JENESIS 8
8
Hedui Naîsaudibe
1Kane Noabe benai hekaune ramme, zai kaurui ramme pe dage ’nneikuak lungge bamme je Hera ne chibam lei. Zai Hera ne kedeirei ge tingkai guiwang ra tew gai bei de lei, chidadege â hedui chipkeu di de lei; 2kechukbe bâm gene dui depin puakbe ramme benai tinggîm leubaki ramme tewnam gai, tinggîm gene ting ruikeube tew’nsau gai, 3zai kedeirei ge hedui chipbi-bi ze bam di de lei. Hezie haî kat ze rengeu bamgailube châng dege â hedui chipkenei-chip ti de lei; 4zai pasenabe kêu hezie kereu ze sena mai dege, Ararat deiloa ramme ge ’nneikuak sau gai di de lei. 5Zai hekêu pakereube riâ â hedui chipbi-bi kêu ze bam di de lei; chipau kêu naimikpui raîlangbe mai dege kedeiloa ’ntûm hube ramme ngaupat ti de lei.
6Hezie hedai kam gai dege, Noabe pa ne tewlube ’nneikuak gu leubaki latpat te lei; 7zai ’nggakpui je langpat kai de lei; zai kedeirei ge hedui changkeu de mak tâne liamguarua ze bam de lei. 8Chidadege kedeirei ge hedui chip ti de mei be chî le ra pe dagene depeine langpat kai de lei; 9kane depeine â pa tâugairabe bâm gabe ziegene pe tailam ’nneikuak ge liamwang gai dai di de lei, kedeirei ge hedui ne puigit di gerei dadegeu. Chidadege pe ba getuapat lu pechu ’nneikuak lung ’mbe teigut kai dai ’ndi de lei. 10Hezie sena riâ pa bamkuâ gai dai lu dege, ’nneikuak gene depeine je langpat kai kadai de lei; 11zai hegî dege depeine pe dage helatwang gai kadai de lei, zai ni, pe mui gene olib-neu kiakbet rechidalube puawang de lei; chidadege â Noabe kedeirei ge hedui chipkeu di de lei be chî di de lei. 12Chidadege â hezie sena bamkuâ-gaidailube châng dege, depeine je langpat kai kadai de lei; chidege â depeine pe dage heletwang dai ta di de lei.
13Noabe kum haî seruk ze kat changbe kum, raîlangbe kêu gu naimikpui raîlangbe mai ge, hedui chip ti de lei; Noabe ’nneikuakki ’mpûm riput lu heguarua gai dege kedei changwangdibe ngau di de lei. 14Pakenabe kêu hezie ’ngkai ze sena mai chang dege â kedeirei changku di de lei. 15Chidadege Hera ne Noabe je, 16“Ning nâu benai ning name zai penui nâu ramme je ngua lu hedui ’nneikuak gene hela zuapat chu lau. 17’Nruine ramme benai hekaune ramme liaruabe zat ramme ning dage bambe je kumpat kai zu lau, chidezai kedeirei ge penui hingpat ze pung ze sapuigit ze bam dai le ra hangge zeu,” ze rang gai de lei. 18Chidadege Noabe pe nâu, pe name zai pe name nâu ramme je ngua lu hedui-’nneikuak gene hela zuapat ti de lei. 19Zai Hekaune zat ramme, ’nruine zat ramme, ’ngngairuabe zat ramme, ’nruine zat ramme, kedeirei ge liaruabe zat ramme leine pebau-bâutew ze ’nneikuak gene hela zuapat kam di de lei.
Noabe ne Herâtewbe Peipatbe
20Dadege Noabe ne Tingwang hang herâtewrabe bâm hang tew gai lu, hekaune zat leine gene benai ’nruine zat leine gene ka’nchibe ramme tei lu herâtewbe bâm ge kerube-râtew gai de lei. 21Zai herâtewbe rîm yibe Tingwang nam gai lu dege, Tingwang ne pe lung gene, “Ziemmena ziegene kedei je mâtew-tewsede I deset kai dai ra mak lei, hena’ngka gene du ziemmena lung ka’nningbe â sia daseu; chunage I tewgai’ndibe luigum ze â keringbe zat leine peireige tew’nsia dai ra mak lei. 22Kedeirei bam tâne, helei lingbe ting benai gatbe ting, kahegeibe benai lumbe, tinglum ting benai hetating, ’nrîmbeting benai tingmuibe ting bamsau dai ra mak lei,” ze kacheu de lei.
Currently Selected:
JENESIS 8: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.