2 Tesalonaiká 2

Ko e Tangata Faikoví

1-2Ko e me‘a eni ‘e hoko ‘i he liuaki mai ‘a hotau ‘Eiki ko Sīsuú. ‘E ‘ohake fakataha kitautolu hono kotoa ke tau fe‘iloaki mo ia. Ko ia ai, kāinga, ‘oua ‘e uesia ho‘omou tuí he tala holo ‘e he ni‘ihi kuo ‘osi foki mai ‘a e ‘Eikí. Ko e loi ia. ‘Oua te mou tui ki ai, ‘o tatau ai pē pe te nau tala atu ko e Laumālie Mā‘oni‘oní na‘á ne fakahā ange kiate kinautolú, pe ko ha taha kehe, pea a‘u ai pē ki ha tohi ‘amautolu. 3He ‘e angatu‘u ‘a e kakaí ia pea toki liuaki mai hotau ‘Eikí. Ka ‘e ‘uluaki hopo hake ‘a e tangata faikoví, ‘a ē kuo ‘osi pau hono faka‘auhá. 4Ko e toko taha ko iá, te ne fakafepaki‘i ha me‘a pē ‘oku mā‘oni‘oni pe tāpuhā. Te ne a‘u ai pē ‘o nofo hifo he Temipale ‘o e ‘Otuá ‘o tala ko e ‘Otuá ia. 5Na‘á ku ‘osi fakamatala atu foki e me‘a ko iá ‘i he‘eku ‘a‘ahi atú. 6Kuo mou ‘osi ‘ilo e me‘a ‘oku kei tuai ai ‘a e hopo hake ‘a e tangata ko iá. 7‘Oku lolotonga ngāue mai hono ivi fufuú. Ka ‘oku ‘i ai e toko taha ‘okú ne ta‘ofi tu‘u ia. Pea ‘e ‘ikai ke lava ke hopo hake ‘a e tangata faikoví kae ‘oua leva kuo le‘ei ‘a e toko taha ko iá ki he tafa‘akí. 8‘E toki hopo hake leva ‘a e tangata faikoví. Ka ‘e hanga ‘e he ‘Eiki ko Sīsuú ‘o fakangata ‘aki ha folofola ‘e tō mei hono fofongá. ‘E ‘auha ‘aupito ia ‘i he liuaki lāngilangi‘ia mai ‘a e ‘Eikí.

9Ka hopo hake ‘a e tangata faikoví, ‘e fai ‘e Sētane ha ngaahi mana loi, mo ha ngaahi faka‘ilonga loi. 10Te ne kākaa‘i mo lohiaki‘i e kakai kuo ‘osi hē si‘enau mo‘uí. Na‘a nau mei hao pē, ka ko e ‘ikai ke nau fie ‘ofa he mo‘oní ka nau fakasītu‘a‘i iá. 11Ko ia, ‘e fakangofua ai ‘e ‘Otuá ke takihala‘i kinautolu ke nau tui ki ha koto loi. 12‘E tautea kātoa kinautolu, koe‘uhi ko ‘enau manako ange he faikoví ‘i he‘enau tui ki he mo‘oní.

Tu‘u Ma‘u

13Kāinga, ‘oku ‘ofa ‘a e ‘Eikí ‘iate kimoutolu. Pea ‘oku langa‘i ai pē ‘emau fakamālō ki he ‘Otuá koe‘uhí ko kimoutolu. Ko kimoutolu na‘e ‘uluaki fili ‘e he ‘Otuá ke fakahaofí. Na‘e fakamā‘oni‘oni‘i kimoutolu ‘e hono Laumālié, pea na‘a mou tui ki he mo‘oní. 14Ko homou ui na‘e faí, na‘e tu‘unga ia he ongoongo lelei na‘a mau malanga‘i atú. Ko homou ui ia ke mou ma‘u homou ‘inasi ‘i he lāngilangi ‘o hotau ‘Eiki ko Sīsū Kalaisí. 15‘I he‘ene peheé leva, kāinga, mou tu‘u ma‘u mu‘a, pea fai pau ki he ngaahi fakahinohino na‘a mau fa‘a malanga‘i mo fai tohi atu aí.

16-17Kāinga, ‘oku ‘ofa ‘a e ‘Otuá ‘iate kitautolu. Ko e ‘Otua anga-lelei ia, pea kuó ne foaki mai ma‘atautolu ha fakatu‘amelie fakaofo mo ha nonga ta‘e ngata. Ko ia ai, ‘oku mau kole ma‘u pē ke tokoni‘i mo fakalotolahi‘i kimoutolu ‘e hotau ‘Eiki ko Sīsū Kalaisí pea mo e ‘Otuá ko e Tamai ke mou ‘ai ma‘u pē ke hoa mo taau ho‘omou me‘a ‘oku faí mo ho‘omou me‘a ‘oku lea‘akí.

Currently Selected:

2 Tesalonaiká 2: TCNT

Highlight

Copy