San Mateo 21

Jerusalén phobor ee Jesús dubimatarr

(Mr. 11:1-11; Lc. 19:28-40; Jn. 12:12-19)

1Mag wetumua ya Jerusalén dakha Olivo durrsĩ gaai deeum phobordam Betfagé anʉm paaukhabaimaawai ich Jesuu maach ich dʉi wenʉrraajerr khʉʉn eem numí thʉ̃rnaa amag, 2—Cha maach khĩirphee phobordam sim ee ereubaadet ajim. Nau pãrau burro chi ʉʉidam pabʉ gaai jʉ̃ sim ooimajugui ajim. Ag bigaau ĩchab chi chaaidamjã sĩeju. Mag pãachdeu oobaimam ẽerwi aipidut ajim amag. 3Mag pãachdeu ẽer waidurum oowi ãbmua khãijã pãachig iekhaawai irig, mua ig chiraawaita arrum, mamʉ deeu jopcha deepʉiju abat a jaaujim, chi mag ichdeu pʉi sim khʉʉnag.

4Pari mag burrodam awaan mamkhĩir ich khapeen pʉitarran, Ẽwandam i jaaumie Zacarías khararrau phã pʉatarr eyaa obermkhĩirta magjim. Mag irua phãtarr gaai mag sim:

5“Jerusalenpienag jaaubat:

‘Pãrau warrgarwe nʉajerr Reita sĩi parhoobam khʉʉnjo khĩir machag chukhu burrodam agtha chi jooicha khaba khitʉm gaaita ya pãar aig urum’ ” a phã sim. (Is. 62:11; Zac. 9:9)

6Mag amach chogbapäaiwai chadcha ereubaadejim. 7Mag wetwi ooimaawai, chadcha ich Jesuu jaautarrjo chi burro ʉʉidam ich chaai dʉi ooimajierram anaabá. Maimua ẽer auwi, arrwi, ya ich Jesús sim aar pabaimaawai, amach khajũa ẽerkhanaa chi burrodam phõ gar theerkhabapäaiwai ag gaai Jesús waaidʉbaadejim. 8Maagwai õor pom thʉnarr aawai, ãaur khʉʉnau i maju ee amach khajũa ẽernaa theerkhamaawai, ãaur khʉʉnau jũrr papiujom thʉrrpnaa theerkhamajim. 9Maagwain na wetum khʉʉnaujã serereu khaawai ẽudee wedurum khʉʉnaujã serereukhamua, “Ʉucha abarm Ẽwandam. Rey David khararr ag iewaajom chan chukhukhum” aajeejim. “Ẽwandam, ich mʉʉta pʉchdeu pʉch jũrr pʉibarmʉu. Mʉg Rey pʉibarm gaaimua ʉ̃gtharm magwe onee aju aai nʉm” aajeejim jũrram khʉʉnau.

10Mamagag wetumua ya Jerusalén ee Jesús dubbaimaawai sĩi phobor ee õor thumta phogdʉbaademjo ajim. Magphobaademʉn jũrram khʉʉnau amach eepai, —Keena, jãan ¿chijãg wounta jãg urúma? aajeejim.

11Magbaawai mag i dʉi õor pom wenʉrrʉm khʉʉnau, —Ẽwandam i jaaumie Jesús khabahab aajeejim, Galilea durr Nazaret phobor ee bãautarr.

Aai i jeeujem degmua Jesuu õor jʉrkhʉʉitarr

(Mr. 11:15-19; Lc. 19:45-48; Jn. 2:13-22)

12Mag barwia Aai i jeeujem deg ooimaawaijã, sĩi merrkau eemjo thʉnʉmta ooimajim. Magbaa mag ag ee Ẽwandamag ofrendakha deeg nem per nʉm khʉʉn dawag jʉrkhʉʉipʉinaa, phatkhon cambienaa dubur per nʉm khʉʉn mesjã jẽkhʉt sĩepʉimajim. 13Magnaa amag, —Ẽwandamau ich igwia ich iek phã sim gaai “Mʉ diin sĩi mʉrʉg jeeujem diiu” a simta, pãachdeuta ag ee mʉg nem parhẽpag per nʉmua sĩi chikham khũguurjem dikha wai naabma ajim.

14Mag õor dawag jʉrkhʉʉipʉiwi, ichta ag ee sĩsiewai, dau khaugba khitheem khʉʉn dʉi bʉ wedʉ wedʉ khitheem khʉʉnpa ich aig beemam Jesuu monaaupʉi maajeejim. 15Mamʉ mag irua õor monaaupʉpʉikham phadnaan chi porkha nʉm khʉʉnau Moiseeu ley phã pʉarr jawaag chi machnaan dʉimua amach daúacha mag irua õor monaau sim oo nʉm dʉi, chaainaupa i tho iekha nʉm iekhau “Rey David khararr ag Iewaajom chan chukhukhumkham” ũrbaawai, 16meeukha nʉm iekhau khĩir mor chigpai chi Jesuugta, —¿Mag serereukham khʉʉnau iekha nʉm pua ũr chirʉ́? ajierram irig.

Magbaa ichdeu, —Muakha ũr chirʉmgui ajim. Pari pãrau Ẽwandam iek phã sim gaai thʉ̃ʉrwai ooba aajeeb, amau mag serereu aju igwi David khararrau,

“Chaain daumeraam khʉʉn dʉi agtha jũd do khitheem khʉʉndamaupa irig jeeujem” a phã pʉatarr. (Sal. 8:3)

Ma chan pãrau bʉ̃ʉrjã khĩir ee paba naabma ajim amag.

17Magnaa warag ichta aigmua mawia jũrr ag dakha phobordam Betania anʉmʉg petajim. Mag mawia ich mam warag khãi eejim.

Jesuu higo phuapitarr

(Mr. 11:12-14,20-26)

18Mag mam khãi eewi deeu edpherre Jerusalenag urumua Jesús iek i jãsoo aadejim aajem. 19Mag i jãsog thʉnʉm ee, khʉd bigaau higo bʉ dʉnʉm oo athaawai ag gaai chi jõ simpii awi aar oon majim. Mamʉ oon maawai sĩi bʉ parii dʉnaajim. Mag ag gaai ooba abaa pabʉʉgta wounagamjo, —Pʉ jãg sim khai, jãgan mʉg atagjã ich jãg cheba sĩerrajugui ajim.

Pari irua mag iekhabaawai chi higo bʉ warre phuabaadejim. 20Maachdeu mag oobaawai dauderraa nʉm iekhau marau irig jeeu naajim, jãga jãg warre degolpta jãg phuabaade.

21Magbaa ichdeu marag magjim:

—Pãrau pãachdeu Ẽwandamag jeeuwaijã pãachdeu jeeubarmjo aju khĩirjunaata jeeukhiin, mua mʉg pabʉ phuapibarmjopaijã khaba, ag khãai phithurcharam nemjã wauju. Jãgkhiin pãrau mʉg Olivo durrsĩigjã, “Mʉigmua mawia jũrr phũas ee ierrpabaad” akhiinjã, chadcha pãachdeu iekhabarmjo ajugui ajim, pãar ipierr. 22Mag pãachdeu jeeubarmjo aju khaphʉnaata pãach nem jeeuwaijã jeeumʉn, pãachdeu jeeubarm nem pãrau paarpaju a jaaujim marag.

Jesús jua theeg

(Mr. 11:27-33; Lc. 20:1-8)

23Maimua beewi deeu Jesús Aai i jeeujem deg dubchejim. I maig õrag Ẽwandam iek jaau sim ee, phadnaan chi porkha nʉm khʉʉn dʉi judionaan Asamblea eem chi pornaan i aig beewi irig jeeuchejierram:

—¿Khai thowiata jãg mʉig nem per narr khʉʉn pua dawag jʉr werppʉijĩ? ¿Khaíuta jãg pʉrʉg pʉchta nem iek theeg apijĩ? Marag jaaubá ajierram.

24Magbaawai jũrr Jesuu amag, —Magan nacha mʉrʉg jaaubat, muajã ĩchab pãrag jeeu ookhimgui ajim: Mua jeeubarm pãrau mʉrʉg jaaumʉn, magan muajã pãrag jaaujugui ajim, cha pãachdeu mʉrʉg jeeu nʉm. Magnaa chadcha amag, 25—Pãrau oowai, ¿khaíuta Juan pʉijĩ ajim, jãg amach khaibag Ẽwandamag chugpaapi jaaunaa õorjã por choo nʉrramkhĩir? ¿Ẽwandamau ajĩ, wa sĩi mʉg jẽb gayam khʉʉnau chogpʉiwiata jãg nʉrrajĩwa? ajim.

Magbaa amach appai iyʉʉ nʉmua, —Maadeu irig, “Ẽwandamauta pʉijim” akhiin, magan jũrr irua maachig, “¿Jãg magʉmta pãrau irua jaau nʉrrarr iek ʉkhabajierráma?” aju. 26Pod maadeu, “Õrauta pʉijim” ajujã khabamgui ajierram. Maadeu magkhiin thumaam khʉʉnau i igwia “Jãan chadcha ich Ẽwandam i jaaumieta jãg nʉrrajim” aajeewai, eeu degolp õrau maach mokou bar thõodukhamgui ajierram.

27Mag warag irig jaaujujã khaugba aawai, —Marau pod jaauju khaugbamgui ajierram.

Magbaawaita ichdeu amag, —Mua pãrag nem jeeutarr pãrau mʉrʉg jaauba aawai muajã pãrag jaaubamgui ajim, khai thowiata mua jãg nem wau chitʉ́.

¿Chijã khʉʉnta ʉ̃gthar oberju khai?

28Mag ichig jaauba abaawai mʉg nem ĩgkhaadam jaaujim:

—Woun ãb chaain numí wai sĩejim aajem. Biek ãb chi jooirag, “Iewaa, ĩs mʉ uvado ee phidkhabamí” ajim anʉm chi ayau. 29Magbaa chi iewaau, “Mʉ mamapha chirʉmgui” ajim aajem. Maimua khĩirju sĩi awiata, “Magan mʉ majugui” awia majim aajem, phidkhaan. 30Maimua jũrr ich iewaa chi ẽudeemʉgjã ich agjo phidkhaan mamkhĩir jaaujim aajem. Magbaawai maguan chadau khõchag, “Magan mʉ phidkhaan majugui” ajim anʉm. Pari mag maju atarrta chadcha mabajim aajem.

31Mag nem ĩgkhaadam jaauwia, aig ũr narr khʉʉnag jũrr, —¿Chijãgua pãrau oowai ich ayau khõsi sĩerrjo i ipierraa ajĩ? a jeeujim ich Jesuu.

Magbaa, —Chi iewaa chi jooirau ajierram, chi cuento ũr narr khʉʉnau.

Magbaa deeu ich Jesuupai iekhakhagmamua, —Roma durram gobierno athee debpaar jeeujem khʉʉn chi khaigbam khʉʉnta ʉʉin amach durpa theegau parhooba sĩerrjeem khʉʉn dʉi pãar khãai ʉ̃gtharcha oberjugui ajim. 32¿Jãgwi mag chirʉ́? Juan chi õor por choomieu, jãga Ẽwandam dau na wenʉrraju aai nʉ a jaaumam ũrwi pãrau ʉkhabam daar, amauta pãar khãaijã ʉkhatarr aawaima. Pari pãrau magba irua jaau nʉrrʉmjã ũrnaa irua nem waaujerrjã pãach daúacha oojerrta, pãach khaibag khĩirjuwia Ẽwandamagjã chugpaapi jeeubajierramgui ajim amach khĩircha.

Khaibag sĩsidʉmta nemjĩir thʉa narr

(Mr. 12:1-12; Lc. 20:9-19)

33Maimua ich Jesuupai, —Ũrbat, deeum nem ĩgkhaadam pãrag ĩgkhakhimgui ajim.

Maimua ĩgkhabaademua magjim: —Woun ãbmua uvado jĩirjim aajem. Mag jĩirwi, ag igaau thuur phʉʉrdʉpʉiwi, chi uva cho piirjʉujujã waunaa, didamjã nasãdjo ʉ̃gthaa eu dʉnʉʉujim aajem, ag gaaimua warp dawaa oo phʉʉrdʉdʉ aag. Mag thum wajapha wau sĩunaa, chawag mam khõchkhabaadeewai, chi nemjĩirdo deeum khʉʉnag alquilaapʉiwia, ichin jũrr deeum durr warp petajim aajem. 34Maimua ya chi uva waaubaademcha khĩirjunaa jooirau ich chognaan pʉijim aajem, ich paatem agjo ich athee deepʉimkhĩir. 35Pari mag chi chognaan amach aar bardʉtkhabaimaawai, chi uva thʉa narr khʉʉnau pʉrphobaadewi, ãaur khʉʉn gaai sĩi mas waunaa, ãaur khʉʉn warre khechpʉinaa maimua pogkha mokoujã barmaajeejim anaabá. 36Magbaawai deeu jooirau jũrr khapanaa pʉijim aajem. Pari makhʉʉnjã amach aar barpinaa chi nacha beetarr khʉʉn dʉi arrjoo ajierram anaabá. 37Maimua ya ãbmiecha paawai jooirau ich chaai pʉijim aajem. I khĩirjugan ich chaai aawai i ogkhaju awiata pʉijiebma. 38Pari warm khʉʉnau mag i ogkhajujã khĩirjuba, sĩi warag amach aar barpinaa, “Keena, chamʉʉta chi iewaa aawai mʉguata mʉg atagjã jũrr ich aai nemjĩir jʉ̃aju khabahab” ajierram anʉm. “Jãg sĩpí warre maadeu i thõopʉiju, mʉg uvado jũrr maach denkha awaag” ajierram anʉm, amach appai. 39Mag, chadcha khapanaam khʉʉnau pʉrphobaadewi chi nemjĩirdo chaaur warp arrnaa thõopʉijierram aajem, ich jooi iewaa ãba.

40Mag jaaunaa jũrr ich iek ũr narr khʉʉnagta, ichdeu nem ĩgkhatarr igwi, —Pãrau khĩirjuawai ĩsjã agtha mag uvado sim anaa chi thʉa narr khʉʉnjã ich akhʉʉnpai akhiin, ¿jãgaju khai jooirau magʉm wounaan dʉi? a jeeujim Jesuu amag.

41Magbaa amachdeu, —Mag amach khaibag sĩsidʉm paar amachdeu warm khʉʉn dʉi aajerrjo amach denjo am dau aug khaugba, irua agjo am khechpʉijuuta. Magnaa jũrr chadcha ichig phagju khʉʉnagta irua alquilaa pʉajugui ajierram, ag jaar paawaijã chi nemjõdam ichig ich paat deemkhĩir.

42Amachdeu magbaawaita Jesuu amag magjim:

—¿Pãrau chan bʉ̃ʉrjã Ẽwandamau ich i jaaumienag ich iek phãpitarr gaai jaau sĩsidʉm thʉ̃ʉrwai ooba aajeeb,

“Di eu narr khʉʉnau isegtarr dibigta jũrr chi dihãd jãrramkha sĩsim” a sim?

“Ẽwandam maach Porouta mag dibig wajaphamjo api sĩewai õrau oowaijã ʉuuta oo nʉm” a sim, ich iek gaai jaauwai. (Sal. 118:22-23)

43Magua mua pãrag mag chirʉmgui ajim: Ẽwandam pãar thãar ee ichta chi Porkhaju atarr chi Por khaba, deeum khʉʉn judionaan khabam khʉʉn ichdeu khõsi simjo nem wauju khʉʉn dʉita am Porkhaju ajim. [ 44Maimua mag mua dihãd a chirʉmjã mʉch igwiapaita mag chirʉmgui ajim. Chi mʉ iek ʉkhaba sim wounan, juau ogthom mag dibig ʉ̃r burrwi ichdeupai ich gaai mas wau simjota sim; maimua mag ʉkhaba nʉrrʉmta meemʉn, jũrr mʉ mag dibig pomaamjo chirʉmta i ʉ̃r buudimamjo ajugui ajim.

Jesuu mag sĩerran mag i iek ʉkhaba sim meebaadeewai warre khĩmie durr barpʉijuuta jaau sĩejim.]

45Mamʉ mag irua jajawagmam ũrwi phadnaan chi pornaanau Moiseeu phã pʉatarr wajapcha ʉʉrkhaajem khʉʉn dʉimua khaug athajierram, amachdeu ich iseg nʉmta jaau sim. 46Mag amach khĩir iekha simta khaug athaawai jũrr ichta pʉr arram khõchkha phobaadejim. Pari Jesuu chadcha Ẽwandamau nem jaaupi simta jaau nʉrrʉm thumaam khʉʉnau khaphʉ narr aawai amachta jũrr khaigbaju khĩirjuwi i chig abajierram.

Currently Selected:

San Mateo 21: noaA

Highlight

Copy