THUPILTE 7
7
Numei kizua apat kigiihna
1Ka tapa thute kem inlen,
ka thupiehte na lungsim sungah kholkhawm in.
2Ka thupiehte zui inlen hingin,
ka dan khu na mitlaidum bangin kemin.
3Na khutmete ah viel inlen na lungtang,
suongpeh tungah giel in.
4Pilna kungah “Ka sanggamnu na hi chi inlen,”
theisiemna kungah,
ka unaunu na hi chi in.
5Tuahileh amauten numei thangtat nu akipat,
ahing kem ding ua,
numei thangtat nu kam zol leh,
kamhum mizawlsiem akipat,
ahing kembit ding hi.
6Aziehpen ka inn kotta vathang kikaal awng,
apat in ka en a,
7Mi mawlte lah a tangvalnou khat ka mu a,
khanglaite lah ah theisiemna neilou
tangvalnou khat ka mu hi.
8Kizuanu umna inn kunga gawlzing ah,
ahing pei a,
tualeh amanu inn lam zuon in apei hi.
9Nitah khomiel zui leh zan khomiel nuoi ah.
10Tualeh ngaivawi,
kizua puonsil a kizem,
lepchie lungtang puo numei khat in ana kimu ta hi.
11Amanu ahi selsul a,
agelsuoh a,
akengte a inn ah a um det thei sih hi.
12Khatvei teng gawlzing lah ah,
khatvei teng kholai lah ah a um kawi a,
tualeh mi inn ning kawmkaal teng ah,
mi adap ngah kawi hi.
13Tuachi’n amapa aman a atawpa,
zum maw mel tah in akung ah thu agen hi.
14“Lemna sillatte ka kungah aum a,
tuni’n ka thuchiemte ka tangtung sah hi.
15Tuachi’n nangma mu dingin ka hing pawtdoh hi;
phatuomngai tah in ka hing sui a,
ka hing muta hi.
16Ka lupna tungah puonpha hoitah ka phata a,
singthal te ka lupna tungah ka theta hi.
17Agimnamtui mama murate,
aloete leh singthal te ka lupna tungah ka theta hi.
18Hing pei inlen zingmawng khovah dong iki-itna,
lungchim tahin izang khawm ding a,
i ki-itna in ikilungnuom sah tuo ding hi.
19Aziehpen ka pasal ka inn uah a um sih hi,
khuol gamlapi a zin ahi.
20Aman dangka ip apuo a, ha lia laitah
chiengin ahing tung bep ding hi,” achi hi.
21Amanu’n akamsiem in amapa azawlzouta a,
akamdam toh azawlpua zouta hi.
22Tua tangvalnou in ama adap zui pai a,
bawngtal in a thatpa anua zui bangin,
ahisihleh mimo apilna dinga,
kol kibul dinga apei bangin,
23leh thaltangin asin akap pailet masangsie,
ashina ding ahilam theilou a,
thang baw a leeng va bang ahi hi.
24Tuaziehin nou ka tate aw,
ka thu ngaikhie unlen,
ka kam a thupawtte lunglut tahin ngai un;
25khum minu lam zuon in na lungtang uh,
kihei sah sih unlen,
Amanu lampi zui in,
lampiel kha vawt sih un.
26Aziehpen tuabang numei in mi tampi
aliemsa in apuasahta hi.
27Amanu inn pen hankhuh zotna lampi ahi a,
shina pindante zotsuhna lampi ahi bou hi.
Currently Selected:
THUPILTE 7: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
