LUKA 20

Isua gu Rezie peireige Mâ-ka’nneube

(Mat 21.23-27; Mrk 11.27-33)

1Mai kat â kellumki ge baudime je pa mâ-geteilia ze sam keyibe sa lage, tingkugechîngme benai leisirawme ne gechîngme je ngua lu pe dage hang ze, 2pechu, “’Ndaikau gu rezie ne aipau tâ ramme nang tew mei zai châu ne aipau rezie ningchu pei bei ze nang tew mei be anui je rang lau,” kacheu de lei. 3Pa ne penui je kak ze, “I du ningnui je sam kat ’nneu gu lei; achu chunage ranglia lau, 4Johanbe gu baptisma ze tinggîm gene pat mei nune ziemmename dagene pat lau?” kacheu de lei. 5Dadege penui karai tu ze, “Anui ne, ‘Tinggîm gene lei,’ ze acheu dizaine â, ‘’Ndaitew ze ningnui pechu ’nnum’mmi mak lau?’ ze acheu gu lei; 6kane anui ne, ‘Ziemmename dagene lei,’ acheu dizaine du baudime ’nteumena ne anui je tingchukâng ne tuâ gu de lei; Johanbe â kemeu’mpeu lei be penui ’nnum’mmi sing di daseu.” Ze kacheu de lei. 7Chidadege â ’ndai’nggene pat mei be penui â chî me lei ze penui ne kak te lei. 8Dadege Isua ne penui je, “I du ’ndaikau gu rezie ne aipau tâ ramme I tew mei be ningnui je rang ra mak lei,” acheu bei de lei.

Grepchî Merie ge Tâtewkadekime sam’nda

(Mat 21.33-46; Mrk 12.1-12)

9Dadege â baudime dage aipau sam’nda pa saliachu di de lei: “Hangkat ne helu ge grepchîria tau gai lu ze, chi tewdekirame dage pei gai nan ze heram kedeu ’mbe bamnak kai ra hang tat ti de lei. 10Zai beting chang dadege pa ne pe gu ka’ngguapeu hangkat je grepchî merie tewkadekime dage grepchî pe damrabe teiwang ra lang gai bei de lei; kane grepchî merie tewkadekime ne pechu bêu bei de lei; zai pe barua lang gai dai bei de lei. 11Dadege ka’ngguapeu kêdabe kau je lang gai bei de lei; zai pechu du bêu bei, zai tew’ngngam gai lu ze pe barua lang gai dai bei de lei. 12Zai pakechumpeu je pa lang gai kadai de lei; aipaupeu je tewhejam gai lu hela ’mbe tuâpat kai bei de lei. 13Dadege grepchî merie ’mpaupeu ne, ‘I ’ndaikau tew ra lau? A na kehungpeu je lang gai gu lei; pechu â penui ne hengêutew lêu gu lei,’ ze kacheu de lei. 14Kane chi grepchî merie tewkadekime ne pechu ngau lu dege, penui karai dam ze, ‘Pe heu lurapeu ze ai de lei; pechu anui tewchat ne kei lei, chidezai pe heu ze anui hang chang le ra hangge zeu,’ ze kacheu de lei. 15Dadege â grepchî merie gene penui ne pechu tuâpat ze tewchat ’ndi de lei. Acheuzai â grepchî merie ’mpaupeu ne penui je ’ndaikau tew gai gu lau? 16Pa ne wang lu grepchî merie tewkadekime je tew’ngga nan ze chi grepchî merie ze miramme je pei ’ndu lei,” ze acheu zeu. Penui ne aize seu lu dege, “Chigumbe â peize wangchang se lau!” ze penui kacheu de lei. 17Kane penui je pa ne pie gai lu acheu sa ze, “Acheuzaine aize rawgaibe ’ndaikau lau:

‘Hekitewme ne tuâpatkaibeibe chukâng zene pemikchukâng betâu dilangbe chang di de lei,’ kacheube zeu?

18Mi-mige de chipau chukâng peireige keugaibe kau â, sia kam gai du lei; kane chize ne mi-mi peireige keu gai dizai â chize ne pechu sîmruai ’ndu lei,” kacheu de lei.

’Mpuâ Peibe Tedeu ge Samka’nneube

(Mat 22.15-22; Mrk 12.13-17)

19Zai chipau lua sing ge tingkugechîngme benai leisirawme pe peireige penui ba pat kai ra tew de lei; kane baudime je penui hing di lei; aipau sam’nda ze pa ne penui peireige sa gai lei be penui chîdibe ziegeneu. 20Chidadege â laksaibe ne samrambe rezie kangge pechu peipat kai ra hangge pa ne ’ndaikau sa mei be nîmteilerabe chîam hang mâ du makbe helî-tak-tewme, chi ’ngkimpieme je penui ne lang gai ze penui lîmpiekua de lei. 21Penui ne pechu ’nneu ze, “Geteiliapeu, nang â gesangsing ne mâ-salia ze getei, zai kehung-ka’nrietewbe tak teilia mak kane gesangsing ne Hera gu ’mpuî tak ze geteilia de lei be anui chî lei. 22Kaisarbe je anui ne ’mpuâhâ pei ra besie mei nune besie mak lau,” ze kacheu de lei.

23Kane pa ne penui ningching siabe tak chî lu ze penui je, 24“Rangkângpum achu teilia lau. Chige châu luî zai châu gu samrit la lau?” ze kacheu de lei. Penui ne “Kaisarbe gu lei,” acheu bei de lei. 25Pa ne penui je, “Chidaze Kaisarbe gu ramme ze Kaisarbe je pei be, zai Hera gu ramme ze Hera dage pei be lau,” acheu bei de lei. 26Dadege â baudime bambe ge pa samsabe ramme gene pechu penui mâ de tewchi lak tai de lei; kane pe sam kakbe penui ’nningdaulak ti ze penui kuâneu mak rim bam di de lei.

Kechaibe gene Zuachube Tedeu ge Ka’nneube

(Mat 22.23-33; Mrk 12.18-27)

27Saddusime hanggesame ringchukadaibe ga lei, kacheume bau wang de lei, 28zai penui ne pechu sam’nneu ze, “Hangkat ne, pe nâu â bam, kane pe na ga ze pa chai di lêuzai â pe sikina hangkat ne chi ’mpuimi je pe nâu hang lu lu chi pe sipeu hik hangge napoine ramme je teichu gai sing ra hang Mosabe ne anui hangge rawdiak kai lei. 29Chunage pe sikiname hangsena bam de lei; meraipeu pe nâu kû lu napoine lung mak ze chai di lei; 30zai chi pesinpeu 31benai pakechumpeu ne pechu pe nâu hang lu de lei, chigum acheu ze hangsename penui na ramme sâudiak kai mak ze chai kam di lei. 32Bechâng ge â ’mpuimi ze du chai di lei. 33Chidaze ringchukadaibe ge châu nâu hang chi ’mpuimi ze chang ra lau? Hangsename ne pechu ngualung kam gai daseu?” ze kacheu de lei.

34Dadege Isua ne penui je, “Henai rehei gu hename â henâu ku, zai mei ra pei lei; 35kane chipau ting riâ chang ze bam ra buime hang chakkaime benai kechaibe gene ringchukadaibe ge â henâu du kû mak, zai mei de mei me lei, 36penui â ringchukadaibe name chang ze angelme benai riâ kat ge bam ze Hera name changdibe ziegene penui â chai-daichi lak ti de lei. 37Kane Mosabe ne du Tingwang je, Abraham Rapeu, Isaak Rapeu, zai Jakob Rapeu ze kube bâm hereupuîtum rasam rawgaibe ’nchui gene kechaime je kuakchu gai bei de lei be teilia gai lei. 38Chunage pa â kechaime Rapeu mak lei, kane keringme Rapeu lei; pe hangge anui ring kam daseu,” ze kacheu de lei. 39Dadege leisirawme hanggesame ne kak ze, “Geteiliapeu, nang sagai’mmi-desang de lei,” ze kacheu de lei. 40Pechu penui mâ sam du ’nneu dai hing di dadegeu.

Messiah Deu ge Mâ-ka’nneube

(Mat 22.41-46; Mrk 12.35-37)

41Kane pa ne penui je, “’Ndaigumbe gene penui Krista je Dabidbe na lei ze acheuchi ra lau? 42Dabidbe sing ne Getoabe leisikuak ge rang gai ze,

‘Tingwang ne a Wang je rang ze,

a hezat’mbia ge ’ntau lau,

43ning teureime je ning pichaî hang I ne tew gai mak tâneu,’

kacheu daseu.

44Chigum ze Dabidbe ne pechu a Wang ze kû de lei; chidaze pa ’ndaigum ze pe na chang ra lau,” ze kacheu de lei.

Hingde Geteiliame je Isua ne Kiabe

(Mat 23.1-36; Mrk 12.38-40)

45Zai ’nteumena keseube gene pa ne kenieme je, 46“Leisirawme (hingde geteiliame) chi penui puâ kaisup kai lu tatruaneime, zai hechaiki ning ramme ge hebakellumtewbe ramme je ’nchâ ze, ka’nduibeki ramme ge bâm yilangbe ramme benai luube-bâm ramme ge hengêutewbe bâm ramme je ka’nchâme, 47chi kemîpuime ki gu teu’nsui lu, ruichim ’nde ra hang pahelîtew ze kellumtie ze bamme je ’ntîng le lau. Penui â tew’ngkuigaibe kedibe ngau gu lei,” ze kacheu de lei.

Currently Selected:

LUKA 20: ZEMEBSI

Highlight

Copy