THUPILTE 10
10
Solomon paunahte
1Solomon thupilte:
Tapa pilin apa akipah sah a,
tapa moin anu alunggim sah hi.
2Gitlouna toh kilamdoh hausatna aphatuom sih a,
hinanleh dihtatnain shina apat mi ahunkhie hi.
3Mangpa’n midihtatte hinna gilkiel in akoi phal sih dinga,
migilou lunggulte apaimang pieh hi.
4Mi thasie khut in zawnna atun a,
mi thanuom khut in hausatna atun hi.
5Nipi lai a lakhawm mi khu tapa pil ahi a,
hinanleh bu lah hunlai a imu mi khu,
zumna tungsah tapa ahi.
6Guolzawlna khu midihtatte lutungah a um a,
hinanleh hiemngamna in migiloute,
kam atuomkhum hi.
7Midihtat theizingna khu guolzawl in aum a,
hinanleh migiloute min pen amuot mang ding hi.
8Lungtang pil in thupiehte asanga,
hinanleh mimo kamtam pen apua ding hi.
9Midihtatte muonhuoi tah in apei hit hiet ua,
hinanleh miletatte akitheidoh pai ding hi.
10Amit sih at a mi enpa’n buoina apiengsah a,
hinanleh mi mo kamtam apua ding hi.
11Midihtatte kam khu hinna tuikhuh ahi a,
hinanleh migiloute kam pen,
hiemngamna in atuom hi.
12 #
Jak. 5.20; 1 Pet. 4.8 Kimudana in kihauna apieng sah a,
hinanleh itna in khelna akhu khum hi.
13Theisiemna nei mi kam ah pilna akimu a,
theisiemna neiloute el duong ah,
chiengpum atu ding hi.
14Mipilten theina akholkhawm a,
mi mote kam in sietna a nai hi.
15Mihausa hausatna khu ama adinga,
khopi dettah ahi a,
tahsapna khu mi zawngte sietna ahi.
16Mi dihtat sepgimna in hinna atun a,
migiloute thaman pen khelna ahi.
17Thuhilna kemhoi pouma hinna lampi ah a um a;
phawhhilna zada mi in lampi azuikhiel zel hi.
18Amudana im mi in muh zuouthei a nei a,
mi gensiet hat mi khu mi mo ahi.
19Thu tampi kigenna ah khelna abei sih hi,
hinanleh akamsip thei mi khu mi pil ahi.
20Midihtatte lei khu dangka sieng sitset bang ahi a,
migilou lungsim pen manna bei ahi.
21Midihtatte muhin mi tampi avah a,
mi mote pen pilna tahsam in ashi uhi.
22Mangpa guolzawlna in mi ahausa sah a,
lunggimna abelap sih hi.
23Mi mote adingin gitlouna bawl khu,
kisuhhalna bang ahi a,
hinanleh theisiemna nei mi in pilna anei hi.
24Migilou in agiin pen ma atuohkha dinga,
midihtatte pen alunggulte uh akipe ding hi.
25Pingpei aman bangin,
migiloute a um nawn sih ding ua,
midihtatte pen kumtawn in adet den ding uhi.
26Grep tuithua in ha azausah a,
mei khu in mit asip sah bangin,
mi thasie khu ama sawltute a dingin tuabang ahi.
27Mangpa giinna in damsung nite asau sah a,
hinanleh migiloute damsung kumte tom sah ahi ding hi.
28Midihte kinepna khu kipahna ahi dinga,
migiloute lam etna pen amangthang ding hi.
29Midih a dingin Mangpa lampi khu hatna ahi a,
hinanleh manthaina khu sietna nasemte ading ahi.
30Midihtatte pen suonmang ahi ngai sih ding ua,
migiloute pen gamsungah atengden sih ding uhi.
31Midihtatte kam in pilna thu agenkhie a,
hinanleh hamselawna lei pen satkhieh ahi ding hi.
32Midihtat muh in pomthei ding athei a,
hinanleh migilou kam in thusie agen thei hi.
Currently Selected:
THUPILTE 10: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
