San Mateo 23

Jesuu fariseonaanag iekhanaa chi machnaanagjã iekhatarr

(Mr. 12:38-40; Lc. 11:37-54; 20:45-47)

1Magtarr khur Jesuu õragjã ũrmkhĩir iekhamamua maragjã magjim:

2—Chi machnaanta fariseonaan dʉi Moiseeu ley phã pʉarr jaaujem khʉʉnau. 3Magua amau jaau nʉm ũrnaa pãachig jajaaukham ipierraa abat. Mamʉ oob amau aajemjo chan amiet ajim. Jãkhʉʉnan amach ipaarmua Ẽwandam dau na ajapha nem waupi jajaau aajemta amachdeu chan amachdeu jaau nʉmjo nem wauba sĩerrjeem. 4Magnaa nem jawaagjã amachdeu nem jaaum aigta jaau sĩerrjeem. Jãg nʉm aig õor ʉ̃r nem chʉkhʉmta jiirpʉpʉikhamjota naabahab ajim, õrau wauju khaba atcha phithurgkhamta waupi jaauwai. Õrag mag nem jaauwaijã amaun amach ipierraata api nʉm, mamʉ mag nʉm chan amachdeujã amachdeu nem jaau nʉmjo waujojoopaijã khaba nʉmta mag sĩerrjeemgui ajim. 5Am nem waubaademʉn, õrag sĩi amach oomkhĩirpaita nem wau sĩerrjeem, amachdeuta wajapcha Ẽwandam iek ʉkha naawai i dʉi wajapcha nʉm amkhĩir. Amach mag nʉm awi, Ẽwandam iek phã sĩsidʉm gayamjã jũrr deeum gaai phãnaa, chʉdam gaai ẽupʉinaa, amach piudau gaai jʉ̃pʉinaa dag gaaijã jũapʉimaajemgui ajim. Mag nʉm dʉi ĩchab amach khajũahi gaaijã nem bäbärgta jijiraa jũajemgui ajim. 6Õor khapanag ee thach khoowai, wa sĩi Ẽwandam iek jaaujem deg khãijã biirdʉawai, amachta sie wajapcharam gaai juupjemgui ajim, õor khĩirphee thumaam khʉʉnag amach oomkhĩir. 7Magnaa kaaijã ee õrau amach saludaawaijã amaun amach tho iekhapinaa amachig maestro apim khõsita sĩerrjeemgui a jaaumajim.

8Mag jajawagmamua, —Pari pãar mʉ dʉi khapeerkha nʉm khʉʉn chan mʉ iek ʉkha nʉm gaaimua thum agdaujopai naawai, pãachig “maestro” apiju khaba nʉmgui ajim, chikhamnag. Mʉʉta pãar Maestroou ajim. 9Pãar Aaijã ãbpaita wai nʉm; ma ʉ̃gthar sĩejemʉu. Magua, mʉig eegar chan pãach garmuajã oob parhoobam khʉʉnag Ẽwandamagamjo “aai” ichemiet ajim. 10Ãba mʉch chi Cristopaita pãar Porkha chiraawai, oob pãachigjã “maach por” apimiet ajim, dich khapeen ãba thʉnʉm khʉʉnag. 11Magju khãai ãb khãijã pãar ee ichta chi porkham khõsi sim khai, warag thumaam khʉʉn chogkhaju aai sim. Mag nʉm aigta Ẽwandamau oowai chi wajapcharamkha simgui ajim. 12Mua mag chirʉmʉn, ar amach thowia chikham dʉi athuu aajem khʉʉn mʉg atag paawai jũrr Ẽwandamag chaigpa oo sĩsid aju aawaita mag chirʉm; maimua ar mag amach dʉi athuu nʉmjã bʉ̃ʉrjã am ichaaur aba sĩi warag serbiibamjo aajerr khʉʉnta jũrr Ẽwandamau warm khʉʉn khãaijã ʉ̃rpai apiju aawaita mag chirʉmgui ajim ich Jesuu.

13Maimua mag iekhakhagmamua magjim: —¡Eh, pãarjã agjo chi machnaan dʉi Moiseeu phã pʉatarr iek wajapcha ʉʉrkhaajem khʉʉn! Pãran pãachdeuta ʉ̃rcha Ẽwandam iek khaphʉm anʉmta Ẽwandam aar oberjujã khaugba nʉmgui ajim, pãachdeu ʉkhaba nʉm gaaimua. Mamʉ mag nʉmta õrau i aar oberju ẽkhaawaijã warag chi obeerjem doig chawag khecheu ahaukhamjo aajem, õor khũgur wai nʉmua, Ẽwandam iek ʉkhapimaaugau.

[ 14’¡Eh, apdurr, pãar chi machnaan dʉi Moiseeu phã pʉarr iek ajapcha ʉʉrkhaajem aajem khʉʉn! Pãraun sĩita khoopaa ʉʉin juagam nemdamjã khechthʉg aumaajerramgui ajim; magnaata seukha warag am kõit Ẽwandamag jeeu nʉʉ aajerram, juau ogthom pãach magba nʉm amkhĩir. Mamʉ pãach jãg nʉm paar jũrr Ẽwandamau ĩchab pãar gaai jua khʉabajugui a jaaujim.]

15’¡Eh, pãar Moiseeu ley phã pʉarr jawaag chi machnaan chi mag ley wajapcha ʉʉrkhaajem aajem khʉʉn dʉi! Pãachdeuta Ẽwandam ipierraacha nʉm awi pãach denjo ʉkhapi awaag warpham magwe jaau wenʉrraajemgui ajim. Mamʉ mag nʉmʉn, chadcha pãach iek ʉkhabaadee pãach khãaijã athuuchata khaibag paapʉimaajem, pãachjo amjã Ẽwandamau khĩmie durr barkhʉʉiju ayaa amkhĩir.

16’¡Eh, pãran sĩi pãachjã dau khaugbamjo nʉmta agjo dau khaugba khitheem khʉʉn jua gaai eudʉ arrumjo nʉmgui! ajim amach khĩircha. Pãach mag nʉm gaaimuata pãar iek mag “Aai i jeeujem di igwia nem wauju a iekhatarr chadcha wauba awiajã ideu mag sim” a iekhaajemgui ajim amag. Mamʉ jũrr “Chi Aai i jeeujem deg phĩr thʉnʉm igwiata nem wauju a iekhaawain chad ichiita waub khaba wauju aai sim” aajem, “Ẽwandam denkha sim igwiata mag iekha naawai.” 17¡Pãran warag khĩirjugjã chukhunaa dau khaugbamjota thʉnʉm! Pãar khĩirjug paraa naakhiin, chi Aai i jeeujem diita ajapcha sĩebahab, chi phĩr khãai. Mag sim ee sĩewaita ag eem phĩrjã agjo Ẽwandam deneg pa sĩebahab ajim. 18Pãar iek ĩchab mag “Sĩi chi Aai i jeeujem deg nemchaain phaag nasãdjo wau sim igwia nem wauju atarr wauba awiajã ideu mag sim” anʉm. “Pari mag nasãd gaai ofrenda sim igwiata nem wauju abarmʉn chadau ichiita waub khaba wauju aai sim” aajem. 19¡Khaugabnaan! ¿Magan pãragan chi nasãd khãaijã chi ofrendata wajapcha sĩeb? Nemchaai ich appai chan wajaug chukhu simgui ajim; ãba mag nasãd gaai ausĩubaawaita wajaug aadep sĩebahab, Ẽwandamau ich denkha athaawai. 20Chi mag nasãd Aai i jeeujem degam igwiata nem wauju a simua chan ãba chi nasãd igwiapai khaba, ag gaai chi ofrenda paa sim igwiapata iekha sĩebahab ajim. 21Maagwai chi Ẽwandamag jeeujem di igwia nem wauju a iekha simuajã sĩi mag chi di igwiapai khaba, Ẽwandam igwiapata iekha sĩebahab, mag degta Ẽwandam sĩejeewai. 22Maagwai edjã igwia khãijã nem wauju a iekha simuan mag edjã igwiapai khaba Ẽwandam igwiapata iekha sim, chi edjã Ẽwandam khu juupjem aawai. Mag i khu juupjem igwiapa iekhaawai ich Ẽwandam igwiapata iekha sĩebahab ajim amag.

23’¡Eh, pãar Moiseeu ley phã pʉarr jawaag chi machnaan ag iek wajapcha ʉʉrkhaajem aajem khʉʉn dʉi! Pãraun pãachdeuta Ẽwandam na wajapcha nem wau nʉm awia, i paat agjo deeg pãach nemjĩir bʉ daiicharam gayampa Ẽwandamag ofrendakha deejem: pãrau anís eemjã deenaa comino eemjã deejemgui ajim. Pari mag nʉmta jũrr mag ley Moiseeu phã pʉarr gaai ag khãai nem wajapcharam jaau simjo aju chan khĩir eejã paba aajemgui ajim. Pãrau chan wir aig pãach khapeen dʉi agpierraanaa am dau aug khaug paraa nʉm dʉi ĩchab Ẽwandam iekta ogdʉba ich jãg ʉkha wenʉrraju aai nʉmjã khĩirjuba aajemgui ajim, majã magʉmta ʉ̃rcha wauju aai nʉmta. Magnaan chad tagam nem pãachdeu wau nʉm pʉaba ich jãg dee wenʉrraju aai nʉm. 24¡Khĩirjug chuknaan! Pãach pem aawai pãran do do nʉm dʉi sĩi pagatjom khãijã dobapʉimua pekaudam waumaaugau awi, ajapha sãnaata doojerram. Pari jũrr pekau pom camellojokhamta sĩi ʉ̃ipʉi nʉmjo nʉm chan pãar gaai mas khaba aajemgui a iekhajim amach khĩircha.

25’¡Eh, pãar Moiseeu ley phã pʉarr jawaag chi machnaan maimua mag ley wajapcha ʉʉrkhaajem aajem khʉʉn! Pãach i aawai pãran sĩi pãach juagam nem ʉ̃rʉm chi memerkhogpaita ʉkhakha aju khĩirju sĩerrjeem, mag memerkhom ee khãijã dobaawai Ẽwandam dau na pekau waumaaugau awi. Mamʉ pãachdeu chikham nemdamjã pãach denkha aunaa waragta phatkhonjã nem pom paarpam khõchkha thʉnʉm gaaimua pekau pom nʉm chan isegba, ni Ẽwandamag chugpaapi jeeujujã khĩirjuba sĩerrjeemgui ajim. 26¡Moiseeu ley phã pʉarr wajapcha ʉʉrkhaajem khʉʉn anʉmta khaugabnaan! Jãg thach khoopierr nem jã ʉkhakha aajemjo, ¿jãg pãach thãarta nacha Ẽwandamag ʉpibamma? Pãrau magta amʉn chadau ʉ̃rpai khaba pãar thãarpata wajapha wenʉrrajugui a jaaujim.

27’¡Eh, pãar Moiseeu ley phã pʉarr ajapcha ʉʉrkhaajem aajem khʉʉn ag ley jawaag chi machnaan dʉi! Pãran sĩi õor aukhertarr jẽbdijota sĩsidʉm. Sĩi daaugajãrpai oowain wajapha jarnaa ooimʉ wau sĩsidʉm; pari mag sim ag ee ierr wa ookhiin, sĩi maach inaa pa appaita thuphãau nʉnʉidʉm. 28Pãarjã magta thʉnaabahab ajim: Sĩi khĩir eerpaawain õor wajaauga thʉnʉm; pari pãar thãran khaibagauta sĩi ãr sĩsidʉm.

29’¡Eh, pãar Moiseeu ley phã pʉarr jawaag chi machnaan maimua mag ley wajapha ʉʉrkhaajem aajem khʉʉn! Pãraun pãach magba nʉm amkhĩir, warrgar pãach jooin Ẽwandam i jaaujerr khʉʉn chadcha õor wäjäaun arr aawai agtha khĩir eyaa wai wenʉrrʉm awia, am aukhertarr jã ʉ̃rjã sirppapiba warag nem ooimʉ wau sĩsiu aajemgui ajim. 30Magnaa pãar den, “¡Ih! maachta maar jooinau mag Ẽwandam i jaaumien kheechjerr jaar narr akhiin, marau chan am denjo mag maach jua paarmua dʉi am khechbakham” a iekhaajem. 31Pari sĩi pãachdeu mag nʉmuapai pãrau pãachdeujã khaphʉ naabá, pãach mag warrgar Ẽwandam i jaaujerr khʉʉn khechmien chaainkha nʉm. 32Mag akhʉʉn chaain aawai ĩs pãachdeujã agjo ajurauma mʉ dʉijã ajim amag.

33’¡Khaibag, nemkhõr chi benen paraamjonaan! Khanii pãar jãg thʉnʉmta khĩmie durr wetba peerdʉbajupa. Pãar chan peerdʉbam. 34Khaphʉ abat: Mua pãar ee mʉch i jaaumien pʉiwia khĩirjug khaugkham khʉʉnjã maestronaan dʉi pʉiju. Pari mag mua am pʉibaawai ãaur khʉʉn pãrau khechpʉiwia ãaur khʉʉn sĩi pakuls gaaijã bʉʉrnaa khechmaju; ãaur khʉʉn pãrau pʉrnaa pãach Ẽwandam iek jaaujem deg wʉjã wʉmaju; maagwai ãaur khʉʉn amach pʉr aupiba deeum phobor ee khãijã dʉr wenʉrraawai agpierr pãrau am ẽudee khoojem nem ẽudeemjo ẽkhaju. 35Pãach mag thʉnʉm gaaimua, warrgar Abel thõotarr aigmua ewag pawiajã õor Ẽwandam na wajapha durrarrta khechmatarr bag ãrtarr thum jooi Zacarías Berequías iewaa Aai i jeeujem deg thõo naawai bag ãrtarrpa Ẽwandamau thum pãach gaaita thʉpʉiju. 36Cha mʉ iekha chirʉm iekhau warrgarwe pãach jooinau maagjerran pãach chi ĩs ewagam khʉʉn gaaita pajugui ajim, pãachdeujã amau nem waaujerrjota wau naawai.

Jesuu Jerusalén phobor ʉapertarr

(Lc. 13:34-35)

37Mag Jerusalén phobor ee Aai i jeeujem deg simua ʉapermamua magjim: —¡Eh! ¡Aay, Jerusalenpien! Pãraun chadcha warrgarweta Ẽwandamau ich i jaaumkhĩir chogpʉi nʉm khʉʉnjã kha khõchkhaba, warag mokoujã bar wai nʉmua khechpʉimaajemgui ajim. Biek khapan mua pãrag jaaujeejimgui ajim, ãthãrr ʉʉirau ich chaaindam thumaa ich ich eegar thoor wai juupjemjo pãar thʉa wai chitaag. Mamʉ magtarrjã pãachdeuta bʉ̃ʉrjã mag khõchkhabajierram. 38Jãgtarrau nau pãrau oomaa abarju. Nau mʉ mʉg chitʉʉ awia petaawai pãar sĩi di pariim ee wouchnaan phepʉabaajemjota pãach appai nʉisijugui ajim, khaigperjujã chukhu. 39Magbarm aigmua tag pãrau mʉ oobam ajim. Pãrau mʉ oojuun, ãba ya pãachdeucha deeu mʉ urum oowi, “Ʉuchata Ẽwandam pua pʉch jũrr pʉch Chaai maar athee Reikha pʉibarm” anʉm aigta deeu mʉ oojugui ajim.

Currently Selected:

San Mateo 23: noaA

Highlight

Copy