SOERA JOBI FAZA 34.
FAZA 34.
Tohoetohoe: I. Itegoe hoehoeo Jobi Elihoe, me lõ si fadoehoe dõdõnia ba waʼatoelõ Lowalangi. II. Lowalangi, si no mangila fefoe hadia ia ba si no fondrege zatoelõ, ba lõ eboea dõdõ zamboeana. III. Lõ tola itegoe niha wamatõrõ Lowalangi andrõ.
1I. Ba itohoegõ Elihoe, imane:
2”Mifondrongondrongo niw̃aʼõgoe, jaʼami satoeatoea, ba mibeʼe mbõrõ dalingami, jaʼami si so tõdõ!
3Itandra sa daroma li tõgi dalinga, si mane fanandra gararo gõ. (F. 12, 11).
4Dataʼaloealoei zatoelõ, enaʼõ faoma tasõndra zi sõchi.
5Noa sa imane Jobi: ’Lõ horõgoe, ba tenga ba lala ifatõrõ chõgoe Lowalangi.
6Hadia, mofaja ndraʼo, lõ lai wa no lala chõgoe? No gõnado ono wana si tebai nifadõhõ, ba lõ horõgoe.’ (F. 13, 18; 27, 2).
7Heza so niha si mane Jobi andrõ, samamadoe idanõ fanandraw̃a, (F. 15, 16),
8si mõi awõ zolaoe si lõ sõchi ba si fao ba zanao horõ? (Sin. 1, 1).
9Noa sa imane: ’Lõ hare niha, na fahoewoe ia chõ Lowalangi’. (F. 22, 2 b. t.)
10Andrõ mifondrongondrongo chõgoe, jaʼami si so faʼaboto ba dõdõ: Bõi manõ taw̃aʼõ, ilaoe zi lõ sõchi Lowalangi ba ifatõrõ zi lõ atoelõ Si lõ ambõ faʼabõlõ! (Moz. V. 32, 4. Ngaʼõt. II. 19, 7. Rom. 9, 14).
11Lõʼõ, ha folaoe niha isoelõni chõnia, dali wamatõrõnia ba niha mboeaboea niha. (Sin. 62, 13. Jer. 32, 19. Mat. 16, 27. Kor. II. 5, 10. Kol. 3, 25. Fet. I. 1, 17).
12Si ndroehoe, lõ ibilaʼõ lala Lowalangi, ba lõ iwoeʼai hoekoe Si lõ ambõ faʼabõlõ.
13Ha niha zameʼe ba dangania tanõ? Ba ha niha zolata tanõʼa maʼafefoe?
14Na ha jaʼia zi so ba dõdõnia enaʼõ, na ibõda Gehehania ba hanoehanoenia andrõ, (Sin. 104, 29. Sangomb. 12, 7),
15ba ahori adoedoe nõsi goeli danõ fefoe, ba ifoeli tobali gawoegawoe niha.
16II. Na si so tõdõ ndraʼoegõ, ba fondrondrongo daʼe, beʼe mbõrõ dalingaoe ba daroma ligoe!
17Hadia, tola maõ samatõrõ zi lõ omasi satoelõ? Ma õbaliʼõ si lõ atoelõ Zi lõ ambõ faʼatoelõ andrõ? (Moz. I. 18, 25. F. 8, 3).
18Jaʼiá andrõ, sangoemaʼõ chõ razo: ’Si lõ ngaroro ndraʼoegõ!’ ba ba zi so tõi: ’Seboea horõ ami!’
19Si lõ mamaigi bawa zalaw̃a ba si lõ eboea tõdõ ba zoʼanaʼa, moroi ba zi noemana, me no nilaoe dangania dozi ira. (Moz. V. 10, 17. F. 34, 27).
20Iʼogomoezaõ mate ira, ba na taloe mbongi, ba tefahisi soi niha, ba taja; tetimba zabõlõ, ba tenga tanga niha.
21Anehe sa ia lala zamõsana, fefoe mbekania, ba iʼila. (Ngaʼõt. II. 16, 9).
22Lõ si bongi ba lõ sogõmigõmi sibai, ba nibiniʼõ zamazõchi si lõ sõchi jaʼira enaʼõ. (Sin. 139, 12).
23Alacha sa lõ ifaigifaigi niha, enaʼõ iʼondrasi Lowalangi, nihoekoe.
24Ifoefoe zabõlõ, lõ moesechegõ, ba ibeʼe fangalira niha bõʼõ.
25Tobali aboto ba dõdõnia mboeaboeara ba ba zi bongi itimba ira, ba afoefoe.
26Ihareʼõ chõra mbõzibõzi, si mane ba zi no manao horõ, ba ba zanehe niha fefoe.
27Bõrõ wa no fabali ira chõnia awõ wa lõ ba dõdõra lala andrõ chõnia fefoe,
28ba wamarongogõ chõnia si jaw̃a fangarõngarõ zi noemana, ba enaʼõ irongo wegeʼege zeboea famakao.
29Ba na ifaigi wondrara, ba ha niha zangoehoekoe [jaʼia]? Ba na ibiniʼõ mbawania, ba ha niha zangila jaʼia? He ba zato ba he ba zi ha samõsamõsa gõi. (Jes. 50, 9. Rom. 8, 34).
30Enaʼõ lõ mõi salaw̃a niha si lõ sõchi, fa bõi tandraw̃a ba niha.
31Hadia sa, taw̃aʼõ maõ chõ Lowalangi: ’Oeloeʼi; lõ oelaoe zi lõ sõchi; (Ngen. Jer. 3, 27);
32hadia zi lõ iʼila hõrõgoe, ba oromaʼõ chõgoe: na no oelaoe zi lõ atoelõ, ba oebato saʼae?’
33III. Hadia, ifatõrõ ba zomasi ndraʼoegõ wanoelõni; me no õkõkõni; tobali jaʼoegõ zangoehoekoe, ba tenga jaʼodo? Ba hadia niʼilaoe, ba faloea baeha!
34Niha si so faʼaboto ba dõdõ ba niha satoeatoea, samondrongo chõgoe, ba lamane chõgoe:
35’Ba hoehoeo Jobi andrõ, ba lõ faʼaboto ba dõdõ, ba si lõ moetimba tõdõ niw̃aʼõnia andrõ.’
36Enaʼõ na tetandraigõ Jobi, iroegi ba wondrege, ba wamadaõnia andrõ, famadaõ zi so horõ!
37Inõnõ saʼae horõnia olalõw̃a; mangoʼaja ia, ba chõda andre, ba mangõhõna famadaõ chõ Lowalangi.
Currently Selected:
SOERA JOBI FAZA 34.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.