Kolose Ko e Talateu
Ko e Talateu
Ko e Tohi ʻa Paula ki he Kakai Kolosé, naʻe fai ia ki he siasi ʻi Kolosé, ko e kolo ʻi ʻĒsia Minu ʻi he fakahahake ʻo ʻEfesoó. Naʻe ʻikai ke fokotuʻu e siasi ko ʻení ʻe Paula, ka naʻe tuʻu ʻi he feituʻu naʻe ongoʻi ʻe Paula ko hono fatongia ke tokangaʻi, he naʻá ne fekau atu ʻa e kau ngāue mei ʻEfesoó, ʻa e kolomuʻa ʻo e vahefonua Loma ko ʻĒsia. Ne ʻilo ʻe Paula ʻoku ʻi ai ʻi he siasi ʻi Kolosé ʻa e kau fai akonaki hala, ʻa ia naʻa nau taukaveʻi tokua ʻe toki lava ke te ʻiloʻi ʻa e ʻOtuá mo fakamoʻui kakato kita ʻi haʻate hū ʻo lotu ki ha niʻihi ʻi he “kau pule mo e kau maʻu mafai fakalaumālié”. Pea ʻikai ngata ai, kae toe taukaveʻi e he kau faiako ko ʻení, kuo pau ke te tali ke fai ha ngaahi ouau makehe, ʻo hangē ko e kamú, mo tauhi ʻa e ngaahi tapu ʻi he meʻakai mo e ngaahi meʻa kehe. Ko e taumuʻa ʻo e tohi ʻa Paulá ke fakafepakiʻi ʻa e ngaahi akonaki hala ko ʻení ʻaki ʻa e ngaahi akonaki faka-Kalisitiane totonú. Ko e ʻelito ʻo ʻene tali ko e pehē ʻoku meia Sīsū Kalaisi ʻa e fakamoʻui kakató, pea ko e ngaahi tui kehé mo e ngaahi ouau kehé ko honau takiheeʻi meiate ia. Naʻe tuʻunga ʻia kalaisi hono fakatupu ʻe he ʻOtuá ʻa māmaní pea ʻokú ne fakafoki ai pē ʻa e māmani kiate ia ʻia Kalaisi. Ko e ʻamanakiʻanga pē taha ki hano fakamoʻui ʻo māmani, ko ha taha ʻa māmani mo Kalaisi. Naʻe toki fakaikiiki mai leva ʻe Paula ʻi heʻene tohí ni ʻa e anga ʻo e felāveʻi ʻa e tahaʻi moʻoni ko iá mo e moʻui ʻa e kakai ʻoku tuí. ʻOku tau fakatokangaʻi ʻa e meʻa mālie ʻi he tohí ni ʻa Paulá: ko hono ʻave ia ki Kolose ʻe Tikiko, fakataha mo ʻOnesema, ko e tama pōpula naʻe fai tohi ai ʻa Paula kia Filimoné. Ko e Kakano ʻo e Tohi Ko e talateu 1:1-8 Ko e anga ʻo Kalaisí mo ʻene ngāué 1:9-2:19 Ko e moʻui foʻou ʻia kalaisí 2:20-4:6 Ko e tātuku 4:7-18
Currently Selected:
Kolose Ko e Talateu: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.