لوقا ۴
۴
شیطأن خوأستی عیسی مسیحَ وسوسه بوکونه
۱ عیسی روح‌القدسٚ پُری اَمرأ اُردُنٚ روخانٚ جأ وأگردسته و خودا روحْ، اونَ بیابانٚ دورون ببرده. ۲ هویه شیطأن چهل روز عیسایَ وسوسه اَمرأ ایمتحان بوکوده. او روزأنٚ میأن هیچی نوخورده و بأزین اونَ ویشتأ کوده. ۳ شیطأن اونَ بوگفته: «اگه تو خودا پسری، اَ سنگَ بوگو نان ببه.» ۴ عیسی بوگفته: «خودا کلامٚ میأن بینیویشته بوبوسته کی ‹اینسأن فقط نان خوردنٚ اَمرأ زنده نمأنه.›»
۵ بأزین شیطأن اونَ ایتأ بولندٚ جیگا ببرده و ایتأ چوم به هم زِئنٚ اَمرأ، تومامٚ دونیا مملکتأنَ اونَ نیشأن بدَه ۶ و عیسایَ بوگفته: «تومامی‌یٚ اَ سرزیمینأنَ، و اوشأنٚ شکوه و جلالَ ترَ فدم، چونکی من اوشأنٚ اختیار دأرم و هر کسَ کی می دیل بخوأیه، تأنم فدم. ۷ تو اگه مرَ سوجده بوکونی همه‌تأنٚ اوشأن تی‌شین به.» ۸ عیسی وأگردسته بوگفته: «خودا کلامٚ میأن بینیویشته بوبوسته کی:
‹تو وأستی خوداوند، تی خودایَ سوجده بوکونی
و فقط اونَ عیبادت بوکونی.›»
۹ بأزین شیطأن عیسایَ ببرده اورشلیم و اونَ معبدٚ صحنٚ بوجورترین جیگا سر بدأشته و بوگفته: «تو اگه خودا پسری، ترَ جٚه اَ جور تأود بیجیر، ۱۰ چونکی بینیویشته بوبوسته:
‹خودا خو فرشته‌یأنَ دستور دهه ترَ موحافظت بوکونید؛
۱۱ اوشأن ترَ خوشأنٚ دسأنٚ میأن دأریدی و ونألیدی تی پا سنگَ بوخوره.›»#۴:۱۱ مزمور ۹۱ آیه ۱۱ و ۱۲
۱۲ عیسی وأگردسته بوگفته: «خودا کلام هَطویی‌یم گه: ‹خوداوند، تی خودایَ نوأستی ایمتحان بوکونی.›» ۱۳ شیطأن کی دِه تومامٚ خو وسوسه‌یأنَ ایمتحان بوکوده، عیسایَ ایتأ مدتٚ زمأتی تنها بنَه.
۱۴ عیسی روح‌القدسٚ قوّت و قودرتٚ اَمرأ وأگردسته بمو جلیلٚ میأن و اونٚ شهرت تومامی‌یٚ او ناحیه میأن بپیچسته. ۱۵ اون یوهودیأنٚ کنیسه‌یأنٚ میأن تعلیم دَیی و تومامٚ مردومأن، اونَ ستایش کودیدی.
ناصره مردوم عیسی مسیحَ قوبیل نوکونیدی
۱۶ هَطویی بو کی عیسی بمو ناصره شهرٚ دورون، هویه کی پیلَّه بوسته‌بو. شنبه روزٚ رِه کی «شبّات» گفتیدی همیشه مأنستن بوشو کنیسه. هو وخت کی مراسم شروع بوبوسته، ویریشته کی خودا کلامَ بخوأنه. ۱۷ اِشعیای نبی طومارَ اونَ فدَه‌ییدی. عیسی طومارَ وازَ کوده کی ایتأ قسمتٚ میأن بینیویشته نهَه‌بو:
۱۸ «خوداوندٚ روح، می اَمرأ ایسه؛
اون مرَ مسح بوکوده
تا فقیرأنَ خوروم خبرَ فدم.
اون مرَ اوسه کوده کی اسیرأنٚ آزادی‌یَ اعلام بوکونم،
کورأنٚ چومأنَ وازَ کونم
ستم‌بیده آدمأنَ آزادَ کونم،
۱۹ و بشارت بدم کی او زمأت فأرسه کی خوداوند اینسأنَ لطف و موحبت بوکونه.»#۴:۱۹ اِشعیای نبی، باب ۶۱، آیه ۱ تا ۲
۲۰ بأزین طومارَ دٚوٚسته، کنیسه رئیسَ فدَه و بینیشته کی مردومَ تعلیم بده. همه‌تأن کنیسه دورون اونَ فندرستیدی. ۲۱ عیسی شروع به گب زِئن بوکوده و اوشأنَ بوگفته: «هَطو کی ایمروز می گبأنَ گوش دَئن دیبید، اَ طومارٚ نیویشته‌یأن انجام بوبوسته.»
۲۲ همه‌یٚ اوشأنی کی اویه ایسَه‌بید عیسی نیکویی جأ تعریف کودید و جٚه فیض‌بخشٚ کلمه‌یأنی کی گفتی تعجب کودیدی و گفتید: «مگه اَن یوسفٚ زأی نی‌یه؟» ۲۳ عیسی اوشأنَ بوگفته: «هیچ شکی نأرم کی اَ ضرب‌المثلَ مِرِه اَوریدی کی ‹اگه طبیب ایسی، خودتَ شفا بدن› و گیدی، او معجزه‌یأنی کی کفرناحومٚ میأن بوکودی، تی شهرٚ میأنم بوکون.›» ۲۴ هَطو بوگفته: «آمین#۴:۲۴ یوهودیأن وختی ایتأ کلامَ ایشنأوستیدی و خوأستید اونَ تأیید بوکونید، اصطلاحٚ «آمینَ» بکار بردیدی و اونٚ معنی اَنه کی «هَطو ببه» یا «حقیقت هَطو ایسه.» ولی عیسی مسیح اَ کلمه‌یَ اوّلٚ خو جمله‌یأن بکار بردی کی درستی و صحتٚ خو کلامَ تأکید بوکونه. بعداً مسیحیأن «آمینَ» در آخرٚ دوعا یا بعدٚ ایشنأوستنٚ خودا کلام به کار ببردید. شمرَ گم کی هیچ پیغمبر خو شهرٚ دورون موردٚ قوبیل نی‌یه. ۲۵ وأ بدأنید کی الیاسٚ نبی زمأتٚ رِه، سه سال و شیش ماه آسمانٚ جأ هیچ وارش نوأرسته و ایتأ پیله‌دأنه قحطی تومامی‌یٚ زیمینَ بیگیفته. هو وخت ایتأ عالمه وِئوه زنأی ایسرائیلٚ دورون ایسَه‌بید. ۲۶ خودا، الیاسَ اوشأنٚ هیچ کودام ورجأ اوسه نوکوده، ولی اونَ اوسه کوده او وِئوه زنأکی کی غیریهودی بو و صَرفَِه شهرٚ میأن زندگی کودی کی صیدونٚ شهرٚ حومه بحیساب اَمویی. ۲۷ الیشع نبی زمأتم در نظر بدأرید کی ایتأ عالمه جوذامیأن ایسرائیلٚ دورون ایسَه‌بید، ولی هیکس جُز نعمانٚ سُریانی کی غیرٚ یهودی بو، شفا نیگیفته.»
۲۸ وختی تومامٚ اوشأنی کی کنیسه دورون ایسَه‌بید اَ گبأنَ بیشتأوستیدی، اوشأنَ غیظَ گیفته. ۲۹ اوشأن جٚه خوشأنٚ جا ویریشتیدی و عیسایَ شهرٚ جأ بیرونَ کودید و اونَ ببردید ایتأ بولندٚ تپه جور کی شهر اونٚ سر چأکوده بوبوسته‌بو کی تأودید بیجیر. ۳۰ ولی اون، جٚه اوشأنٚ میأن دوأرسته بوشو.
دیو بزه مردأکٚ شفا گیفتن
۳۱ بأزین عیسی بمو کفرناحوم، کی ایتأ جٚه جلیلٚ شهرأن ایسه و مردومأنَ شبّات روزٚ رِه کنیسه دورون تعلیم دَیی. ۳۲ مردومأن اونٚ تعلیمٚ جأ تعجب کودیدی چونکی اون، قودرت و قوّتٚ اَمرأ گب زه‌یی. ۳۳ کنیسه دورون ایتأ مردای ایسَه‌بو کی پلیدٚ روح دأشتی. او مردای ایجگره اَمرأ فریاد بزه، بوگفته: ۳۴ «اَی عیسایٚ ناصری، اَمی اَمرأ چی کار دأری؟ بمویی کی اَمرَ نابودَ کونی؟ تو او ‹قدوسٚ خودا› ایسی. ترَ خُب شنأسمه.» ۳۵ عیسی اونٚ سر تشر بزه و بوگفته: «ساکیتَ بو و اونٚ جأ بیرون بیأ!» پلیدٚ روحم او مردأکَ، مردومأنٚ چومأنٚ جُلُو تأودَه زیمینٚ سر و بدونٚ اَنکی اونَ آسیب بزنه، اونَ ترکَ کوده. ۳۶ همه‌تأن تعجبٚ اَمرأ کس‌کسَ بوگفتید: «اَ تعلیم چیسه؟ اون حتی ایقتدار و قودرتٚ اَمرأ پلیدٚ روحأنَ دستور دهه و اوشأن آدمأنٚ جأ بیرون اَییدی!» ۳۷ هَطویی بو کی عیسی شهرت، تومامی‌یٚ او ناحیه میأنی بپیچسته.
شمعونٚ پطرسٚ زن‌مار و خیلی‌یأنٚ دیگرٚ شفا گیفتن
۳۸ عیسی کنیسه جأ بیرون بمو و بوشو شمعونٚ پطرسٚ خانه. شمعونٚ زن‌مار تبٚ جأ سوختن دوبو و اوشأن عیسایَ ایلتماسٚ اَمرأ بخوأستیدی کی اونَ شفا بده. ۳۹ عیسی شمعونٚ زن‌مارٚ سرٚ جور بِیسه و تبَ نهیب بزه و اونٚ تب قطَ بوسته و هو لحظه جٚه خو جاجیگاه ویریشته و اوشأنٚ جأ پذیرایی بوکوده.
۴۰ شبّات روز تومامَ بوستن دوبو کی مردومأن خوشأنٚ مریضأنَ کی جورواجورٚ ناخوشی‌یأن دأشتیدی عیسی ورجأ اَوردیدی و عیسی خو دسَ اوشأنٚ رو نهَه‌یی و اوشأنَ شفا دَیی. ۴۱ پلیدٚ روحأنم کی خیلی مردومأنٚ جأ بیرون اَموییدی ایجگره کونان گفتیدی: «تو خودا پسری!» امّا عیسی اوشأنَ تشر زه‌یی، ونأشتی گب بزنید چره کی اوشأن دأنستیدی کی اون هو مسیحٚ موعود ایسه.
۴۲ صُب خروس خوأنٚ موقع بو کی عیسی شهرٚ جأ خارجَ بوسته و بوشو ایتأ خلوتٚ جا. مردومأنم اونَ دونبألسر بوشوییدی. وختی او جایی کی اون ایسَه‌بو فأرسه‌ییدی، سعی کودیدی ونألید کی عیسی جٚه اوشأنٚ ورجأ بشه. ۴۳ عیسی وأگردسته، اوشأنَ بوگفته: «من وأ خودا پادشایی خوروم خبرَ شهرأنٚ دیگرَ فأرسأنم، چونکی خودا هَه جور کارأنٚ وأسی مرَ اوسه کوده.» ۴۴ هَطویی بو کی اون خو پیغامَ، یهودیه کنیسه‌یأنٚ دورون اعلام کودی.
Currently Selected:
لوقا ۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
