SOERA JOBI FAZA 33.
FAZA 33.
Tohoetohoe: I. Iʼandrõ chõ Jobi Elihoe, enaʼõ na ifondrongondrongo chõnia. II. Iʼotoeʼõ niha Lowalangi, ba wangehao jaʼia ba ba wangefaʼõ jaʼia ba waʼatekiko. III. Na iʼideʼideʼõ ia niha, ba ifoeli ifarongogõ chõnia waʼeboea dõdõ.
1I. ”Ba fondrongondrongo saʼae hoehoeogoe, jaʼoegõ Jobi, ba beʼe mbõrõ dalingaoe ba daroma ligoe andre fefoe.
2Hiza sa, oebokai mbawagoe, ba moehede lelagoe, barõ gararogoe.
3Moroi ba dõdõ sadõlõ ligōē andre; hadia niʼila mbewegoe, ba ifaloea, sadõlõ.
4Eheha Lowalangi zombõi jaʼodo, ba hanoehanoe Zi lõ ambõ faʼabõlõ wamonoso jaʼo.
5Na õʼila õboeʼa niw̃aʼõgoe, ba boeʼa; faʼanõ ndraʼoegõ oedoegoe, faoso!
6Hiza, no faoma ita chõ Lowalangi, no fagõlõgõlõ mbõrõtada laʼoeri. (Moz. I. 2, 7. F. 10, 9).
7Alacha lõ tokeaʼõ, wangataʼoefi jaʼodo, ba lõʼõ sa ilangõ ndraʼoegõ faʼeboeagoe. (F. 13, 21).
8II. Ba no oerongo niw̃aʼõoe — taroma lioe andrõ no oerongo [me õmane]:
9’Sohaoehaoe ndraʼo, lõ horõgoe; lõ sinegoe chõgoe ba lõ lalõ. (F. 16, 17).
10Hiza, fatioesa ifachai chõgoe, ibeʼe oedoenia ndraʼodo. (F. 13, 24).
11Ibeʼe ba galo gahegoe; idarodarogõ nitõrõgoe fefoe.’ (F. 13, 27).
12Hiza, daʼõ zi lõ atoelõ chõoe, oew̃aʼõ chõoe; noa sa eboea Lowalangi moroi ba niha.
13Hana wa fasoso ndraʼoegõ chõnia, wa no samboea lõ itema lioe?
14Hoemede sa Lowalangi, samoeza, mendroea — ba lõ tatõngõni. (F. 35, 13).
15Ba wangifi, ba gangilata ba zi bongi, na ihawoei niha femõrõ sabõlõbõlõ, ba wemõrõ andrõ ba gasora, (Moz. I. 20, 3; 31, 24. Dan. 4, 2. Mat. 2, 19),
16ba daʼõ ibokai dõgi dalinga niha ba ifotandro wanegoe jaʼira. (F. 36, 10).
17Ba wanenaw̃a niha, ba wolaoenia andrõ, ba ba wanimba ba ndra matoea fajaw̃asa.
18Irorogõ nosonia, fa lõ aechoe ba dõgi, fa lõ aetoe noso ba nono wana.
19Ba teʼotoeʼõ gõi ia faʼafõchõ, ba gasonia tooe; lõ mamalõmalõ wasõndrata andrõ ba dõlania.
20Ba ogoro ia gõnia ibeʼe nosonia andrõ, anoezoe dõdõnia zami chõnia mege. (Sin. 107, 18).
21Ariri nõsinia, irege lõ sõchisõchi saʼae, timba zi lõ oroma saʼae nõsinia andrõ, si no okõlikõli.
22Tobali sahatõ ba lewatõ nosonia, no sahatõ ba mbechoe samoenoe niha.
23III. Ba na so dania salahinia malaʼika si loeloei mangoemaʼõ, awõ ngahõnõ andrõ, ba wangoemaʼõ lala ba niha, (F. 23, 8. Moz. II. 23, 20),
24na ahachõ dõdõnia ia ba na imane: ’Orifi ia, ba bõi fonoemalõ ia ba gohokoho; no oetema hõli’, (Tim. I. 2, 6. Heb. 9, 12),
25awena dania ifoeli abeʼe nõsinia, timba nono matoea, mangawoeli ia ba gõtõ waʼonomatoea.
26Iʼangarõfi li Lowalangi, ba ihachõsi tõdõ ia; ifaʼeleʼõ chõnia mbawania, soewoeawoea dõdõ niha, ba isoelõni ba niha wolaoelaoenia satoelõ andrõ. (Sin. 50, 15. Jes. 58, 9).
27Manoenõ ia, ba zi so niha bõʼõ, imane: ’Noa sa oefazõchi horõ, ba no oebilaʼõ lala, ba lõʼõ sa moesoelõni chõgoe.
28No iʼorifi nosogoe, lõ ibeʼe noemalõ ba gohokoho, ba omoeso dõdõgoe ba zohaga.’
29Hiza, daʼõ fefoe ilaoe Lowalangi ba niha, irege mendroea, irege medõloe,
30ba wangefaʼõ ba gohokoho nosonia, enaʼõ hoemaga chõnia haga ba waʼaoeri andrõ. (Sin. 56, 14).
31Tõngõni, jaʼoegõ Jobi, fondrongondrongo chõgoe; bõi hedehede, hana na jaʼodo zi fahoehoeo!
32Na so chõoe daroma li, ba boeʼa niw̃aʼõgoe; hede manõ, amasido wamoeʼaoe.
33Ba na lõʼõ, ba õfondrongondrongo chõgoe; bõi hedehede, enaʼõ oefahaõ ndraʼoegõ ba waʼatoeatoea.”
Currently Selected:
SOERA JOBI FAZA 33.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.