MATHIU 8

Phah suhdamna

(Mak. 1.40-44; Luk. 5.12-14)

1Tualeh muolvum akipat a ahing peisuh laiin mipi thupitahin Ama azuita uhi. 2Tualeh En vawi, miphah khat akungah ahing pei a Ama abie a, “Mangpa na ut leh na hing siengthousah thei hi,” a chi hi. 3Tuachi’n Jesu’n akhut in azam a, akhoi a, “Ka ut hi, siengthoutain” achi hi. Tuachi’n aphah khu asiengthou pai lien hi. 4#Siempu. 14.1-32Tualeh Jesu’n akungah, “Koima na hillou ding ahi, hinanleh pei inlen, siempu kungah va kilah inlen, Mosi in silpieh pieh dinga, athupiehte va pie in, atheichetna ding un,” achi hi.

Roman galkaplien suohpa adamsahna

(Luk. 7.1-10)

5Tualeh Jesu Kapernaum khuo a alut in, akungah galkap zahoutu khat ahing pei a, 6“Mangpa ka suohpa zengin inn ah alum a, nasatah a sunatin a um hi,” achi hi. 7Tuachi’n Jesu’n akungah, “Hing pei vangin sudam na vang,” achi hi.

8Galkap zahoutuin a dawnga, “Mangpa ka innsunga na hing lutnataah ka hi sih hi, thu tengkhat genlachin ka suohpa adamta ding hi. 9Aziehpen kei zong thuneina nuoi a um ka hia, ka nuoi ah galkapte a um ua, tualeh khat kungah pei in ka chileh apei a, tualeh adang khat kungah hing peiin, ka chileh ahing pei hi; tualeh ka suohpa kungah tami bawlin ka chileh abawl zel hi,” achita hi.

10Jesu’n tam thu azah tahin lamdang asa a, Ama zuite kungah, “Adihtahin ka hing hil ahi, Israelte lah ah zong tambang va-ia a ginna thupi ka mukha ngai sih hi, achi hi. 11#Luk. 13.29Tualeh ka hing hil ahi, suolam leh tumlam akipat in mi tampi ahing pei ding ua, van gam ah Abraham, Isaak leh Jakob toh atoukhawm ding uhi. 12#Mat. 22.13; 25.30; Luk. 13.28Hinanleh gam tate pen pulam miel ah paidoh in aum ding uhi. Khunah kaa leh hagawtna a um ding hi. 13Tuachi’n Jesu’n galkap zahoutu kungah, “Peita in na gintatna bangin nanga dingin bawl hita heh,” achi hi. Tuachi’n tuami dahkal mamain asuohpa adamta hi.

Peter sungnu damsahna

(Mak. 1.29-34; Luk. 4.38-41)

14Tualeh Jesu Peter inn sunga alut tahin, Peter sungnu khosih a lum amuta hi. 15Tualeh Ama’n amanu khut atham a, tuachi’n akhosih abeita hi. Tuachi’n amanu athou a ana uh aseppiehta hi.

16Nitahlam ahing hi tahin, akungah dawimat tampi ahing pui ua, Ama’n thu in dawite adeldoh a, damlou zousie asudamta hi. 17#Isai. 53.4Guolnei Isai in, “Ama ngel in ihatlounate ala a, inatnate a pota hi.” Chi a agen khu ahing tangtun theina dingin.

Nuazui dingte telna

(Luk. 9.57-62)

18Tualeh Jesu’n akimvel a mihon thupitah amu tahin, gal langkhat a pei dingin thu apie hi. 19Tuachi’n laigiel mi koi ahiei khat a hing pei a, akung ah, “Siepa na peina tengah hing zui vang,” achi hi.

20Jesu’n akung ah, “Si-alten kuo anei ua, tungleeng vate’n bu anei uhi, hinanleh Mihing Tapa in vang alu ngahna ding mun anei sih hi,” achi hi.

21Tualeh anua zuite lah a mi dang khat in akungah, “Mangpa va pei vangin ka pa vavui masa tavang” achi hi.

22Hinanleh Jesu’n akungah, “Hing zuiin mishi in a mishi uh kivui uheh” achi hi.

Tuipi adaisahna

(Mak. 4.35-41; Luk. 8.22-25)

23Tualeh kuong sunga atuon tahin, anuazuite’n Ama azui uhi. 24Tualeh thakhat in khopihui thupitah ahing laang a, tua tui kihawt in kuong ahing tumta a, hinanleh Ama pen a imu hi. 25Tuachi’n anuazuite akung ah, ahing pei ua, ama aphong ua, “Mangpa hing hundam in, mangthang ding hitalou ka hi uoi mah!” Achi uhi.

26Hinanleh Aman akung uah, “Aw nou ginna tawmte bangding a zau na hi uoi mah?” achi a, Tuachi’n athou a, huipi leh tuipi aphawha, ahing dai dide ta hi. 27Tuachi’n miten lamdang asa mama ua, “Tam mipa bang chibang mi ahiei? Khopihui leh tuipi nangawn in, athu aman uh,” achi uhi.

Gadarami dawimatte

(Mak. 5.1-17; Luk. 8.26-37)

28Tualeh gal langkhat lam Gadara mite gam ahing tun tahin, dawimat mi ni, han a kipat a hing pawtin akituohpi ua, agiinhuoi mama zieh un, tuomi lampi ah koima apei ngamsih uhi. 29Tualeh amaute thakhat in ahing kikoukhie ua, Jesu, “Nang Pasian Tapa, kou bang hing law ding na hiei mah? Ahun tun masanga koute sugenthei ding a hing pei na hiei mah?” achi uhi.

30Tualeh a umna ua kipata gamla sim tah ah voh hon tampi ata uhi. 31Tuachi’n dawiten “Na hing nawdoh a ahileh, voh honte sunga lut ding hing phalpieh in” chi’n Ama angen uhi.

32Tuachi’n Aman akung uah, “Pei un,” achi hi. Tuachi’n amauh ahing pawtdoh ua, vohhon sungah alut ua, thakhat in voh honte khu kawl ah ataikhe suh ua, tuipi ah atai lut ua, tui lah ah ashi gamta uhi.

33Tuachi’n voh chingte atai ua, khopi sung ah alut ua, sil tung zousie leh dawimat mi nite tunga sil tungte abawn in ahilta uhi. 34En vawi, khopi mite zousie Jesu kimupi dingin ahing pawt ua, tualeh Ama amu tah un, agam ua pat pawtdoh dingin hatang nget in angenta uhi.

Currently Selected:

MATHIU 8: ZOUBSI

Highlight

Copy