متّی ۱۷
۱۷
عیسی نورانی بوبوسته
۱ شیش روز کی بوگوذشته، عیسی، پطرس و یعقوب و اونٚ برأر، یوحنایَ اوسأده و اوشأنَ خو اَمرأ ببرده ایتأ کوهٚ بولندٚ جور کی هیکس اویه نِیسه‌بو. ۲ اویه اوشأنٚ ورجأ، اونٚ لیباسأن و اونٚ دیمٚ رنگ وأگردسته؛ اونٚ رنگ و رو خورشیدٚ مأنستن تابستی و اونٚ لیباسأنم نورٚ مأنستن سیفیدَ بوسته‌بو. ۳ ایدفعه‌یی موسایٚ نبی و الیاسٚ نبی اوشأنٚ چومأنٚ جُلُو ظاهیرَ بوستیدی کی عیسی اَمرأ گب زِئن دیبید. ۴ پطرس عیسایَ بوگفته: «آقا جان، چی خُبه کی اَمأن اَیه ایسه‌ییم. اگه بخوأیی، سه‌تأ سرپناه چأکونم، ایتأ تِره، ایتأ موسی رِه و ایتأیم ایلیاسٚ رِه.» ۵ هنوز پطرسٚ گبأن تومامَ نوبوسته‌بو کی ایوأرکی ایتأ ابرٚ درخشان اوشأنٚ سر سایه تأودَه و ایتأ صدایی او ابرٚ جأ بمو کی بوگفته: «اَنه می جانٚ دیلٚ پسر کی اونٚ جأ راضی‌یم؛ اونٚ گبأنَ گوش بوکونید!» ۶ وختی شاگردأن او صدایَ بیشتأوستیدی، اوشأنَ خیلی ترسَ گیفته و دمرو خاکٚ سر بکفتیدی. ۷ ولی عیسی بمو اوشأنٚ ورجأ و خو دسَ اوشأنٚ سر بنَه و بوگفته: «ویریزید، نوأ ترسئنید!» ۸ اوشأن خوشأنٚ چومأنَ وأکودیدی و جز عیسی کسی‌یَ نیده‌ییدی.
۹ وختی کی کوه جأ بیجیر اَمون دیبید، عیسی اوشأنَ بفرمأسته: «اَ رویایی کی بیده‌ییدی هیکسٚ‌ره تعریف نوکونید، تا زمانی کی اینسأنٚ پسر، جٚه مورده‌یأنٚ دونیا قیام بوکونه.» ۱۰ شاگردأن اونَ وَورسه‌ییدی: «چره دینٚ علما گیدی کی اوّل وأستی ایلیاسٚ نبی بأیه؟» ۱۱ عیسی جواب بدَه: «البته کی ایلیاس اَیه و همه چی‌یَ دوواره چأکونه. ۱۲ ولی شمرَ گم کی ایلیاس بمو ولی هیکس اونَ نشنأخته و هر بلایی‌یم کی خوأستیدی اونٚ سر بأوردیدی و هَطویم ایسه کی اینسأنٚ پسرم اوشأنٚ دسٚ جأ آزار دینه.» ۱۳ او وخت شاگردأن بفهمستیدی کی عیسی درباره‌یٚ یحیایٚ تعمیددهنده اوشأنٚ اَمرأ گب زِئن دره.
عیسی مسیح ایتأ پسرٚ دیوزده‌یَ شفا دهه
۱۴ وختی مردومٚ ورجأ وأگردستیدی، ایتأ مردای عیسایَ نزدیکه بوسته و اونٚ جُلُو زانو بزه و بوگفته: ۱۵ «آقا جان، می پسرَ رحم بوکون. اون غشی‌یه و سخت عذاب کشن دره. ویشترٚ وختأن اَ مرضٚ وأسی آب و آتشٚ میأن دکفه. ۱۶ اونَ تی شاگردأنٚ ورجأ بأوردم، ولی اوشأن نتأنستیدی اونَ شفا بدید.» ۱۷ عیسی بفرمأسته: «اَی نسلٚ بی‌ایمأن و منحرف! تا کِی شیمی اَمرأ بِیسم و شمرَ تحمل بوکونم؟ اونَ می ورجأ بأورید.» ۱۸ عیسی دیوَ نهیب بزه و دیو او پسرٚ جأ بیرون بوشو. هو موقع اون شفا پیدا بوکوده. ۱۹ بأزین شاگردأن عیسی ورجأ بموییدی و خلوتی اونَ وَورسه‌ییدی: «چره اَمأن نتأنستیم او دیوَ بیرونَ کونیم؟» ۲۰ عیسی بفرمأسته: «جٚه اَ خأطر کی شیمی ایمأن کمه. آمین شمرَ گم اگه شومأن به اندازه‌یٚ ایتأ دانه‌یٚ خردل ایمأن بدأرید، تأنیدی اَ کویَ بیگید ‹جٚه اَیه بوشو او طرفتر› و جابجا به. و هیچ چیزی نی‌یه کی شِمره غیرممکن ببه. ۲۱ ولی اَ جور دیوأن بیرون نیشیدی مگر روزه و دوعا اَمرأ.»
عیسی دوّمی پیشگویی در موردٚ خو مرگ و قیام
۲۲ وختی کی عیسی و اونٚ شاگردأن جلیلٚ میأن دورٚ هم ایسَه‌بید، عیسی اوشأنَ بوگفته: «اینسأنٚ پسر مردومٚ دس تسلیم به، ۲۳ اوشأن اونَ کوشیدی و اون سومی روزٚ رِه جٚه مورده‌یأنٚ دونیا قیام کونه» و شاگردأنم خیلی غورصه بوخوردیدی.
سکه، ماهی دهنٚ میأن
۲۴ بعدٚ اونکی عیسی و اونٚ شاگردأن فأرسه‌ییدی کفرناحوم، مأمورأنی کی معبدٚ رِه مالیات جمَ کودیدی پطرسٚ ورجأ بموییدی و وَورسه‌ییدی: «شیمی اوستاد، معبدٚ مالیاتَ فندِه؟» ۲۵ اون جواب بده: «البته کی فدِه!» پطرس وأگردسته بخانه. قبلٚ اَنکی چیزی بگه، عیسی اونَ بوگفته: «اَی شمعون، دونیا پادشایأن جٚه چی کسأنی باج و خراج فیگیریدی؟ جٚه خوشأنٚ زأکأن، یا غریبأنٚ جأ؟ تی چی فیکر کونی؟» ۲۶ پطرس جواب بدَه: «جٚه غریبأن!» عیسی اونَ بوگفته: «پس خودا زأکأن معافیدی! ۲۷ امّا جٚه اَ خأطر کی اوشأن دوچارٚ لغزش نیبید، بوشو دریا کنار و دام تأود. اوّلی ماهی‌یَ کی بیگیفتی، اونٚ دهنَ وأکون، بأزین ایتأ سکه‌یٚ چار دِرْهَمی پیدا کونی و اونٚ اَمرأ می سأم و تی سأمَ اوشأنَ فَدن.»
Currently Selected:
متّی ۱۷: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
