THUPILTE 8
8
Pilna pahtawi na
1 #
Thu. 1.20,21 Pilna akikou sih amah?
tualeh theisiemna ngaitah in akikou sih amah?
2Pilna muol sang tungah adinga,
lamka thuom tengah ading hi.
3Khopi lutna kotpite ah leh khopi lutna,
kotkhate ah pilna akikou hi.
4“Mihingte aw noute hing han ka hi,
mihing tapate han a ka aw suo ka hi.
5Aw nou mi mawlte in pilna theisiem unlen,
nou mi mote aw,
theisiemna lungtang nei un.
6Ngai un,
silhoipente gen ding ka hi,
ka kam akipat thudih hing pawtkhe ding ahi.
7Aziehpen ka kam in thudih agen dinga,
ka muh a dingin gitlouna khu kidahhuoi ahi.
8Ka kam a ka thugen zousie dihtatna ahi a,
thu kawi leh thugilou a um sih hi.
9A theisiemte adingin ka gen zousie akichiena,
theina mute adingin adih sieng kei hi.
10Dangka sangin ka thuhilna tel zaw inlen,
sana siengset sangin theina tel zaw in.
11Aziehpen Rubi suong manpha sangin,
pilna amanpha zaw a,
na lunggul thei sil dang bangma toh,
tepi thei guol ahi sih hi.
12Kei, pilna khu pilvanna toh ka tengkhawm a,
theina leh sie leh pha khensiemna zong ka nei hi.
13Mangpa giin khu gilou huotna ahi a,
kiletsahna, kisahtheina leh gamtat hoilou leh,
zuou genna kamte ken ka huo hi.
14Thuhilna leh pilnagil kei a ahi a,
kei theisiemna ka hi a,
hatna ka nei hi.
15Keima vangin leengten vai ahawm ua,
vaihawmten danthupieh dihna abawl uhi.
16Keima vangin leengtapate leh,
miliente tualeh vaihawmte zousie in,
leitung vai ahawm uhi.
17Kei hing itte ka it a,
phatuom ngaitah a hing suiten ahing mu ding uhi.
18Hausatna leh zatatnate ka kungah aum a,
sawtpi dai hausatna leh dihtatna kei a ahi.
19Ka gasuote sana sangin ahoi zaw a,
Ahi, sana siengset sangin zong ahoi zaw hi;
tualeh ka sepsuo teng dangka sangin amanpha zaw hi.
20Dihtatna lampi ah ka pei a,
thudih lampite ka zui hi.
21Kei hing itte hauna ka luosah a,
tualeh a goubawmte uh ka dimsah hi.
Pilna hing kipat dan
22 #
Kihil. 3.14
Mangpa’n anasep apatchil a kipat in kei ahing neita a,
tanglai a anasep apat masang nangawn in,
23kumtawn a kipat in,
achiil a kipat in,
ahisihleh leitung um masang nangawn a zong,
phudet kana hita hi.
24Tuithuhpite um masangin lahdoh kana hita a,
tuikhuh tui a dimte um masang tham in.
25Muol leh taangte adin masangin,
kei ka umzouta hi.
26Leitung leh gamte ahisihleh leivuite,
akisiem masang peh in kei ka umzou thamta hi.
27Vante asiem masang leh,
tuipi thupite tung agitkuol laiin,
kei ka umzouta hi.
28Tunglam a meilumte a koi laiin,
Tuipi thuhpi tuinahte abawl laiin,
29tuipiten athupieh apalsat louna ding ua,
gamgi ahun pieh laiin leh leitung kingahna aphum laiin,
Kei ka umzouta hi.
30Khum hunlai in Ama kungah nasem khutsiem,
khat bangin agei ah kei ka umta hi.
Nisima alungdamna ka hi a,
Amatoh umkhawm nuom kasa ngitnget hi.
31Ama tenna leitung khovel in nuom asa hi.
Ka kipahna khu mihingte tapate ahi hi.
32Tualeh tuin,
ka tate aw,
ka thu ngai un,
ka lampi zuite mi hampha ahi uhi.
33Thuhilna ngaikhie unlen, pil un,
tualeh nelsie vawt sih un.
34Ka thu ngaikhie mite,
mi nuomsa ahi uhi,
ni sim a ka kotpi vengte leh,
ka kotkha bul a,
hing ngahten nuom asa uhi.
35Aziehpen koipou kei hing muten hinna amu ua,
tualeh Mangpa deisahna zong amu ding uhi.
36Hinanleh koipou ka tunga khiel mi in
ama hinna aliemsah bep ahi,
kei hing muda pouma shina it ahi uhi.”
Currently Selected:
THUPILTE 8: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
