SOERA JOBI FAZA 35.
FAZA 35.
Tohoetohoe: I. Lõ hare Lowalangi ba lõ teʼalania, he na satoelõ niha ba he na samazõchi horõ. II. Na lõ ifondrondrongo wangarõngarõ zeboea famakao, ba bõrõ wangaloeira bõli gõlõ.
1I. Ba itohoegõ hoehoeonia Elihoe, imane:
2”Hadia, daʼõ zatoelõ õw̃aʼõ, wangoemaʼõ: satoelõ ndraʼo fõna Lowalangi,
3wa õsofoe, hadia goenania chõoe: ’Hadia haregoe moroi na oefazõchi horõ’? (F. 34, 9).
4Daʼoeboeʼa chõoe ba chõ zi fahoewoe chõoe andrõ, awõoe.
5Faõga hõrõoe mijaw̃a, ba mbanoea, nehegõ lawoeo andrõ, si no alaw̃a jaw̃aoe.
6Na õfazõchi horõ, ba heza iroegi ia? ba na oja lalõoe, ba hezo zi teʼala ia?
7Na satoelõ ndraʼoegõ, ba hadia gameʼelaoe chõnia, ba hadia nitemania ba dangaoe? (F. 22, 2. Rom. 11, 35).
8Ba niha si mane jaʼoegõ manandrõsa walõsõchioe; ba chõoe, jaʼoegõ ono niha, manandrõsa waʼatoelõmõ.
9II. Mangarõngarõ sa niha ba waʼafahõna wamalangõgõ, ba mangandrõ tolo ba wamakao zalaw̃a,
10ba lõ sangoemaʼõ: ’Hezo Lowalangi, sombõi jaʼodo, sangoroʼõ fanoenõ, ba zi bongi, (Sin. 19, 3; 42, 9),
11sameʼe famahaõ jaʼita oetoe ndroeʼoe andrõ, ba fangatoeatoeada fofo ba daloe mbanoea?’
12Ba laʼangarõfi li ia, ba lõ ifondrondrongo chõra, bõrõ wajaw̃asa zeboea horõ andrõ. (F. 27, 9. Jer. 11, 11).
13Lõʼõ, fajafaja, ba lõ irongo Lowalangi, lõ itõngõni Si lõ ambõ faʼabõlõ;
14bõhõi wa õw̃aʼõ, lõ oroma ia chõoe; no so ba doedoema hõrõnia hoehoeo andrõ ba õdõnadõna chõnia.
15Ba iadaʼe, me lõʼõ na si tesao wõnoenia, fotoe, ba hadia, lõʼõ manõ niʼilania maõ fajaw̃asa andrõ?
16Ba tobali fajafaja nilaoe Jobi, fahõna hoehoeo, ba lõ faʼaboto ba dõdõ.”
Currently Selected:
SOERA JOBI FAZA 35.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.