MATHIU 7
7
Midangte tungah thukhen sin
1“Midang tung thu khen sih un, na tungthu uh khen a a umlouna ding in. 2#Mak. 4.24Aziehpen na khenpieh mabang un noute zong ahing kikhenpieh ding hi, tualeh na tena mama un ahing kitepieh ding hi. 3Bangdinga nangma mit a singtun um ngaituo loua na unaupa mit a nin neng neunou mu thei na hiei? 4Ahisihleh bangchidan a na unau kunga, na mit a ninneng neunou khu hing lahdoh pieh vang na chi thei ding ahiei? En in, nangma mit ah singtun a um hi. 5Nang milepchie, nangma mit akipat in singtun khu ladoh masa in, tuachi’n na unau mit a ninneng neunou lahdoh ding khu kichientahin na mu thei ding hi. 6“Uite kungah sil siengthou pe sih un, ahisihleh voh masang ah na suongmantam uh pai sih un akeng un atuonchil ding ua, tualeh hing kihei in nangma ahing balnen kha ding hi.
Ngen un pieh in na um ding uh
(Luk. 11.9-13)
7“Ngen un, pieh in na um ding uh, sui un na mu ding uh, kiu un honpiehin na um ding uhi. 8Aziehpen a ngen pouma piehin a um ua, Koipou a sui in amu ua, koipou akiu pouma hon pieh in a um ding uhi. 9Ahisihleh na lah uah, koi ahiei atapain tanghou ngen taleh suong pe ding? 10Ahisihleh nga ngen taleh koi ahiei gul pe ding? 11Tuachi ahileh, nou migilouin bawn na tate uh sil hoi piehna dan na thei uleh, na Pa uh van a umin akunga ngente sil hoi petham lou ding ahiei mah?
Dan hoi leh lampi nite
12 #
Luk. 6.31
Tuaziehin sil zousie miten na tung ua abawl dinga na dei pouma uh, nouten zong mite tungah bawl un, tua khu dan thu leh guolneite thu ahi. 13“Kot kochih ah lut un, manthaina lampi kot khu alien a, alampi zong agol hi, tualeh khuna lutte khu tam zong atam uhi. 14Hinna zotna kot khu akochih a, alampi zong ahamsa a, amute zong atawm uhi.
Thudih leh dihlou kihilna
(Luk. 6.43-45)
15“Guolnei dihloute lah ah pilvang un, amaute khu belam vun sil in na kung uah ahing pei leng ua, asunglam uah lah ngia gongsan ngen ahi uhi. 16Amaute aga uah na thei pai ding uhi, mi’n khaulingnei gui ah grep ga alou ngai uh amah? Ahisihleh theimiling kung ah theipi alou ngai uh amah? 17Tuachimabangin sing hoi pouma aga ahoi a, hinanleh sing siein ga hoilou asuong hi. 18Sing hoi aga ase thei sih a, sing sie zong aga ahoi thei sih hi. 19#Mat. 3.10; Luk. 3.9Sing chin ga hoilou pouma aphua ua, mei ah apai uhi. 20#Mat. 12.33Tuaziehin amaute aga un na thei ding uhi.
Noute kang thei ngai sih hi
(Luk. 6.46)
21“Mangpa, Mangpa hing chi zousie, vangam alut sih ding uhi, hinanleh ka Pa van a um deilam bawlte bou khu alut ding uhi. 22Tua ni chiengin mi tampiin, Mangpa, Mangpa na min in thumavang ka gen ua, na min in dawite ka deldoh un, na min in sil lamdang tampi ka bawl uh hilou amah? Achi ding uhi. 23#Late. 6.8Tua hun chiengin ken akung uah noute ka hing thei ngai sih hi; nou silgilou bawlte aw, ka kung akipat in peimang un, ka chi ding hi.
Inn lamdan nite
(Luk. 6.46-49)
24“Tuaziehin mi koipou tam ka thugente za a, zui pouma mipil suongpi tunga inn lam mi toh ka gente ding hi. 25Guo ahing zu a, tui ahing khang a, huipi ahing langa, tuo inn khu ahing mut vapual a, hinanleh apua sih hi, suongpi tung a lamdet ahi ziehin.
26Tualeh michin tam ka thugente za a, zuilou pouma khu, mimo senel tunga innlam mi toh ka gente ding hi.” 27Guo ahing zu a, tui ahing lien a, huipi ahing laang a, tua inn ahing mut vapual a, apuata hi, tua inn khu apua nasetah ahi. 28#Mak. 1.22; Luk. 4.32Tualeh hichi ahing hi a, Jesu’n tam thute agen zou in mipi’n athuhilte lamdang asa mama uhi. 29Aziehpen Ama’n laigiel mite banglou a, thu neina nei bang tahin amauh thu ahil hi.
Currently Selected:
MATHIU 7: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
