MATHIU 9
9
Zeng damsahna
(Mak. 2.1-12; Luk. 5.17-26)
1Tuachi’n Ama kuong sung ah alut a, agalkai a, Ama khopi ah ahing tungta hi. 2Tualeh En vawi, mi khat zeng a damlou lupna a lum in akung ah ahing zawng ua, tuachi’n Jesu’n aginna uh amu tahin, zenga damloupa kungah, “Tapa lungmuong tahin um in, na khelnate, ngaidam ahita,” achi hi.
3Tuachi’n Ngai vawi, lai gielmi koite ahiei in, “Tam mipa’n Pasian agensie hi,” achi uhi. 4Hinanleh Jesu’n angaituote uh athei a, “Bangding a na lungsim ua silgilou ngaituo na hi uoi? 5Na khelnate ngaidam ahita, chi leh, thou inlen na kengin pei in, chi koi abailamzaw diei? achi hi. 6Hinanleh Mihing Tapa’n leitung ah khelnate ngaidam theina anei chi na theina ding un, (zeng a damloupa kungah) thou inlen, nalupna la inlen na inn ah peita’n,” achi hi.
7Tuachi’n amapa athou a, a inn ah apeita hi. 8Tua khu mipiten amu tah un, lamdang asa ua, tuabang bawltheina mihingte kunga pepa Pasian apahtawita uhi.
Mathiu hatna
(Mak. 2.14-17; Luk. 5.27-32)
9Tuana kipat in Jesu a pei zel a, sie piehna mun a tou, mi khat amin Mathiu kichi amu a; akungah “Hing zuiin,” achia, tuachi’n amapa adingdoh a Ama azuita hi. 10#Luk. 15.1,2Tualeh hichi ahi a, Jesu ann ne dinga inn sunga atou lai in, En vawi, siekhon mite leh mikhielte tampi ahing pei ua, Ama leh anuazuite toh annkuong a imkhawmta uhi. 11Tuakhu Pharisaiten amu tahun, anuazuite kungah “Bangdinga na siepa un siekhon mite leh mikhielte toh ann aneh khawm ahiei?” Achi uhi.
12Hinanleh Jesu’n tuakhu azah tahin akung uah, “Mi damtheiten daktorpa akiphamaw sih ua, mi chinaten bou akiphamaw uhi. 13#Mat. 12.7; Hos. 6.6Hinanleh pei unlen, kithoina deilouin, hepina ka lunggul hi, chi umdan va zil un, aziehpen midihtatte han dinga hing pei kahisih a, mikhielte kisiasah dinga han a hing pei ka hizaw hi.”
Ann ngawl thu
14Tuachi’n Johan nuazuite akungah ahing pei ua, “Bangding a kou leh Pharisaiten ann ngawl zel unga, na nuazuiten ngawllou ahi uoi?” Achi uhi.
15Tualeh Jesu’n akung uah, “Mouneipa akung ua a um laisie moupuiten asuun thei ding uh amah? Hinanleh mouneipa alah ua kipata lahmang ni ahing tung ding a tua hun chiengin ann angawl ding uhi.
16Koiman puon lui puontha them in aphaw ngaisih uhi, aziehpen aphawna in puon aluoikehzaw dinga, ahing keh semsemzaw ding hi. 17Ahisihleh koiman zu tha savun thawl lui ah athun ngai sih uhi, tuachilouin vang savun thawlte apohkeh dinga, zu khu akibo ding a savun thawl zong asegawp ding hi; tuaziehin zu tha khu savun thawl tha ah athunzaw ua, tuachi’n ani in abit tuohtuoh hi,” achi hi.
Jairas tanu leh numei sipawt damsahna
(Mak. 5.21-43; Luk. 8.40-56)
18Aman tam thute akung ua agen laiin, En vawi, vaihawmpa khat akung ah ahing pei a, Ama abie a, “Ka tanu tu mama in ashita hi, hinanleh hing pei inlen atung ah na khut koilachin ahing mai ding hi,” achi hi. 19Tuachi’n Jesu adingdoh a, ama azuita a, tualeh anuazuiten zong a zuita uhi.
20Tualeh thakhat in numei khat kum sawm leh kum ni sipawt a damlou, anua ah ahing pei a, apuon mong akhoi a, 21Amanu’n alungsim in, “Apuon mong khoi leng zong ka dam mai ding hi,” chiin angaituo hi.
22Tuachi’n Jesu akinuohei a, amanu amutahin, “Tanu lungmuong tahin um in na ginna in ahing damsahta hi,” achi hi. Tuachi’n numeinu khu tuami dahkal akipat in adamta hi.
23Tualeh Jesu vaihawmpa inn sunga alut tahin, theile tumte leh mipi kapleh mau vengvung ava mu a, 24Aman akung uah “Mun awng sah un, naupangnu ashi sih hi,” a imu#imu Jesu’n imu achite ashite ahi ua, Jesu’n ashi achite pen mawna nei mite ahi. ahi bou hi achi hi. Tualeh amaun anuisan giap uhi. 25Hinanleh mipite apulam a asawldoh nua in, alut a, amanu akhutin atu a, tuachi’n naupangnu ahing thouta hi. 26Tuachi’n tam thu khu tuo gam pumpi ah athang suohta hi.
Mitto ni damsahna
27Jesu khuna kipat a apawtdoh tahin, mitto ni in azui ua, “David tapa ka tung uah zangai in,” chiin akikou uhi. 28Tualeh inn sunga alut tahin mitto tegel akung ah ahing pei ua, tuachi’n Jesu’n akung uah, “Tami bawlthei dingin na hing gingta uh amah?” achi hi. Amaun akungah “Gingta e, Mangpa,” achi uhi.
29Tuachi’n Aman a mit uh akhoi pieh a, “Na gintat bang un na tung uah tungta hen,” achi hi. 30Tualeh amit uh ahing vahta hi. Tualeh Jesu’n “Koima theisah lou dingin khautah in thu apie hi.”
31Hinanleh amaute gel apawtdoh tah un, tua gam pumpi ah Ama tungtang thu agen thang ta uhi.
Hamtheilou damsahna
32Amaute gel apawtdoh tahun, En vawi, mi hamtheilou dawimat khat akungah ahing zawpi uhi. 33Tualeh dawi khu anawdoh tahin, hamtheilou khu ahing hamta hi, tuachi’n mipiten lamdang asa mama ua, “Israel gam ah tambang akimu ngai sih hi” achi uhi.
34 #
Mat. 10.25; 12.24; Mak. 3.22; Luk. 11.15 Hinanleh “Pharisaiten dawimangpa zieha dawite anawdoh ahi,” achita uhi.
Khrist in mipite ahepina
35 #
Mat. 4.23; Mak. 1.39; Luk. 4.44 Tuachi’n Jesu’n akikhopna innte uah thu hil in, leenggam khantanhoi thu genin, damlouna chinteng leh natna chinteng damsah in, khopi leh khoneute zousie tuon in avah kawikawi hi. 36#Kisim. 27.17; 1 Leeng. 22.17; 2 Khang. 18.16; Ezek. 34.5; Mak. 6.34Aman mipite amu tahin chingding neilou belamte banga gimthuoh leh kithethanga aumzieh un alainatta mama hi. 37#Luk. 10.2Tuachi’n Aman anuazuite kungah, “Adihtahin bu lah ding atam mama a, hinanleh a nasem mite atawm hi. 38Tuaziehin bu la dinga nasemte hing sawl dingin bu neipa kung ah ngen un,” achi hi.
Currently Selected:
MATHIU 9: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
