لوقا ۲
۲
عیسی مسیحٚ تولد
۱ او روزأن آگوستوس کی رومٚ امپراطور بو، خو سرزیمینأنٚ تومامٚ مردومأنٚ رِه ایتأ فرمان کی اوشأن سرشماری بیبید. ۲ اَن رومٚ آدمأنٚ اوّلی سرشماری بو و او زمأت ایتفاق دکفته کی کورینیوس، سوریه فرماندار بو. ۳ اَ شمارش بوستنٚ وأسی هر کی بوشو خو شهر. ۴ یوسفم جٚه شهرٚ ناصره کی اوستانٚ جلیلٚ میأن نهَه‌بو، رأ دکفته بوشو داوودٚ پادشا زادگاه، ینی شهرٚ بیت‌لحمٚ اوستانٚ یهودیه، چونکی اون، داوودٚ خاندانٚ جأ بو. ۵ مریم حامله بو و یوسفٚ نامزد بو. پس اونَ خو اَمرأ ببرده کی ایسم‌نویسی بوکونید. ۶ هو وخت کی اوشأن بیت‌لحمٚ دورون ایسَه‌بید، مریمٚ فارغَ بوستنٚ وخت فأرسه ۷ و اون، خو اوّلی زأکَ کی پسر بو بدونیا بأورده. بأزین اونَ قونداقٚ میأن دٚوٚسته و آخورٚ دورون بوخوسأنه، چونکی اوشأنٚ رِه مسافرخانه دورون جایی ننَه‌بو کی بئسید.
خودا فرشته‌یأن، چوپانأنٚ ورجأ ظاهیرَ بیدی
۸ هو دور و اطراف، چوپانأنی دشتٚ میأن ایسَه‌بید کی شبٚ موقع خوشأنٚ گله‌یأنٚ جأ مواظبت کودیدی. ۹ خوداوندٚ فرشته، ایدفعه‌یی چوپانأنٚ جُلُو ظاهیرَ بوسته و خودا شکوه و جلالٚ نور اوشأنٚ دور و اطراف دتأوسته و همه‌تأن خیلی بترسه‌ییدی. ۱۰ فرشته وأگردسته اوشأنَ بوگفته: «نوأ ترسئنید، من ایتأ خوروم خبرٚ پیله شادی‌یَ شِمرِه اعلام کونم کی تومامیٚ آدمأنٚ شینه. ۱۱ داوودٚ نبی شهرٚ میأن ایمروز ایتأ نجات‌دهنده شِمرِه بدونیا بمو کی مسیح و خوداونده. ۱۲ اونٚ نیشأنه شِمرِه اَنه کی ایتأ زأی قونداق دٚوٚسته و آخورٚ میأن خوفته، یأفیدی. ۱۳ ایدفعه‌یی او فرشته اَمرأ ایتأ پیله‌دأنه دسته جٚه آسمانی لشکر ظاهیرَ بوسته کی خودایَ ستایش کودیدی و گفتیدی:
۱۴ «جلال بر خودا بوجورترین آسمانأنٚ جور
و زیمینٚ میأنی مردومأنی رِه کی موردٚ اونٚ لطفٚ ایسیدی، صلح و سلامتی ببه.»
۱۵ بأزین کی فرشته‌یأن چوپانأنَ ترکَ کودیدی و همه‌تأن وأگردستید آسمانٚ جور، چوپانأن کس‌کسَ بوگفتیدی: «بأیید بیشیم بیت‌لحم و ایتفاقی‌یَ کی دکفته و خوداوند اَمرَ اونٚ جأ وأخبرَ کوده، جٚه نزدیک بیدینیم.»
۱۶ هَنٚ وأسی عجله اَمرأ بوشوییدی و مریم، یوسف و او زأکی‌یَ کی آخورٚ میأن خوفته‌بو، بیأفتیدی. ۱۷ وختی کی زأکَ بیده‌ییدی و او چیزی کی درباره‌یٚ اون، فرشته‌یأنٚ جأ بیشنأوسته‌بید تعریف بوکودید، ۱۸ تومامٚ کسأنی کی چوپانأنٚ گبأنَ ایشنأوستیدی تعجب بوکودید. ۱۹ ولی عیسی مار، مریم، تومامٚ اَ گبأنَ خو خأطرٚ میأن ایسپردی و خو دیلٚ میأن اوشأنٚ فیکر کودی. ۲۰ وختی چوپانأن وأگردستَن دیبید، او چیزأنٚ وأسی کی بیشنأوسته‌بید و خوشأنٚ چومأنٚ اَمرأ بیده‌بید، خودایَ شوکر و سپاس گفتیدی، چونکی هر چی کی بیشنأوسته‌بید هوطویم بوبوسته.
عیسی مسیحٚ تقدیم کودن، معبدٚ صحنٚ میأن
۲۱ ایتأ هفته بعد، کی زأکٚ ختنه کودنٚ زمأت فأرسه، اونَ «عیسی» نام بنَه‌ییدی، هو نامی کی خودا فرشته، قبلٚ اَنکی مریم شکم اوسأنه، اونٚ‌ره بنَه‌بو.
۲۲ وختی پاکَ بوستنَ روزأن، موطابیقٚ موسی شریعت تومامَ بوسته، زأکَ بأوردید اورشلیم کی خوداوندٚ تقدیم بوکونید، ۲۳ اَطو کی خوداوندٚ شریعتٚ دورون بینیویشته بوبوسته: «اوّلی زأکی کی پسره، وأ مرَ تقدیم ببه» ۲۴ و تا هَطو کی شریعتٚ دورون بمو: «ایتأ جوفت کوتر و یا دوتأ جوانٚ یأکریم» قوربانی بوکونید.
۲۵ او وخت اورشلیمٚ دورون ایتأ مردای زندگی کودی شمعون نام کی دوروستکار و پارسا بو و همیشه اینتظارٚ او کسی‌یَ کشه‌یی کی وأستی ایسرائیلَ غم و قورصه جأ راحتَ کونه و روح‌القدس اونٚ اَمرأ بو. ۲۶ اونَ روح‌القدسٚ جأ الهام بوبوسته‌بو کی قبلٚ اَنکی خوداوندٚ مسح بوبوسته‌یَ بیدینه، نیمیره. ۲۷ شمعون، روح‌القدسٚ هیدایتٚ اَمرأ معبدٚ صحنٚ دورون بمو. بأزین، وختی عیسی پئر و مار، زأکَ بودورون بأوردیدی کی شریعتٚ رسمَ بجا بأورید، ۲۸ شمعون زأکَ کشَ گیفته و خودایَ ستایش بوکوده و بوگفته:
۲۹ «هسأ اَی خوداوند، هَطو کی مرَ وعده بدَه‌بی،
تی خادمَ سلامتی اَمرأ مرخصَ کون،
۳۰ چونکی می چومأن تی نجاتَ بیده،
۳۱ هو نجاتی کی تو همه‌یٚ میلتأنٚ رِه آمادَه کودی.
۳۲ اون، هو نوری ایسه کی غریبه میلتأنٚ فیکرأنَ روشنَ کونه
و تی قوم، ایسرائیلَ سربولندَ کونه.»
۳۳ یوسف و مریم او گبأنٚ جأ کی خوشأنٚ زأی، عیسی رِه بوگفته بوبوسته تعجب کودیدی. ۳۴ شمعون اوشأنٚ رِه دوعایٚ خیر بوکوده و عیسی مار، مریمَ بوگفته: «شیمی زأی، ایسرائیلٚ دورون باعیثٚ سربلوندی‌یٚ اوشأنی به کی اونَ ایمأن اَوریدی و سقوطٚ اوشأنی کی اونَ ایمأن نأوریدی و ایتأ نیشأنه کی اونٚ جُلُو ایسیدی ۳۵ و اَطویی خیلی‌یأنٚ دیلٚ فیکر آشکارَ به و غم و غورصه ایتأ خنجرٚ مأنستن تی دیلٚ میأن خوره.»
۳۶ اویه ایتأ پیرٚ زنأی زندگی کودی کی نبیّه بو و حَنّا نام دأشتی. حَنّا فنوئیلٚ زأی و اَشیرٚ طایفه جأ بو. اون وختی عروسی بوکوده، هفت سال خو مردٚ اَمرأ زندگی بوکوده. بأزین اونَ جٚه دس بدَه ۳۷ و هشتاد و چار سالگی وِئوه بو. اون هیوخت معبدٚ صحنٚ جأ بیرون نمویی و شب و روز دوعا و روزه اَمرأ خودایَ عیبادت کودی. ۳۸ اون هو وخت جُلُو بمو، خودایَ شوکر بوکوده و همه‌تأنٚ‌ره کی اینتظار کشه‌ییدی تا خوداوند اورشلیمَ نجات بده، جٚه او زأی گب بزه.
۳۹ عیسی پئر و مار بعدٚ اَنکی تومامٚ خوداوندٚ شریعتَ بجا بأوردیدی، وأگردستیدی بوشوییدی خوشأنٚ شهر، ناصره، کی جلیلٚ میأن نهَه. ۴۰ او زأی، هوطو کی پیلَّه بوستَن دوبو و قوی هم بوستی، خودا حکمتٚ جأ پورَ بوستی و خودا لطفم اونٚ اَمرأ بو.
عیسی مسیحٚ نوجوان معبدٚ صحنٚ دورون
۴۱ عیسی پئر و مار همه‌تأ سال عید فصحٚ وأسی شوییدی اورشلیم. ۴۲ وختی عیسی دوازده ساله بو، اوشأن عیدٚ رسم و رسوماتٚ وأسی بوشویید اویه. ۴۳ بعدٚ اونکی عیدٚ روزأن تومامَ بوسته، وأگردستید خوشأنٚ شهر ولی عیسایٚ نوجوان اویه بِیسه، بدونٚ اَنکی اوشأن بدأنید. ۴۴ مریم و یوسف، اَ خیالٚ اَمرأ کی اوشأنٚ زأی کاروانٚ میأن ایسَه، ایتأ روزٚ تومام، خوشأنٚ سفرَ ایدامه بدَه‌ییدی. بأزین دوستأن و فک و فامیلأنٚ ورجأ خوشأن زأکَ دونبأل بگردستیدی کی اونَ بیأفید. ۴۵ ولی چون اونَ نیأفتید، مجبورَ بوستید وأگردید اورشلیم. ۴۶ سه روز بوگوذشته‌بو کی اوشأن عیسایَ معبدٚ صحنٚ دورون بیأفتید و بیده‌یید معلمأنٚ ورجأ نیشته، اوشأنٚ گبأنَ گوش کودی و اوشأنٚ جأ سؤال وأورسه‌یی. ۴۷ همه‌یٚ اوشأنی کی عیسی گبأنَ گوش کودیدی اونٚ جواب دَئن و اونٚ هوش و ذکاوتٚ جأ تعجب کودیدی. ۴۸ عیسی پئر و مار وختی عیسایَ بیده‌ییدی، تعجب بوکودیدی و مریم اونَ بوگفته: «زأی جان، چره اَمی اَمرأ اَطویی بوکودی؟ من و تی پئر، دیل‌نیگرانی اَمرأ تی دونبأل بگردستیم.» ۴۹ عیسی وأگردسته بوگفته: «چره می دونبأل گردستیدی؟ مگه نأنیدی کی من وأ می پئرٚ خانه بِیسم؟» ۵۰ ولی اوشأن نفهمستید عیسی چی گفتن دره. ۵۱ عیسی اوشأنٚ اَمرأ وأگردسته ناصره و اوشأنٚ جأ ایطاعت کودی و اونٚ مار، مریم، همه چی‌یَ خو خأطرٚ میأن ایسپردی. ۵۲ عیسی، حکمت و قامتٚ اَمرأ پیلَّه بوستی و خودا و مردومٚ جأ موردٚ قوبیل بو.
Currently Selected:
لوقا ۲: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
