SOERA JOBI FAZA 36.
FAZA 36.
Tohoetohoe: I. Faʼatoelõ Lowalangi andrõ, ba toʼele ba zeboea horõ ba ba zamalalini eraʼerania. II. Fanandrõsaigõ chõ Jobi. III. Faʼasalaw̃a Lowalangi ba faʼeboeania.
1I. Ba itohoegõ Elihoe, imane:
2”Baseʼõ maʼifoe chõgoe, ba oefahaõ ndraʼoegõ; so na sa niw̃aʼõ ba chõ Lowalangi andrõ.
3Ba zarõoe oehalõ waʼaboto ba dõdõgoe, ba oeʼohe ba lala hadia ia chõ zombõi jaʼodo.
4Si ndroehoe sa, tenga faja niw̃aʼõgoe; si no aʼoi so faʼaboto ba dõdõ zi fahoehoeo chõoe.
5Hiza, no sabõlõ Lowalangi, ba lõʼõ zoei iʼositengagõ niha, no fahõna waʼabõlõ waʼaboto ba dõdõ. (F. 9, 4; 12, 13).
6Lõ iʼorifi zeboea horõ; ba hoehoeo zeboea famakao, ba ibeʼe ba lala.
7Lõ ibõhõli wamaigi satoelõ tõdõ ba awõ razo ba dadaoma ifedadao ira, si lõ mamalõmalõ, enaʼõ salaw̃a ira. (Sam. I. 2, 8. Sin. 33, 18; 34, 16; 113, 8).
8Ba na no moerate ira, na no tofesoe ira fesoe famakao,
9na ifarongogõ chõra wolaoera, awõ horõra andrõ, wa no fajaw̃a ira,
10na tobali ibokai dõgi dalingara, ba wanenaw̃a andrõ, enaʼõ labõhõli zi lõ sõchi: (F. 33, 16).
11Ba na lafondrondrongo, na laʼoʼõ, ba sohahaoe tõdõ ira, ba weʼasora na ba goeli danõ, somoeso tõdõ ba zi tosai gõtõra.
12Ba na lõ lafondrondrongo, ba si mate ba nono wana dania ira; aetoe nosora lõ faʼaboto ba dõdõ.
13Ba niha si tefoejoe tõdõ, ba so mbao dõdõ, lõ fakao, na ifesoe ira;
14ba waʼaʼonomatoea aetoe nosora, mate ira, si mane sohorõhorõ.
15Seboea famakao, ba iʼorifi, ibeʼe fangorifinia wamakaonia andrõ; ba ibeʼe famokai dõgi dalingara waʼatosasara andrõ.
16II. Ba jaʼoegõ gõi, ba idõnisi, wangefaʼõ jaʼoegõ ba mbawa wamakao andrõ, iʼohe ba zebolo tanõ, ba zi lõ faʼatosasa, ba satabõ nifaʼoli tooe diwooe. (Sin. 18, 20; 23, 5).
17Ba no fahõna chõoe wangetoeʼõ hoekoe, si mane ba zeboea horõ; ba fangetoeʼõ hoekoe ba famatõrõ hoekoe, ba no fagoʼõ.
18Bõi ja ifowõhõ ndraʼoegõ ba wangoʼaja bao dõdõoe andrõ; ba bõi eloengoeʼõ ba waʼeboea hõli andrõ.
19Hadia, iʼefaʼõ ndraʼoegõ ba waʼatosasa andrõ feʼaoʼaomõ andrõ, na no aʼoi dõlaoe?
20Bõi ja hoemoeloe dõdõoe, enaʼõ na bongi, fa hoemoefa soi niha ba nahara.
21Angelama, bõi otahõgõ zi lõ sõchi; daʼõ sa zomasiʼõ, moroi ba wanaha famakao.
22III. Hiza, nifolaoe zalaw̃a wolaoe Lowalangi, ba waʼabõlõnia andrõ; heza so zamatõrõ, si mane jaʼia?
23Ha niha zamachoi chõnia lala, ba ha niha zangoemaʼõ: ’No õlaoe zi lõ atoelõ? (F. 34, 10).
24Aloei tõdõoe, enaʼõ õʼeboeaʼõ dõi wolaoenia andrõ, nisoenosoeno niha.
25Dozi niha, ba sowoeawoea tõdõ ba daʼõ, moroi ba zarõoe laʼila niha danõ.
26Hiza, no salaw̃a Lowalangi ba tebai aboto ba dõdõda ia; lõ moetaha moeʼerai ndrõfinia. (Sin. 90, 2; 93, 2; 102, 27. Dan. 6, 26).
27Iʼofaja saʼae mbõi nidanõ; mowõi taw̃a deoe, na mosaoe chõnia.
28Satoroe moroi jaw̃a ba lawoeo, saechoe ba niha, si no ato.
29Ba mendroea manõ, na aboto enaʼõ ba dõdõda waʼebolo lawoeo andrõ [ba] faʼofetoe ba nosenia andrõ. (Sin. 18, 12).
30Hiza, ifasoei ia hagania andrõ; ba ibaloegõ w̃aʼa nasi.
31Daʼõ saʼae ibeʼe fangoehoekoe soi niha, ba ihõna mbalazo.
32Doea dangania ibaloegõ haga, ba ibeʼe fanimba zi faʼoedoe.
33Ifarongogõ ia oegoeʼoegoenia andrõ, ba saw̃i naʼi zangila, na so ia moroi sa.”
Currently Selected:
SOERA JOBI FAZA 36.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.