San Mateo 22

Õor jua pʉrtarr phiesta

(Lc. 14:15-24)

1Maimua deeu nem ĩgkhamamua õrag nem jaaumamua magjim:

2—Ẽwandamagta amach thãar ee ichta chi Porkhapi nʉm khʉʉnan, rey ãb simua ich iewaa jua pʉrmkhĩir phiesta wautarr ee õor beetarr khʉʉnjota nʉmgui ajim. 3Mag phiesta ee beemkhĩir ya õrag jaaukha thʉnarr aawai ag ed pabaadee chi reíu deeu ich chognaan pʉijim aajem, mag beeju arr khʉʉn aar jaaubathuurwai beemkhĩir. Pari mag jaaubathurmjã beebajierram aajem. 4Magbaawai jũrr deeum khʉʉn pʉiwia amag, “ ‘Thachin ya sĩi khojupaita sim, mʉch nemchaain õtpaa wai chirarr khech auwi aata wau thʉnʉm; jua pʉr nʉm phiesta ee wettarrau’ a jaaubat” a jaaupʉimajim aajem amag. 5Pari par mag deeu iek jaaupʉitarrjã beebajierram anaabá. Mag chi beeju arr khʉʉn eem ãaur khʉʉn warag amach nemjĩir oon ereubaadee tagam khʉʉn pogkha amach phidag ee wetjierram aajem. 6Maimua ãaur khʉʉnau warag mag chi rey iek jaau wenʉrrarr khʉʉn pʉr aunaa parhooba am gaai mas waunaa warag khechpʉijierram anaabá. 7Magbaawai chi reíu khĩir machgau ich soldaaunag mag ich chognaan khechtarr khʉʉnjã agjo khechpi jaaunaa am phoborjã warre orpi jaaujim aajem. 8Maimuan chadau deeu ich chognaanag, “Nemen thum khĩir khaug thʉnʉm, jua pʉrju phiesta athee; pari chi thʉ̃rpʉitarr khʉʉn chadcha chi beeju khʉʉn khaba arr aawai am beebajierramgui” ajim. 9“Jãgan jãgbarpí kaaijã ee wetwi mʉ chaai jua pʉr nʉm phiesta ee beemkhĩir, thum pãachdeu oomam khʉʉnag jaaupetat” ajim anʉm amag. 10Magbaa chadcha chi chognaan wetwi kaaijã ee amachdeu oomam khʉʉn thumaa aibeejierram anaabá, õor wäjäaun dʉi chi khaigbam khʉʉnpa. Deg pachenaa oowai sĩi dijã pom simta õrau phẽu wejoojim anʉm. 11Maimua mag õor thumaa deg paaukhapinaa chi reíu oon maawaijã, bee nʉm khʉʉnag jũamkhĩir awia irua khajũa phederrjã jũaba, woun ãb ag ee sĩerrau sĩi parhoobam khajũata jũa sim ooimajim anʉm. 12Magbaawai chi reíu irig, “¿Pʉ jãga jãg warm khʉʉnjo phiesta eem khajũa jũaba simta mʉig dubjĩ?” ajim anʉm irig. Pari magʉmjã bʉ̃ʉrjã i iek jʉ̃ʉ aba, ichig khabamjo sĩsijim anʉm. 13Mag par jeeu ahaukhamjã ich iek ʉkhaba abaawai mes gaai thep paa narr khʉʉnagta, “I bʉ dʉi juapa bʉʉrnaa daaugajãr khĩchag ee barbapʉit” ajim anʉm chi reíu, “i gaai wajaugau icharaucha bĩenaa ich mag agäa agäa sĩerramkhĩir.”

14Mag nem ĩgkhaadam jaauwia ich Jesuupai, —Ʉ̃gthar oberjujã mag phiesta ee õor pom thʉ̃rkhʉʉiwia khapan khaba beetarrjota sim ajim. Ẽwandamaun ich aar õor pomta wetpim khõsi sim, mamʉ chi chadcha oberju khʉʉn chan khapan khábata durrumgui ajim.

Reígjã deenaa Ẽwandamagjã ich paat deepi jaautarr

(Mr. 12:13-17; Lc. 20:20-26)

15Pari mag irua nem ĩgkha sim amach jʉ̃gaagaa khaba aawai fariseonaan amach ap iekhawi ibepjierram aajem, jãga Jesús ich iekha sim gaaimuapai imeraa pʉr awaag awi irig jeeucheeg. 16Mag ya ibepwi narr aawai amach ee amach igar narr khʉʉn eem pʉijierram, deeum khʉʉn agjo chi rey Erodes igar narr khʉʉn dʉi. Mag amach pʉibaawai beewi magchejierram:

—Maestro, marau khaphʉ nʉm, pua chadcha ag eyaata nem jaaunaa ĩchab jãgata aju aai nʉ a jaaujem, Ẽwandamau nem jaau sim eyaa wenʉrraag. Pua chan sĩi õrau amachdeu nem jaaum aig nem jaau nʉmʉgjã pʉch khũgurpiba wa sĩi pʉchdeu oowai magjoo abaawai ag bʉrre sĩi magau aba aajem. 17Magua marau pʉrʉg jeeum ig nʉm: ¿Pua oowai chadcha maach meeun judionaanaujã durrpierram khʉʉn rey Roma sĩejemʉgta impuesto phagju aai nʉ, wa phagju khaba nʉ? aichejierram irig.

18Pari Jesuu ya mag am ibepwi khĩirju nʉmjã khaphʉ sĩerr aawai jũrr ich garmua amag, —Pãraun pãach khaugbampii naabma, ¿khanthee pãrau jãg mʉ imeraa pʉr auju ẽkha nʉma? ajim. 19Magnaa, Mʉrʉg oopibat ajim, khaniuta pãrau debpaar phaagjẽ.

Magbaa irig phatkhon denario anʉm ãb oopijierram. 20Mag ichig denario ãb oopibaawai, —Pãrau oowai, ¿khai khĩirta khai thʉ̃r dʉi ag gaai sĩ? ajim.

21Magbaa amachdeu, —Romaam rey César khĩir khabahab ajierram, ich thʉ̃r dʉi.

Magbaawaita Jesuu amag, —Mag khai magan reíg ich paat deenaa Ẽwandamagjã agjo ich paat deebat ajim.

22Amachig mag iekhabapäaiwai sĩi jʉ̃gderraa nʉm iekhau warag amachta khĩu ereubaadejim.

Ẽwandam chan oob mag chi khecham khʉʉn Ẽwandam khabam

(Mr. 12:18-27; Lc. 20:27-40)

23Ich mag edcha ĩchab saduceonaan eem khʉʉnjã agjo Jesús aig beejierram. Mag saduceonaanau jaauwai, maach meebaadem chan maach akhaar tag iiuba aajem aajem. Amach mag nem jaau sĩerrjeem gaaimua, iyʉʉmamua juau ogthom irig magjierram:

24—Maestro, jooi Moisés khararrau Ẽwandam iek phã pʉarr gaai jaauwai, woun ãb ʉʉi wai simta chaaijã chukhu meemʉn, magan mag chi meetarr khod ãbam wai sim khai, magua ich khojaau auju aai sim a sim, ag dʉi ich naamʉu chaain ooba arr aawai jũrr i athee oo deeg, mag oo deebarm i chaainkha nʉisimkhĩir ajierram irig.

25Maimua amachdeupai warag irig nem ĩgkhamamua magjierram: —Biek ãb mʉig maach meeun ee emkhooin siete naajim aajem, ãbam khod appai. Am naam chi nacharamua ʉʉi auwia chaaijã chukhu meejim aajem. Magbaawai ag ẽudeemua ich khojaaupai wir aig aujim aajem, ich naam thʉ̃r okhoopimaaugau awi. 26Pari majã pod ag dʉi chaai ooba meejim aajem. Ich mag ewagam khʉʉnjã ãbam ʉʉiraupai warm meemam ẽudee theg ahaugmamua mag siete narr thum thegdʉpʉijim anaabá. 27Maimua ya ãbmiecha paawai chi ʉʉijã meejim aajem. 28Mag ãbam ʉʉiraupai ãbam khod appai siete phepʉitarr aawai mʉg atag thumaam khʉʉn iiu phiidʉtkhabarm edjã, ¿mag ʉʉi chijãg denkha sĩsijuma, chi nacha autarr den wa ẽudeegam khʉʉn den? a jeeujierram irig, juau ogthom.

29Magbaata ũr nʉm jʉ̃g eyaa Jesuu amag, —Pãran okhoota iekha nʉmgui ajim, Ẽwandam iek phã sĩsidʉm gaai jaau simta i jua theegjã khaugbata iekha naawai. 30Meetarr khʉʉndam thumaa iiu phiidʉtkha phobaadem chan bʉ̃ʉrjã jua pʉpʉr abajugui ajim, ya am ʉ̃gtharm Ẽwandam chognaan thʉnʉm khʉʉnjo nʉisiju aawai. 31¿Pãrau ooba aajẽ, Ẽwandamau ich iek phãpitarr gaai mag õor otarr khʉʉn deeu iiu phiidʉtkhaju igwi, 32“Ichta jooingar jooi Abrán khararr Ẽwandam anaa ĩchab jooi Isá khararr ag Ẽwandamau maimua Jacob khararr denjã agjo” a sim? Irua mag makhʉʉn jooin agtha meeba nʉmjo iekhatarr aawai Ẽwandam chan oob mag chi khecham khʉʉn Ẽwandam khabam. Ẽwandaman chi iwam khʉʉn Ẽwandamaugui ajim. Irigan nawe khechtarr khʉʉn awiajã agtha iiu nʉmgui ajim.

33Mag nem jaaumam ũrwia, chadcha thum chi ũrmam khʉʉn jʉ̃gderraa naajim.

Ẽwandamau nem waupi jaau sim chi wajapcharam

(Mr. 12:28-34)

34Jesuu mag saduceonaan warre khĩupaa sĩubarm fariseonaanau oobaawai, jũrr amaun chadau i phithurg chukhu pʉr auju awi, 35ãb am eem Moiseeu ley phã pʉatarr jawaag chi mach ich Jesús aig beewi irig, 36—Maestro, Moiseeu ley phã pʉatarr gaai, ¿chijãg iekta tagam khʉʉn khãaijã chi wajapcharamʉ́wa? ¿Khanta ʉ̃rʉʉcha Ẽwandamau maachig waupim khõsi sĩ? ajim irig.

37Magbaawai Jesuu irig, —Chi wajapcharamʉn, “Maach Ẽwandam sĩi par iiupai khaba, pʉch thãrauchata khõsi abá” a phã simʉu ajim irig. 38Tagam ley ʉʉrkhapi jaau nʉm khãaijã maata chi wajapcharamʉugui ajim. 39Magnaa deeu ichdeupai, Ãb agjo ich agjopaimʉʉ simgui ajim. Ma sĩi “Pʉch khapeenjã wir aig pʉchjo daupii abá” a sim. 40Moiseeu ley phã pʉarr thum tagam khʉʉn agjo Ẽwandam i jaaumienau jaaujerrpa mʉkhʉʉn dau numiim gaaimuata oberdʉtkha nʉm. Mʉkhʉʉn numiita wajapha ʉʉrkha simʉn magan tagam khʉʉn ʉʉrkhapi jaau simjã thum ʉʉrkha simgui ajim ich Jesuu.

¿Mesías khai iewaa ajĩ?

(Mr. 12:35-37; Lc. 20:41-44)

41Mag chi fariseonaan agtha ãba biirdʉ thʉnʉm ee, 42Jesuu amag, —Pãrau mag õor peerdʉ awaag Mesías anʉm beeju ig iyʉʉ aawai, ¿khai chaai aju khai a khĩirjuba aajẽ? a jeeujim.

Magbaawai amachdeu, —Jãan warrgar jooi David khararr ag chaain ewagam khʉʉnauta oodeejugui ajierram.

43Magbaata ich Jesuu amag, —¿Pari jãga mag David chaain ewagam khʉʉn den abarju, ich Davidaujã mag ich Ẽwandamau pʉiju aajerr igwi i Por a iekhatarrta? Irua mag iekhaawai, ¿ich Ẽwandam Akharauta mag iekhapibajĩ? ajim. 44¿Pãrau khaugba nʉ, ich Ẽwandamaucha iekhatarr Davidau phãtarr? Mag irua phãtarr gaai mag sim:

“Maach Por Ẽwandamau mʉ Porog, ‘Mʉch iek theeg chirʉmjo aag mʉ dʉi ãba mʉ juachaar gar jupbá’ ajim ‘pʉch oomapha aajem khʉʉn thum mua pʉch jua ee pʉrkha dee nʉm ora.’ ” (Sal. 110:1)

45Mag ich David khararrauchajã Ẽwandamau pʉiju aajerr igwi “maach Por” a iekhatarrta, ¿jãga pãar iek mag í David chaain ewagam khʉʉn denpai aju anʉ́? Mag sĩi i chaaipai aju akhiin, ich paarmua mag “maach Por” abakhamgui ajim Jesuu amag.

46Mamʉ par irua mamagkhamjã ãbmuajã bʉdam ãbjã jʉ̃ʉ aba aajeejim. Magtarr aigmua atag ni ãbmuajã tag irig iek chigaapaijã jeeuba aajeejim.

Currently Selected:

San Mateo 22: noaA

Highlight

Copy