لوقا ۳
۳
یحیی مردومأنٚ‌ره پیغام دهه
۱ طیبریوسٚ قیصرٚ#۳:۱ قیصر ینی امپراطور، کسی کی پادشا مأنستنه ولی خورَه پادشا نأنه. حکومتٚ پونزدهمی سال بو کی پنتیوسٚ پیلاطس یهودیه اوستانٚ فرماندار بو و هیرودیس اوستانٚ جلیل حاکم بو و اونٚ برأر فیلیپُس، ایتوریه اوستان و ترخونیتسٚ نواحی حاکم بو و لیسانیوسم آبلیه منطقه حاکم بو، ۲ هو وختأنی کی حَنّا و قیافا کاهنأنٚ اعظم بید، خودا کلام بیابانٚ دورون یحیی، زکریا زأکَ فأرسه. ۳ یحیی تومامی اردنٚ روخانٚ نواحی شویی و مردومٚ رِه اعلام کودی کی وأ خوشأنٚ گونایأنٚ وأسی توبه بوکونید و تعمید بیگیرید کی خودا اوشأنٚ گونایأنَ ببخشه. ۴ هوطویی کی اشعیای نبی کیتابٚ میأن بمو:
«اینفرٚ صدا بیابانٚ دورون فریاد زنه:
«‹خوداوندٚ رأیَ آمادَه کونید،
و اونٚ طریقَ هموارَ کونید.
۵ تومامٚ درّه‌یأن پورَ بیدی
و تومامٚ کوه و تپه‌یأن صافَ بیدی،
و همه‌یٚ کجیأنم راستَ بیدی،
تومامٚ ناهموارٚ رأیأن هموارَ بیدی،
۶ بأزین همه‌یٚ آدمأن خودا نجاتَ خوشأنٚ چومأنٚ اَمرأ دینیدی.›»
۷ خیلی‌یأن اَموییدی کی یحیی دسٚ جأ تعمید بیگیرید و یحیی اوشأنَ گفتی: «شومأنی کی افعی زأکیدی، کی شمرَ بوگفته دره کی تأنیدی او غضبٚ جأ کی اَمون‌دره جیویزید؟ ۸ شیمی توبه‌یَ وأ شیمی کردکارأنٚ اَمرأ نیشأن بدید. شیمی ورجأ نیگید کی: ‹اَمی جد ایبراهیمه و خودا غضبٚ جأ در اَمأن مأنیمی›. وأ بدأنید کی خودا تأنه اَ بیابانٚ سنگأنٚ جأ ایبراهیمٚ‌ره زأی چأکونه. ۹ هسأ خوداوندٚ داوری تیشه درختأنٚ ریشه سر نهَه. هر داری کی خوروم میوه‌یَ نأوره، وأوِه به و آتشٚ میأن تأوده به.» ۱۰ مردومأن اونٚ جأ وأورسه‌ییدی: «هسأ چی وأ بوکونیم؟» ۱۱ یحیی وأگردسته بوگفته: «اونی کی دوتأ پیرهن دأره، وأ ایتأیَ فده اونی‌یَ کی نأره و هر کی‌یم خوراکی دأره وأ هَه کارَ بوکونه.» ۱۲ اوشأنی‌یم کی باجگیر بید و بمو بید تعمید بیگیرید، یحیی جأ وأورسه‌ییدی: «اوستاد، اَمأن چی وأ بوکونیم؟» ۱۳ یحیی اوشأنَ بوگفته: «ویشتر جٚه اونچی کی دولت تعیین بوکوده نوأستی باج و خراج فیگیرید.» ۱۴ سربازأنم وأورسه‌ییدی: «اَمأن چی وأ بوکونیم؟» یحیی اوشأنَ بوگفته: «زورٚ اَمرأ هیکسٚ جأ پول فئنگیرید، تهمت و ایفترا نوأ زِئنید و به شیمی حق و حقوق قانع بیبید.»
۱۵ مردومأنی کی مسیحٚ موعودَ رافا ایسَه‌بید خوشأنٚ جأ وأورسه‌ییدی: «ممکنه یحیی هو مسیح ببه؟» ۱۶ یحیی اوشأنَ بوگفته: «من شمرَ آبٚ اَمرأ تعمید دهم ولی اینفر اَیه کی می جأ پیله‌تره و من لایق نی‌یم کی اونٚ کفشٚ بندَ وازَ کونم. اون شمرَ روح‌القدس و آتشٚ اَمرأ تعمید دهه. ۱۷ اون خو خرمن‌کوبی چنگکَ خو دسأنٚ میأن دأره کی خو خرمنَ پاکَ کونه و گندمأنَ انبارٚ دورونی جمَ کونه ولی کاهَ آتشٚ دورون کی هی ذرّه خاموشَ نیبه، سوجأنه.»
۱۸ یحیی، خیلی پند و اندرزأنٚ دیگرٚ اَمرأیم، مردومأنَ نجاتٚ خوروم خبرَ فدَیی و اوشأنٚ رِه گب زه‌یی. ۱۹ اون، هیرودیسٚ حاکمَ توبیخ بوکوده چونکی خو برأرزن هیرودیا اَمرأ عروسی بوکوده‌بو#۳:۱۹ هیرودیسٚ برأر زنده بو ولی اون خو برأرزنَ چشم دأشتی، پس خو زنَ طلاقَ ده و خو برأر زنٚ اَمرأ عروسی بوکوده. و بازم شیطأنی کردکارأن انجام بدَه‌بو. ۲۰ بأزین هیرودیس یحیایَ زندان تأودَه. اَطویی ایتأ دِه خطا به خو خطایأن ایضافَه کوده.
عیسی مسیحٚ تعمید گیفتن و اونٚ شجره‌نامه
۲۱ وختی کی همه‌تأن تعمید گیفتیدی، عیسی‌یم یحیی دسٚ جأ تعمید بیگیفته و هَطویی کی دوعا کودن دوبو، آسمان وازَ بوسته. ۲۲ روح‌القدس کوترٚ#۳:۲۲ کوتر ینی کبوتر مأنستن عیسایَ نازلَ بوسته و آسمانٚ جأ ایتأ صدا بمو کی: «تو می جانٚ دیلٚ پسری کی تی جأ راضی‌یم.»
۲۳ عیسی حدودٚ سی سال دأشتی کی خو خدمتَ مردومٚ رِه شروع بوکوده. همه‌تأن فیکر کودیدی کی اون یوسفٚ پسره. یوسف، هالی پسر بو،
۲۴ هالی متاتٚ پسر،
متات لاوی پسر،
لاوی مِلکی پسر،
مِلکی ینا پسر
و ینا هم یوسفٚ پسر.
۲۵ یوسف مَتاتیا پسر،
مَتاتیا أموسٚ پسر،
آموس ناحومٚ پسر،
ناحوم حِسلی پسر،
حِسلی هم نَجی پسر،
۲۶ نَجی مأتٚ پسر،
مأت مَتاتیا پسر،
مَتاتیا شِمعی پسر،
شِمعی یوسِکٚ پسر،
یوسِک یهودا پسر،
۲۷ یهودا یوحنا پسر،
یوحنا ریسا پسر،
ریسا زروبابلٚ پسر،
زروبابل شالتیئیلٚ پسر،
شالتیئیل نیری پسر،
۲۸ نیری مِلکی پسر،
مِلکی اَدی پسر،
اَدی قوسامٚ پسر،
قوسام ایلمودامٚ پسر،
ایلمودام عیرٚ پسر،
۲۹ عیر یوسی پسر،
یوسی الیعزارٚ پسر،
الیعزار یوریمٚ پسر،
یوریم مَتاتٚ پسر،
مَتات لاوی پسر،
۳۰ لاوی شَمعونٚ پسر،
شَمعون یهودا پسر،
یهودا یوسفٚ پسر،
یوسف یونان پسر،
یونان ایلیاقیمٚ پسر،
۳۱ ایلیاقیم مِلیا پسر،
مِلیا مینانٚ پسر،
مینان مَتاتا پسر،
مَتاتا ناتانٚ پسر،
ناتان داوودٚ نبی پسر،
۳۲ داوودٚ نبی یَسی پسر،
یَسی عوبیدٚ پسر،
عوبید بوعزٚ پسر،
بوعز سَلمونٚ پسر،
سَلمون نَحشونٚ پسر،
۳۳ نَحشون عمینادابٚ پسر،
عمیناداب ارامٚ پسر،
ارام حِصرونٚ پسر،
حِصرون فارصٚ پسر،
فارص یهودا پسر،
۳۴ یهودا یعقوبٚ پسر،
یعقوب ایسحاقٚ پسر،
ایسحاق ایبراهیمٚ نبی پسر،
ایبراهیمٚ نبی تارحٚ پسر،
تارح ناحورٚ پسر،
۳۵ ناحور سروجٚ پسر،
سروج رعو پسر،
رعو فالجٚ پسر،
فالج عابرٚ پسر،
عابر صالحٚ پسر،
۳۶ صالح قینانٚ پسر،
قینان ارفکشادٚ پسر،
ارفکشاد سامٚ پسر،
سام نوحٚ پسر،
نوح لامَکٚ پسر،
۳۷ لامَک متوشالَح پسر،
متوشالَح خنوخٚ پسر،
خنوخ یاردٚ پسر،
یارد مَهلئیلٚ پسر،
مَهلئیل قینانٚ پسر،
۳۸ قینان انوشٚ پسر،
انوش شیثٚ پسر،
شیث آدمٚ پسر،
آدم خودا پسر بو.
Currently Selected:
لوقا ۳: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
