LUKA 21

Kemîpui gu Mâ-kela peibe

(Mrk 12.41-44)

1Zai pa ’ngngangchupie gai dege, mâ-hâ kaibe bâm ge kelakyime ne penui kela ramme kai ze bambe pa ngau de lei; 2zai kemîpui hangkat kelaksiabe kau chige rangkângpum kena tuâgaibe pa ngau lu lei. 3Dadege pa ne, “Pelingsing ze ningnui je I rang lei, ai kemîpui kelaksiapui ne ’nteumena suadu kai’ngkielang lei; 4penui â penui gu misongga kebambe gene peipat kai lei, kane pa â pe heu pa ringrabe nane kai kam gai ’ndi de lei,” ze kacheu de lei.

Kellumki Tew’nsiarabe rasam Sabe

(Mat 24.1,2; Mrk 13.1,2)

5Zai hanggesame ne kellumki ze tingchukâng peluiyibe ramme benai kela peipatbe ramme zene teleu zun-gaibeibe rasam sa lage, pa ne, 6“Airamme ningnui ne ngaube ge chi tingchukâng kat ne kat je kapchim ze bambe chi ’ngngaîkeulakrabe ze aige mâ de ’nsak kai mak bamrabe ting wangchang gu lei,” ze kacheu de lei.

Tewkahereube benai Tewsabe ramme

(Mat 24.3-14; Mrk 13.3-13)

7Dadege penui ne pechu ’nneu ze, “Geteiliapeu, airamme ’ndaitewbe ting ne wangchang ra, zai airamme wangchangrabe ge ’ndaikau gu ka’nchetbe tewlia ra lau?” ze kacheu de lei. 8Dadege pa ne, “Ningnui je ngualietat mak ra hangge ’ntîng le lau; misonggame ne a ji gene pat ze, ‘I ze pa de lei!’ acheu gu, zai ‘Beting â na de lei!’ ze acheu gu lei. Penui chai suitat se lau. 9Zai kahereibe rasam benai kakeleube ramme rasam ningnui seu dezai hingkedun se lau; airamme ze â wangchang-raî himgchang gu daseu, kane luakatne betun hang â chang ra mak lei,” ze acheu bei de lei.

10Dadege pa ne penui je, “Hezat ne hezat je ’nggi gu, zai heguangram ne heguangram je ’nggi gu lei; 11keteichibe ramme wang gu zai pebâm gechâm-châmbe ramme ge herakûm benai herarît ramme bam gu lei; zai tinggîm ’mbene ka’nchetbe kedibe ramme benai ngauhingbe ramme ze liâ gu lei. 12Kane airamme wangrabe suage penui ne ningnui je nîm gu zai ka’nduibeki ramme ge benai kebangki ramme ge ningnui je pei gai gu zai a ji ziegene ningnui je heguangme benai laksaibe ramme suage teiwang gu lei. 13Aipau ting ze ningnui ne achu sakkitewrabe ting de lei. 14Chidaze ’ndaikau sam ne kak ra mei be ’nning’ntua mak ra hangge ningnui lung ge ’ntip ze bam lau; 15ningnui je ka’nggime ruage mî de ningnui je ’nggichilakrabe benai geikang-chilakrabe mui zai ka’nningbe I ne pei gu lei. 16Zai ningnui pui-peume, ningnui sikiname, ningnui kiduîme, zai ningnui kangme ne ningnui je nîm ra pei gai gu lei, zai ningnui ruage hanggesame je â tewchat ku lei; 17zai a ji ziegene ’nteumena ningnui je ngaugailak ku lei. 18Kane ningnui peîtam katte ga ra mak lei. 19Ningnui liechibe gene ningnui keringbe ngau gu lei.

Jerusalem Tew’nsiarabe rasam Isua ne Sabe

(Mat 24.15-21; Mrk 13.14-19)

20“Kane hereikangme ne Jerusalem tuaguabe ningnui ngau dezai, chize tew’nsiagai’nderabe changzi gu de lei be chî le lau. 21Chidezai Judia ge bamme peloa kehu ’mbe peize pak kai de lau, zai namdi lungge bamme peize tat te lau, zai namdi gene hela ’mbe bamdime je peize namdi lungge gut se lau; 22aipau ting ze â hekûmtewbe ting lei, chi rawgaibe leine tewpui le ra hangge zeu. 23Chipau ting ge ka’mpungme benai henapuatungme penui duângga gu lei! Kedeirei ge hereu-kadesangbe benai aipau ziemmena peireige helungteube wang gu daseu; 24hiazutkie mui gene penui kau gu, zai heramzatme ruage kebang hang zua gai ’ndu lei; zai Jentailme ting tewpui kam mak tâne â Jerusalem je Jentailme ne chaîkeniak ze bam gu lei.

Ziemmena Na Wangkeube

(Mat 24.29-31; Mrk 13.24-27)

25“Zai Tingnaimik, hekêu zai hegi ramme ge ka’nchetbe ramme bam gu lei, zai sungkling benai hedui kagesuâkbe ze ’nrahim-him bambeibe ziegene kedeirei ge heramzat leine lunghereu ze penui duângga gu lei, 26kedeirei ge mâ-wangchangrabe hangge ’nning’ntua ze kehingbe ne ziemmename penui ran-gakeu ze bam gu lei; tinggîm piehang ngaube gu rezie ramme gechuî’ngngai gai gu daseu. 27Chidezai ziemmena Na reziechibe gene pengêudi ze kemâu gene wangkeube penui ngau gu lei. 28Chunage airamme wangchang dezai, ’ngngangchupie gai ni lau, ningnui je ripatkairabe ting â na di daseu,” kacheu de lei.

’Mbeuchîbang gu gene Mâ chî ra Geteiliabe

(Mat 24.32-35; Mrk 13.28-31)

29Zai pa ne penui dage sam’nda salia ze: “’Mbeuchîbang je benai hingbang leine je pie gai ni lau; 30chiramme pebuâ tumpat kai dezai kepuakting â na di de lei be ningnui runne ne chî le lau. 31Chigum ze airamme wangchangbe ningnui ngau dezai Hera gu heguangram na de lei be ningnui chî le lau. 32Ningnui je pelingsing ze I rang lei, airamme wangchang kam mak tâne aipau rehei ’ngga ra mak lei. 33Ting benai kedei â ga gu lei, kane a sam ramme â ga ra mak lei.

Piekua’mmi ra Ka’nnangbe

34“Kane ningnui runne ’ntîng lu bam lau, makchai â, deuzietewbe benai kameneube zai ai keringbe ting hang ’nningkahereube zene ningnui lung tewritsit nan ze bam gu lei, zai luakatne chipau tingnaimikpui ze ’mpia ne rap gum ze ningnui peireige wang gu lei; 35chize kedeirei ge bamme leine peireige wang gu daseu. 36Kane airamme wangchangrabe leine gene pak’mbiachi le ra, zai ziemmena Na suage sapchi le ra hang pehî’nsangne ge kellum ze bam zu lau,” ze kacheu de lei.

37Zai nai’nsangne pa â kellumki ge geteilia ze bam bam lei, kane tingmuî dege â Olibet loa kacheube ge tat ze rêu de lei. 38Zai hechuasûn kellumki ge pe sam ’ngking ra hang baudime pe dage wangka’nsui de lei.

Currently Selected:

LUKA 21: ZEMEBSI

Highlight

Copy