2 Tesalonaiká 3
3
Hūfia Kimautolu
1Ko e me‘a faka‘osí, kāinga, mou hūfia mu‘a kimautolu, ke mafola vave ai pē ‘a e ongoongo lelei ‘o e ‘Eikí pea lāngilangi‘ia ai pē ia, ‘o hangē ko ‘ene lāngilangi‘ia ‘iate kimoutolú. 2Pea mou lotu ke malu‘i kimautolu mei he kakai koví. He ‘oku ‘ikai foki ke tui ‘a e kakai kotoa pē ki he ongoongo leleí. 3Ka ‘oku falala‘anga ‘a e ‘Otuá, pea te ne fakaivia mo malu‘i kimoutolu mei he toko taha koví. 4Kuo fakamahino mai ‘e he ‘Eikí ‘oku mou fai pau ki he ngaahi fakahinohino na‘a mau ‘oatú pea ‘e hokohoko atu ho‘omou talangofuá. 5‘Ofa ke fakaloloto ange ‘e he ‘Eikí ho‘omou ‘ilo ki he ‘ofa ‘a e ‘Otuá mo e fa‘a kātaki ‘oku foaki ‘e Kalaisí.
Ko e Fakatokanga he Fakapikopikó
6Kāinga, ‘oku ou kole atu ‘i he huafa ‘o hotau ‘Eiki ko Sīsū Kalaisí ke mou faka‘ehi‘ehi ‘aupito mei ha kāinga lotu hena ‘oku nau nofo noa mo ta‘e fie fakaongo ki he ngaahi fakahinohino na‘a mau fai atú. 7‘Oku ou tui kuo ‘osi mahino lelei kiate kimoutolu ko e sīpinga na‘a mau taá, ‘oku totonu ke mou fa‘ifa‘itaki ki ai. Na‘e ‘ikai te mau nofo noa hena. 8Na‘e ‘ikai te mau tali ke ‘omi ta‘e totongi ha me‘akai. Na‘a mau tō kakava mo tafi pupuha he ‘aho mo e pō. He na‘e ‘ikai te mau loto ke fakakavenga‘i ha taha.
9Kapau na‘a mau pehē ke mou fafanga pē ‘e kimoutolu kimautolu, na‘e tonu pē ia. Ka na‘a mau loto ke tā ha sīpinga lelei kiate kimoutolu. 10He na‘a mau fa‘a tala atu foki, ko ia ‘oku ‘ikai ke ngāué, pea ‘oua‘e kai. 11Ka ko eni kuo mau fanongo ai ‘oku ‘i ai e ni‘ihi ‘iate kimoutolu ‘oku mo‘ui fakapikopiko mo fakatupu maveuveu. 12‘Oku mau kole mo fakatokanga atu ki he kakai ko iá, ‘i he huafa ‘o e ‘Eiki ko Sīsū Kalaisí, ke nau fakapotopoto mu‘a ‘o fai ha ngāue ke ma‘u ai ha’anau mo‘ui. 13‘Oua te mou fiu, kāinga, he faileleí.
14Faka‘ehi‘ehi mei ha taha pē ‘i hena ‘oku ‘ikai te ne fie ongo ki he ngaahi me‘a ‘oku mau tohi atu ai ko ‘ení, hei‘ilo te ne mā ai he‘ene me‘a ‘oku faí. 15‘Oua ‘e fakafili ki ai, kae lea fakatokoua pē.
Ko e Tāpuaki ‘a e ‘Eikí
16‘Ofa ke tāpuaki‘i ma‘u pē kimoutolu ‘aki ‘a e melinó, ‘e he ‘Eiki ‘o e melinó. ‘Ofa ke kau ‘a e ‘Eikí ‘iate kimoutolu hono kotoa.
17‘Ofa atu,
Ko au, Paula.
Ko e tohi nima ena ‘a‘aku. ‘Oku pehē ‘eku fakamo‘oni he tohi kotoa pē ‘oku ou faí.
18Tauange ke mou ‘inasi ai pē ‘i he ‘ofa ‘aufuatō ‘a hotau ‘Eiki ko Sīsū Kalaisí.
Currently Selected:
2 Tesalonaiká 3: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
