٚ تی قرضَ ترَ نبخشم؟ ۳۳ ینی تو نوأستی تی همکارَ رحم بوکودهبی، هوطو کی من ترَ رحم بوکودم؟› ۳۴ پس اربابَ غیظَ گیفته، اونَ زندان تأوده تا شکنجه ببه و همهیٚ خو قرضَ فده. ۳۵ هَطویییم ایسه کی می آسمانی پئر شیمی اَمرأ رفتار کونه اگه شومأنم شیمی برأرَ دیل و جانٚ مره نبخشید.»
Currently Selected:
متّی ۱۸: گیلکی (رشتی)
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2010-2019 Gilak Media