MATHIU 11
11
1Tualeh hichi ahing ahi a, Jesu’n anuazui sawm leh nite thu apieh zou tahin, khuna kipat in khuote a thuhil ding leh thugen dingin apeita hi.
Baptispa Johan anuolna uh
(Luk. 7.19-30)
2Tualeh Johan in suongkul sung a pat a Khrist nasepte ana zahtahin anuazuite ni asawl a, 3Akungah “Ahing pei dingpa na hiei mah, ahisihleh adangkhat ngah nalai ding ka hi uoi mah?” ava chi sah hi.
4Jesu’n adawnga akung uah, “Pei unlen, na sil zahte u’leh na mute uh Johan va hil un; 5#Isai. 35.5,6; Isai. 61.1Mittote mit in khuo amu theita ua, Kengbaite avah theita ua, phahte ahing siengthouta ua, bilbingte’n khuo aza theita ua, mishite kaithouin aumta ua, tualeh mizawngten zong khantanhoi kigen azata uhi. 6Tualeh koupou ka tung a lunghimawna mu lou khu a hampha ahi.”
7Amauh apei tahun Jesu’n mipite kungah Johan tungtang agen panta a, “Bang en dinga gamdai a vapeita na hi uoi? Pumpeng hui sem ling ahiei? 8Ahisihleh bang en ding a pawtdoh na hi uoi? puonnem sil mi khat i? Ngai un, puonnem silte khu leengpa innpi sungah aum uhi. 9Ahisihleh bang en ding a pei doh na hi uoi? guolnei en dingin i? Ahi, ka hing hil ahi, guolnei sanga zong thupizaw ahi. 10#Mala. 3.1En vawi, ka thangkou na masang ah ka sawl a, Aman na masang ah na lampi asiel ding hi, chi a atanchin kigielpa khu ama ahi. 11Chitahtahin ka hing hil ahi, numei sunga pieng lah ah Baptispa Johan sanga thupizaw apieng kha nai sih hi, ahivangin van gama mi neupen zong ama sangin athupi zaw hi. 12#Luk. 16.16Tualeh Baptispa Johan um akipat tutan dongin van gam in thagum a kinawhna athuoh leng hi, tualeh thagum a nawhten apawng lah zel uhi. 13Aziehpen zawlneite zousie leh dan thuin Johan hing um tandongin ana genlawhta uhi. 14#Mala. 4.5; Mat. 17.10-13; Mak. 9.11-13Tualeh nouten na pom nuom u’leh, ama khu ahing pei dingpa Elijah ma khu ahi. 15Koipou zahna ding bil nei pouma in za heh!
16“Hinanleh tulai khangthate bang toh ka gente diei? Naupang vanzuona mun lah a tou a, alawmte uh han a,
17Theile hing tumpieh unga,
na lam sih ua,
noute hing kaapi ung a na hing dapi sih uhi;
chite bang ahi uhi.
18Johan ahing pei a, ane in a dawn sih a, dawilawm nei ahi, achi uhi. 19Mihing tapa ahing pei a, ane in a dawn a, En vawi uo, ann haipa, zu haipa, siekhonte leh mikhielte lawmpa,” achi uhi. Hinanleh pilna khu anasepten siem atangsah hi.
Ginglou khopite tunggihna
(Luk. 10.13-15)
20Tuachi’n akisialou zieh un a sil thupi bawl tamna pen khopite aphawhta hi; 21#Isai. 23.1-18; Ezek. 26.1—28.26; Joel. 3.4-8; Amos. 1.9,10; Zek. 9.2-4“Korazin na tung agih hi! Bethsaida na tung agih hi! Aziehpen noute lah a sil thupi kibawlte Tai-ar leh Sidon khopite a kibawl hitaleh, sai ip puon sil a, vut lah a kibuol in sawtlaipi in akisiata ding uhi. 22Hinanleh ka hing hil ahi, thukhen ni chiengin noute thuoh ding sangin Tai-ar leh Sidon khopite thuoh ding khu, adan aum zaw ding hi. 23#Isai. 14.13-15; Siem. 19.24-28Tualeh nang Kapernaum, van tana tawisanga um ding kisa na hiei? Mishi khuo tandonga puisuh a um ding na hi, aziehpen na sunga sil lamdang thupi kibawlte Sodom khuo a kibawl hileh tutan dongin a um nalai ding hi. 24#Mat. 10.15; Luk. 10.12Hinanleh ka hing hil ahi, thukhen ni chienga noute thuoh ding sangin Sodom khuo in a thuoh ding khu adan aum zaw ding hi,” achi hi.
25Tua hun laitahin Jesu’n adawnga, “Aw, Pa van leh leitung Mangpa, nang mipil leh misiemte kungah tam thute na im a, naupangte kunga na phuon ziehin ka hing phat ahi. 26Ahi, Pa tuabang bawl khu nangma ngaiin ahoi ahi, achi hi.
Jesu kunga hing pei dinga chielna
27 #
Jn. 3.35; Jn. 1.18; 10.15 Ka Pa’n sil zousie ka kungah ahing kemsahta hi, Pa louin Koima’n Tapa athei sih uhi, Tapa leh akung ua a theisah ding, Tapa in akunga aphuon utnate chilou ngal in koima’n Pa athei sih hi.
28Nou semgim leh puohgih pote zousie ka kungah hing pei un, Keima’n khawldamna ka hing pe ding hi. 29#Jer. 6.16Ka hahkol puo unlen, ka kungah zil un, aziehpen kei khu zainemtah leh lungtanga kingaingiemtah ka hi; tuachi’n na hagau ua dingin khawldamna na mu ding uhi. 30Aziehpen ka hahkol a nuoma, ka puoh zong a zang hi,” achi hi.
Currently Selected:
MATHIU 11: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
