JENESIS 9
9
Noabe dage Hera gu Samhatkaibe
1Zai Hera ne Noabe benai pe name je ’nnam gai ze penui je, “Heluîhing ze pungbi-bi ze bam zu lau, zai kedeirei lungpuigit ze bam zu lau. 2Hekaune ramme leine, ’nruine ramme leine zai hekâ ramme leine ne ningnui je hing-desang ze bam gu lei; ningnui ba ge penui je peipat kai de lei. 3Mâ-keringbe ’ngngairuabe zat leine ningnui hetak hang chang ra de lei; zai hegireuneu ka’ndiakbe bang ramme ningnui hang I ne peigai’ndibe luigum ze, mâgetaleine ningnui je I ne pei de lei. 4Hemei ze pekaupui keringbe luî gene ningnui teumakrabe runne lei, chize pe jai je rang lei. 5Ning gu keringbe jai mî ze I ne peiruî dai gu lei; ziemmena keringbe lube hekaune je du I ne hekûmtew gu zai tewchat sing gu lei. 6Hera ne ziemmena je peluî gene ’ndam gai de lei; chidaze mi-mige de ziemmena je kegîbe kau je â pechu du ziemmena ne tewchat ku lei. 7Zai ningnui â heluîhing ze pungbi-bi ze bam zu lau, kedeirei ge misongga ze heluîhing ze kedeirei ge lungtuipik ze bam zu lau,” ze rang gai lei.
8Dadege Hera ne Noabe benai pe name je, 9“Pie le lau, I ne nang benai ning dagene piakeume leine dage, 10zai keringbe zat leine, ’nruine ramme benai hekaune ramme ’nneikuak gene nang nguapatkadaibe leine dage a gu samhatkaibe tew’ntip kai de lei, 11aipau sam ramme gene ning dage I samhat kai de lei: keringbe bambe zat leine je hedui naîwangbe ne mâtew-tewsede tew’nsia dai ta de ra I deseu gai de lei; mâtew-tewsede heduinaîwangbe ne kedeirei ze tew’nsia ta du de lei. 12Zai Hera ne rang ze, betingbeta hangge nang benai, zai keringbe zat leine kakge I samhatkai’ndibe ze aize ne ka’nchetbe de lei, 13kemâu ge a gu ’ngkîtplei kai lei, chize ne kedeireime benai a kakge a gu samhatkaibe chibam ra ka’nchetbe chang ra de lei. 14Kedeirei ge kemâu ramme I teiwang gai bei, zai kemâu ramme ge ’ngkîtplei ngau dezai, 15anai kakge, zai hekaune ramme leine dage a gu samhatkaibe ze I chibam gu lei; dezai hedui ne keringbe leine je tew’nsia ra naîwang dai ra mak lei. 16Kemâu ramme ge ’ngkitplei puakpat dezai chize I pie gai gu, zai I benai kedeirei ge keringbe zat leine kakge betingbeta hang samhetkai’ndibe ze ’nningdau bam gu lei,” ze kacheu de lei. 17Hera ne Noabe je, “Aize I benai kedeirei ge keringbe zat leine kakge samhatkaibe gu ka’nchetbe I kaibe ze de lei,” ze kacheu de lei.
Noabe benai Pe Name
18Noabe name bau ’nneikuak gene zuapatme bau ze Shembe, Hambe, zai Japhethbe de lei. Hambe ze â Kanaanbe peu lei. 19Aime hangchum ze â Noabe name bau de lei; kedeirei ge ziemmena leine aime dagene hingkeu de lei.
20Noabe ne kedei tâ tewteu-railangpeu de lei. Grepchî merie pa tew de lei; 21zai wain pa sak kai lu dege, pa meneu di, pe paîni kai ta di pumlâng pe gu hetiamki ge jei bam de lei. 22Dadege Hambe, Kanaanbe peu ne pe peu pumlâng bambe ngau lu hela zuapat ze pe sipeu benai pe kinapeu je salia bei de lei. 23Chidadege Shembe benai Japhethbe ne paî tei lu, penai keitoa ge tap kai lu, ’nchai’ngngîngut ze penai peu gu pumlâng ze bambe tapchim gai de lei; penai ju ’nnuk ti ze penai peu pumlâng ze ngau mak tai lei. 24Noabe kameneube gene ’nrakchu dai dege pe na henabipeu ne pechu ’ndaikau tew gai bei mei be chî lu dege,
25pa ne,
“Kanaanbe je deset kai de lei!
pa â pe sime gu kebangme gu kebang chang gu lei.
26Shembe Rapeu Tingwang je toa lau!
Kanaanbe ne Shembe gu kebang chang gu lei.
27Hera ne Japhethbe je tewpung gai be lau!
peize Shembe hetiamki ramme ge lung ze bam lau,
zai Kanaanbe ne pe gu kebang peize chang lau,”
ze rang gai bei de lei.
28Heduinaîbe châng Noabe kum haî chum ze rengeu ring gai de lei. 29Noabe ringbe tingkum pelane haî sekui ze rengeu lei, zai chipau chângge pa chai di de lei.
Currently Selected:
JENESIS 9: ZEMEBSI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.