JENESIS 7
7
Hedui Naîwangbe
1Chidadege Tingwang ne Noabe je, “Nang benai ning kibâume ’nneikuak ge gut kam gai zu lau, aipau rehei ge nang â ziemmena kapelingbe kau lei be I ne ngau lu daseu. 2Hekaune ka’nchibe zat gene bepui, perie sena-na hekaune ’nchimakbe zat gene bepui, perie kat-kat; 3zai liamruabe ’nruine zat gene bepui, perie sena-na ning dage teigut kai le lau, kedeirei ge chipau zat ramme ringpat le ra hangge zeu. 4Hezie senane lungge kedeirei ge tîngna hedai, muî hedai tingrui ra hangge I lang gai gu daseu; zai I ne tewgaibe mâ-keringbe zat leine ze kedeirei gene I ne tew’ngga kam gai gu de lei,” ze rang gai de lei. 5Zai Tingwang ne pechu ranggaibeibe leine Noabe tew de lei.
6Kedeirei ge hedui naîwangbe ting ge Noabe kum haî seruk chang di de lei. 7Zai hedui naîwangbe gene ’mbia de ra hangge Noabe benai pe na ’mpeumi ramme, zai pe nâu benai pe na nâu ramme je ngua lu ’nneikuak ge gut kai di de lei. 8Hekaune ka’nchibe benai ’nchimakbe ramme, zai ’nruine ramme, zai kedei ge liaruabe ramme gene, 9bepui, perie, kena-na Noabe ne ’nneikuak ge teigut kai bei de lei, Hera ne Noabe je ranggaibeibe luigum zeu. 10Zai hezie sena bamgailube châng dege â kedeirei ge hedui naîwang chu di de lei.
11Noabe ringbe tingkum haî seruk wangchangbe kum pakenabe kêu hezie kereu ze sena mai dege â sungkling gechukbe gene hedui-depin kedibe ramme puakpat chu di de lei, zai tinggîm gu leubaki ramme lat kai bei de lei. 12Chidadege â kedeirei ge hezie hedai, tingmuî hedai tingrui chu di de lei. 13Chipau mai gîm sing ge Noabe benai pe name, Shembe, Hambe, zai Japhethbe zai Noabe nâu benai pe name nâu ramme ’nneikuak lungge gut ti de lei; 14penui benai hekaune zat leine, kaurui zat leine, kedei ge liaruabe zat leine zai ’nruine zat leine ze kena-na gut ti de lei. 15Mâ-keringbe pechui lu ze bambe zat leine bepui, perie kena-na tei’nsangsiak lu Noabe dage ’nneikuak lungge gut ti de lei. 16Zai Hera ne pechu diegaibeibe luigum ze keringbe kau zat leine bepui, perie zuagut te lei; zai Tingwang ne pechu ’ngkam kainam ’ndi de lei.
17Kedeirei ge hezie hedai heduinaî ze bam de lei; zai hedui ’ntuachubi-bi ze ’nneikuak ze hedui peirei ’ntiamchu di de lei, zai kedei gene kehu ’mbe ’nneikuak ze ’ntiamrua bam di de lei. 18Heduinaîbe sau mak, zai kedeirei gene sungchubi-bi ze bam gerei de lei; hedui peirei ’mbe ’nneikuak â ’ntiamlia ze bam de lei. 19Hedui sungchu’ngngu-desangdibe ziegene ting kehube kangge kedeiloa kehube leine naîchim kam di de lei; 20kedeiloa kehube peirei gene sâu kereu ze mengeu naîchuchang di ze bam de lei. 21Mâ-keringbe zat kedeirei ge ’ngngai ze bambe zat leine, ’nruine ramme, perui ramme, hekaubena zat ramme, pedungtew ze lungbe zat ramme, zai ziemmena ramme leine chai gai kam di de lei; 22kedei changkube ge pe dage keringbe chui lu bambe zat leine chai kam di de lei. 23Kedeirei ge bambe zat leine ziemmena zai hekaubena ramme, zai liaruabe zat ramme, zai liamruabe ’nruine zat ramme leine je pa ne tew’ngga kam ’ndi de lei. Noabe benai pe dage ’nneikuak lungge bamdime je runne ’nsak kai de lei. 24Zai hezie haî kat ze rengeu riâ â kedeirei ge heduinaî ze bam de lei.
Currently Selected:
JENESIS 7: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.