MATHIU 12
12
Khawlni tan thu a dohna
(Mak. 2.23-28; Luk. 6.1-5)
1 #
Danp. 23.25
Tua hunlaiin Jesu khu Khawlni in bulei lai kantan in apei a, anuazuite agil uh akiel a, buvuite asihtan ua, ane panta uhi. 2Tua khu Pharisaiten amu tah un akungah, “En vawi, na nuazuiten khawlni a bawl sienglou abawl uhi,” achi uhi.
3 #
1 Sam. 21.1-6
Tuachi’n Aman akung uah, “David in agilkiel lai a alawmte toh bang ahiei abawl uh simkhalou na hi uoi amah? 4#Siempu. 24.9Bangchidan a Pasian inn a aluta ama leh alawmten neh sienglou siempute maimai neh thei tanghou siengthou aneh uh ahiei? 5#Kisim. 28.9,10Ahisihleh Khawlni a Pasian biehinn a siempute’n khawlni asuhbua un zong siemtanlou in a um tuon sih chi dan thu simkhalou na hi uh amah? 6Hinanleh tam mun ah Pasian biehinn sang a thupi zaw khat a um hi chi ka hing hil ahi. 7#Mat. 9.13; Hos. 6.6Ahivang in nouten kithoina hilou in zangaina ka dei hi, chi umdan na theita hi u’lachin mawna neilou khu siemlou tangsah lou ding hi ve u’chin. 8Mihing tapa khu khawlni Mangpa ahiziehin achita hi.
Khawlni a khutzaw suh damna
9Tuana kipat in apei a, akikhopna inn#Kikhopna-Synagogue china ahi. uah aluta. 10Ngai vawi, khunah mi khat khutzaw a um a, tualeh amawpai theina ding un, amaun “Khawlni a mi suhdam asieng ei? chiin Ama adong uhi.
11 #
Luk. 14.5
Tuachi’n Aman akung uah, “Na lah ua koi ahiei khat in belam khat nei henlen, khawlniin kokhuh ah keta leh koi ahiei vatu-a kaidoh lou ding? 12Belam khat sanga mihing khat bang chituh a manpha zaw ahiei? Tuaziehin khawlni a nahoisep asieng hi,” achi hi. 13Tuachi’n tua mipa kungah “Na khut zahdoh in,” achi a, tuachi’n azahdoh a, alangkhat bangin ahing damta hi.
Jesu tha ding asawmna uh
(Mak. 3.6-12; Luk. 6.11)
14Tuachi’n Pharisaite apawtdoh ua, Ama thalup theina ding kikum in akihou uhi. 15Hinanleh tuakhu Jesu’n atheitahin khuna pat in akihemmangta hi; tualeh mipi tampi in Ama azui ua, Aman ana damsah sieng hi. 16Tualeh Ama tanchin koima hillou dingin amauh thu apie hi. 17Tua khu guolnei Isai in:
18 #
Isai. 42.1-4
“En vawi,
ka suoh ka tel,
Ka deitah,
ka lungdamna mama ahi;
Ka Hagau atungah ka koi ding a,
tualeh Aman Jentelte kungah,
dihtah a vaihawmna thu agen ding hi.
19Aman akinielpi sih dinga,
akikou sih ding hi,
Koiman kholai dung ah,
a aw aza sih ding uhi.
20Dihtah a vaihawmna aguolzawsah,
masangsiein pumpeng gawpsa,
ahiehtawng sih dinga,
meivah detna gui zong asumit sih ding hi.
21Tualeh Ama min in Jentelten kinepna anei ding uh,
chi a agen ahing tangtun theina dingin.
Pharisaiten hagau siengthou asuhminsietna uh
(Mak. 3.22-27; Luk. 11.17-23)
22Tuachi’n dawimat, mitto leh hamtheilou khat Akungah ahing zawpi ua, Aman ana sudam a, tuachi’n mitto hamtheiloupa ahing ham thei a, amu theita hi. 23Tualeh mipite zousiein lamdang asa ua, “Tam mipa David Tapa hilou amah?” achi uhi.
24 #
Mat. 9.34; 10.25 Hinanleh Pharisaiten tam thu azah tahun, “Tam mipa’n dawimangpa Belzabub#Belzabub-Kanaan mite pasien khat ahi. Dawi mangpa china ahi. zieh loungal in dawite anotdoh sih ding,” achi uhi.
25Hinanleh Jesu’n angaituonate uh athei a, akung uah, “Leenggam chinteng akilangkhen a amaleh ama akidou leh amangthai lenga, tualeh khopi chinteng ahisihleh innsung chinteng akilangkhen a akidou uleh ading zou sih ding hi. 26Tualeh Setan in setan mama notdohta leh ama leh ama kidou ahi dinga, bangchi’n aleenggam adingta diei? 27Tualeh ken Belzabub zieh a dawite notdoh ka hileh, na tate un koi zieh a anawdoh uh ahiei? Tuaziehin amaute khu noute tunga vaihawm mite ahi ding uhi. 28Hinanleh Ken Pasian Hagau vanga dawite notdoh ka hi leh, Pasian gam na kung ua hing tung ahita hi.
29Ahisihleh mi’n mihat khu alepkaan masah sih leh bangchi’n a inn sunga lut in avante atommang pieh thei diei? Lepkaan masa in tua zou chiengin atommang pieh thei bep ding hi. 30#Mak. 9.40Kei lam a panglou pouma kei hing dou ahi a, koipou ahing khopkhawmpi lou pouma in athethang ahi.
Ngaidam theilou khelna
(Mak. 3.28,29)
31Tuaziehin Ka hing hil ahi, mite akhelna chinteng u’leh Pasian agensietna chinteng uah ngaidam ahi dinga, hinanleh Hagau gensietna hilhiel pen ngaidam ahi sih ding hi. 32#Luk. 12.10Tualeh Koipou Mihing Tapa kala thugen khu ngaidam ahi dinga, hinanleh Hagau Siengthou kalna a thugen pouma, akalna uh khu tu khang leh khang hing um ding ah zong ngaidam ahi sih ding hi.
Singkung leh aga
33 #
Mat. 7.20; Luk. 6.44 “Sing khu ahoi a, aga zong ahoi hi na chi loungal uleh, sing khu asie a, aga zong asie hi, chi vanglah un; aziehpen sing khu aga in akithei hi. 34#Mat. 3.7; 23.33; Luk. 3.7; Mat. 15.18; Luk. 6.45Gul suonte aw, na gitlouna pum ua bangchia sil hoigen thei ding na hi uoi? Aziehpen lungtang a dimlet kam in agen zel hi. 35Mi hoiin alungtang goubawm hoi akipat in sil hoi ahing ladoh a, tualeh migilou in agoubawm hoilou akipat in sil hoilou ahing ladoh zel hi. 36Hinanleh ka hing hil ahi, miten thu ginalou agen pouma uh thukhen ni chiengin, azieh agen ding uhi. 37Na thuin siem tansahin na um ding a, na thu main siemlou tansah in na um ding hi.
Pharisaiten chiemtena angen uh
(Luk. 11.24-26,29-32)
38 #
Mat. 16.1; Mak. 8.11; Luk. 11.16 Tuachi’n laigielmite leh Pharisaite pawlkhat in adawng ua, “Siepa nang akipat in chiemtena ka mu nuom uhi,” achi uhi. 39#Mat. 16.4; Mak. 8.12Hinanleh Aman adawng a, akung uah, “Khang gilou leh angkawm hatten chiemtena asui ua, hinanleh guolnei Jonah chiemtena loungal akung uah pieh ahi sih ding hi. 40#Jon. 1.17Jonah sun thum leh zan thum ngapi gilsunga, a um mabangin, Mihing Tapa zong sun thum leh zan thum leigil sung ah a um ding hi. 41#Jon. 3.5Nineveh khuo a mite khu thukhenna ah tulai khangthate toh ading ding ua, a mawpai ding uhi, amaute Jonah thugen zieh in akisia pai ua, En vawi un, Jonah sanga thupizaw tanah a um hi. 42#1 Leeng. 10.1-10; 2 Khang. 9.1-12Simlam leengnu khu thukhen ni chiengin, tulai khangthate toh athou khawm ding ua, amawpai ding hi, Solomon pilna ngaikhe dingin bawn kawlmong apat ahing pei ngap hi, tualeh en un Solomon sanga thupi zaw tanah a um hi.
Kisiemthana bukimlou zauhuoina
43“Dawibua khu mipa akipat apawtdoh tahin, khawlna ding suiin tui um louna mun lah ah avah kawikawi a, amu zou sih hi. 44Tuachi’n aman ka pawtdohna inn ma ah lutkia mai vang achi hi. Tualeh ahing peikia tahin tua khu ana awnga, suhsiengsa leh kikem hoi in amu hi. 45Tuachi’n ava pei a, ama sanga gilou zaw dawi dang sagi ahing zawpi a, khunah alut ua, atengta uhi; tuachi’n tua mipa umdan nukhia lam khu amasa sangin ase zaw semsemta hi. Tulai khangtha giloute tung ah zong tuabangin a um ding hi,” achi hi.
Jesu leh a unau dihtahte
(Mak. 3.31-35)
46Mipite kunga thu agen lai in, En vawi, Anu leh asanggamten Ama houpi nuom in inn pulam ah Ama ngah in ading uhi. 47Tuachi’n mi khat in akung ah, “En vawi, na nu leh na sanggamte Nang hing houpi nuom in inn pulam ah ading uhi, achi hi. 48Hinanleh Aman adawnga, Ama hilpa kungah, “Ka nu koi ahiei? Tualeh Ka sanggamte zong koite ahi uoi?” achi hi. 49Tuachi’n a nuazuite lam ah akhut azah a, En un, “Tanah Ka nu leh ka sanggamte a um uhi! 50Koi hinanleh van a um ka Pa deilam bawl pouma Ka sanggampa, ka sanggamnu leh ka nu ahi uhi,” achita hi.
Currently Selected:
MATHIU 12: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
