LUKA 22

Isua je Tewchat ra Peube

(Mat 26.1-5; Mrk 14.1,2; Jhn 11.45-53)

1Chunage ’nduihîkaimakbe tingku-ngi, chi tat’ntuahengi kacheube ze na di de lei. 2Zai tingkugechîngme benai leisirawme â ’ndaigumbe ’mpuî gene pechu tewchat le ra mei ze peu bam de lei; penui baudime je hing dadegeu.

Judabe ne Isua je Zua ra hang Kelutewbe

(Mat 26.14-16; Mrk 14.10,11)

3Chidadege â kenieme hangkereu-ze-kename ruage bambepeu Juda-Iskariotbe dage Satan gut ti de lei; 4’ndaigumbe ’mpuî gene penui dage pechu zua gai ra mei be tingkugechîngme benai kanguame besuitewme je ’mpau ra hang tat ti de lei. 5Dadege â penui suiyi-desang di ze pechu rangkâng pei ra ’mpauchak kai de lei. 6Chidadege â pa hezuâ gai lu, baudime gabe luage Isua je penui dage pei ra hezeu peu di de lei.

Isua tat’ntuahengi gu Teseuteu ra Kakedâbe

(Mat 26.17-25; Mrk 14.12-21; Jhn 13.21-30)

7Dadege â tat’ntuahengi gu melipoine je tewchatkairabe mai, chi ’Nduihîkaimakbe Tingku-ngi mai ze wangchang di de lei. 8Chidadege â Isua ne Peterbe benai Johanbe je lang gai ze, “Tat’ntuahengi teseu anui teu ra hangge tat ze kedâ gai zu lau,” kacheu de lei.

9Penai ne pechu, “Chize ’ndaige anai ne kedâ gai ra nang lunei lau?” kacheu de lei. 10Pa ne penai je, “Pie le lau, ningnai namdi ge gut dezai hangkat heduibung pua lu ningnai je hedau gu lei; pa gutkaibeki ge pe chai suigut tu lau, 11zai heki’mpaupeu je acheu rang be lau, ‘Geteiliapeu ne ningchu rang lei, Hesangme rêurabe kisîam ze ’ndaige la lau, chige a kenieme je tat’ntuahengi gu teseu I nguateu ra hangge zeu?’ ze acheu zeu. 12Dezai pa ne ’nreibe sîam kedibe chui’nchichiaklube ze ningnai je ngualia gu lei; chige kedâ gai lau,” acheu bei de lei. 13Dadege penai tat ti de lei, zai penai je pa rangbe luigum ze ngaudau de lei; zai penai ne tat’ntuahengi gu teseu kedâ gai de lei.

Heguang gu Muîteseu

(Mat 26.26-30; Mrk 14.22-26; 1 Ko 11.23-25)

14Zai pehî chang dege, pe dage apostolme benai pa mâ-tew ra hang ’ntaukeu de lei. 15Dadege pa ne penui je, “Kahereube I lie makge ai tat’ntuahengi gu teseu ze ningnui je I nguateunei-desang lei; 16ningnui je I rang lei, Hera gu heguangram ge aize tewpui gai mak tâne aize I teu ra mak lei,” kacheu de lei. 17Dadege pa ne hepiak tei lu, pe suiyibe sam pau gai lu dege, “Aize lu lau, zai ningnui ruage ’nzi lau; 18ningnui je I rang lei, chuna gene seu ze Hera gu heguangram wang mak tâne grepchî gu ze I sak ra mak lei,” ze kacheu de lei. 19Zai tingku lu lu, pe suiyibe sam pau gai lu dege, pa ne tiapâng lu ze penui je pei ze “Aize a pum lei, chize ningnui hangge peigaibe zeu. Achu chî bam ra hang aize tew lau,” ze kacheu de lei. 20Zai chipau luigum ze muîteseu teulube châng dege, pa ne hepiak tei lu acheu ze sa ze, “Aipau piak ningnui hangge ruîpatkaibe ze a jai gene samhatkai-karchibe lei. 21Kane pie le lau, achu zuapeu ze ai mâ-teube-kaira ge nguateu la de lei. 22Ziemmena Na â ranggai’ndibe luigum ze tewtat la de lei; kane pechu zua ra kelutewgaipeu â pe duângga gu lei!” ze kacheu de lei. 23Dadege penui ruage châu ne aize tew lêu gu mei ze penui karai ge ’nneu’nruichu di de lei.

Dinei-kahelitbe

24Penui ruage châu je dilangbe hang riam gai ra mei be hangge penui ruage getube bam di de lei. 25Dadege pa ne penui je, “Jentailme gu heguangme â penui peireige penui sui-sui ne tew lei; zai penui peireige rezieteime je â penui ne ka’nggiame bau ze ku lei. 26Kane ningnui â aigum bam se lau; chisuarane â, ningnui ruage dilangpeu zene peize henalangpeu chang lau, zai ningnui ruage kanguapeu zene peize ka’ngguapeu chang lau. 27Châu ne di-bi lau, mâ-teube-kaira ge ka’ntaupeu mei nune ka’ngguapeu lau, chize â, ka’ntaupeu ze mak ti lau? Kane I â ningnui ruage ka’ngguapeu gum ze bam lei.

28“Achu kakedakbe ramme daube ge ningnui â achu nguabam-bamme bau de lei; 29a peu ne a hang heguangram pei gai gum ze ningnui hang I du pei gai de lei, 30dezai a gu heguangram ge a gu mâ-teube-kaira ge ningnui teu ze sak le ra, zai Israelme zat kereu-ze-kename je samram ze heguang-bamrak ramme ge ’ntau le ra hangge zeu.

Peterbe pechu ’Ngkimrabe Isua Rangka’ntuabe

(Mat 26.31-35; Mrk 14.27-31; Jhn 13.36-38)

31“Heguang ne, Simonbai, Simonbai, pie le lau, Satan ne ningnui ’nteumena je chêu giam gum ze giâm ra kie la de lei. 32Kane nang keneibe kâukeu mak ra hang ning hang I kellum gai ’nde lei; zai nang ’nreiwang dai dezai ning puiname ran tew’nchi gai lau,” kacheu de lei. 33Dadege Peterbe ne pechu, “Heguang gau, I â nang benai kebangki ge nguabang ra, zai kechaibe ge nguachai ra kedâ lu de lei,” kacheu de lei. 34Pa ne, “Peterbai, I ningchu rang lei, nang achu chibe ze, luachum ’ngkimchang gai mak tâne nemai ge ’nruirie kua ra mak lei,” acheu bei lei.

Rangkangrak, Chiaka, Hiazuttkie

35Zai pa ne penui je, “I ne ningnui je rangkângrak, chiaka, zai pîchûp ga ze langgaibe ting ge ningnui mâ-mâ ga ze daulak bam mei?” kacheu de lei. Penui ne, “Mâ de mak lei,” kacheu de lei. 36Pa ne penui je, “Kane chuna â, pe dage rangkângrak bambe kau â peize chize tei le lau, zai chigum ze chiaka du peize tei le lau. Zai mige pe dage hiazutkie kegabe kau â, peize paî zua lu ze kat lui le lau. 37Ningnui je I rang lei, ‘Pechu â hedeka’ngkame ruage riam gai ’nde lei,’ ze chi rawgaibe sam ze a peireige tewpui sing gai ra daseu; zai a deu ge rawgai’ndibe ze tewpuigaibe chang ra de lei,” kacheu de lei. 38Dadege penui ne, “Heguang gau, Ni, aige hiazutkie kena la lei,” kacheu lei. Dadege pa ne penui je, “Chize bui de lei,” acheu bei de lei.

Olib Loa ge Isua Kakellumbe

(Mat 26.36-46; Mrk 14.32-42)

39Zai hela ge pa pat lu tingtie gum ze Olib Loa ’mbe tat ti de lei; zai pe gu kenieme du pe chai suitat ti de lei. 40Zai chipau bâm pa chang dege pa ne penui je, “Keduaibe ge ningnui gut mak ra kellum bam lau,” kacheu de lei. 41Zai penui dagene tingchu tuâchangduibe riâ ge pa pat ze kukdungkeu lu kellum ze, 42“A peu gau, nang ne nei bei zai â aipau piak ze a dagene tei’mbia ne lau; acheuleusedu a suî ne mak ze ning suî ne peize chang lau,” kacheu de lei. 43Dadege â tinggîm ’mbene angel hangkat ne pe ran tew’nchi gai ze pechu lia de lei. 44Pe lungkahereube geteube gene pe laîkai ze kellumranbi-bi ze bam lei; zai pe gu ’nnupdui ze hejaichîpum kedibe ramme kedei ge zâukeugaibe gum ze zâukeu de lei. 45Zai kakellumbe gene pa chu lu dege, pe gu kenieme tailam pat te lei, zai penui lung kahereube ziegene jeikeu di laleube pa ngau de lei, 46dadege pa ne penui je, “’Ndaitew ze ningnui jeikeu di lau? Ningnui keduaibe ge gut mak ra chu lu kellum zu lau,” kacheu de lei.

Isua je Nimbe

(Mat 26.47-56; Mrk 14.43-50; Jhn 18.3-11)

47Zai pa acheu sa lage, pe gu kenieme hangkereu-ze-kename ruage hangkat Judabe kacheupeu ne baudime je ngua lu ze wangleu de lei. Isua je keput kai ra pe tailam pa wang de lei; 48kane Isua ne pechu, “Judabai, nang kakeputbe zene ziemmena Na je zua ra tew mei?” kacheu de lei. 49Zai pe taihia ge bamme ne ’ndaikau wangchang gu mei be ngau dege penui ne, “Heguang gau, hiazutkie ne anui ne bi be ra mei?” kacheu de lei. 50Zai penui ruage hangkat ne, tingkugechîngpeu gu kebang hezat’mbia kun bitaktua ’ndi de lei. 51Kane Isua ne, “Aipau riâ gene sau de zu lau!” acheu bei de lei. Zai pa ne pe kun deî ze tew’mmi gai bei de lei. 52Chidadege Isua ne tingkugechîngme benai kellumki ge sipai besuitewme zai gechîngme pechu ’nggi ra patme je, “Hegasut-teupeu je ’nggi ra gum ze hiazutkie benai hetui pua lu ze ningnui pat mei? 53Kellumki ge patingnaigepat ningnui dage I bambe luage a peireige ningnui bahuâ kai mak zeu. Kane aize ningnui hangge panehî de lei, zai kemuîbe gu rezie de lei,” kacheu de lei.

Peterbe Isua je Ka’ngkimbe

(Mat 26.57,58,69-75; Mrk 14.53,54,66-72; Jhn 18.12-18,25-27)

54Dadege â pechu penui nîm lu nguatat ze tingkugechîngpeu ki lam’mbe nguagut kai bei de lei. Peterbe kedeu ’mbene sui lei; 55zai kilûngsiam kedibe sunggangkelî ge penui hemitew gai lu, penui ’ntaukaheruabe luage Peterbe du penui ruage ’ntau bam lei. 56Dadege hemi’mbi kebabe taige pa ’ntaubambe luage ’mpuimi hangkat ne pechu ngau lu dege, pechu pie sing lu ze, “Aipaupeu du pe dage bambe kau de lei,” ze kacheu de lei. 57Kane chize pa ne ’ngkim ze, “’Mpuimi gau, I â pechu chî me lei,” kacheu de lei. 58Zai mâtiege mak ze mige ne pechu ngau lu pechu, “Nang du penui ruage hangkat lei,” kacheu de lei. Kane Peterbe ne, “A za gau, I â mak lei,” kacheu de lei. 59Zai ’nchetkak kat gum bam gai dege, kêdapeu ne du sa sing gai ze, “Aipaupeu ze du pe dage bambe kau sing de lei; pa du Galili’mpeu daseu,” ze acheu bei de lei. 60Kane Peterbe ne, “A za gau, nang samsabe I â chî me lei,” kacheu de lei. Zai pa acheu sa lage luakatne ’nruirie kua gai di de lei. 61Dadege Heguangpeu ’nreiwang lu, Peterbe je pie de lei. Dadege Heguang ne pechu, “Nemai muî ’nruirie kua makge nang achu luachum ’ngkim gu lei,” kacheube sam ze Peterbe ’nningdau di de lei. 62Dadege â pa pat lu, hapkehipkoak bam di de lei.

Isua je Teihenuitew ze Lakbe

(Mat 26.67,68; Mrk 14.65)

63Chunage Isua je teime ne pechu teihenuitew ze lak te lei; 64zai penui ne pe mik du dum lu pechu ’nneu ze, “Rang gai ni lau! Ningchu lakbe ze châu lau?” kacheu de lei. 65Zai kêdadabe sam ramme du penui ne pechu ’nrû ze misongga sa gai de lei.

Isua je Samrambeki ge Teiwangbe

(Mat 26.59-66; Mrk 14.55-64; Jhn 18.19-24)

66Zai tingba dadege, baudime ruage gechîngme, tingkugechîngme zai leisirawme wang’ndui gai de lei; zai penui ne penui gu samrambeki ’mbe pechu nguatat lu penui ne, 67“Nang ze Krista mei be ze anui je rang lau,” ze kacheu de lei. Kane pa ne penui je, “I ne ningnui je rang gai dizai â, ningnui ’nnum’mmi ra mak lei; 68zai I ne ningnui je ’nneu dizai â, ningnui kak ra mak lei. 69Kane chuna gene seu ze ziemmena Na â reziechibe Hera hezat’mbia ba ge ’ntau du de lei,” acheu bei de lei. 70Dadege penui ’nteumena ne, “Chigum dizai â, nang ze Hera Na de mei?” kacheu de lei. Dadege pa ne penui je, “Ningnui ne I ze de lei be rang lei,” kacheu de lei. 71Dadege penui, “’Ndaikau sakki anui ’nnang sua dai ra lau? Pe mui sing gene anui seu de zeî lau,” kacheu de lei.

Currently Selected:

LUKA 22: ZEMEBSI

Highlight

Copy