LUK 8

Jesu na seppieh numeite

1Tuami nua in, Jesu khu thuhil kawm leh Pasian gam khantan hoi gen kawmin kho lien leh kho neute ah avah kawikawi a, tualeh sawm leh nite akungah a um ua; 2#Mat. 27.55,56; Mak. 15.40,41; Luk. 23.49Tualeh numei koite ahiei, dawi mat dam kia leh, natnate apata dam kiate leh Mari Magdalene achi uh asung apata dawi sagi pawtdohnanu zong a um uhi, 3Tualeh Herod sumkempa Chuza zi Joanna leh Susanna toh, tualeh midang tampite toh ahi ua, tuaten amauh neisa in, Ama apanpi zel uhi.

Buchithepa gente thu

(Mat. 13.1-23; Mak. 4.1-20)

4Tualeh mipi tampi ahing peikhawm ua, khochin a mi akunga ahing pei tah un, gentenain thu agen a: 5“Buchithepa khat abuchithe dingin akuon a, tualeh athe laiin, kimkhat lampi gei ah akie a, tua khu akituonchil a, tungleeng vaten anegam siengta uhi. 6Tualeh kimkhatte suong tungah akie a, tualeh ahing pou tahin, alei anom lou ziehin avuoi pai hi. 7Tualeh kimkhatte loulingnei lah ah akie a, loulingnei toh ahing pou khawm a, adep mangta hi. 8Hinanleh kimkhatte lei hoi ah a kie a, ahing pou a ale za in agata hi,” achi hi. Tualeh tam thute agen zou in akikou a, “Koipou zahna ding bil nei in za uheh,” achi hi.

9Tuachi’n anuazuiten tam gentena thu bang china ahiei? chi’n Ama adong uhi. 10#Isai. 6.9Tualeh Aman “Pasian gam thuguhte noute thei dinga pieh ahia, midangte kungah pen gentena thu a gen ahi; mu napi a amu louna ding u’leh, za napia atheisiem louna ding un.

Gentena thu hilchienna

11Tua gentena thu khu tami ahi: Buchi khu Pasian thu ahi. 12Tualeh lampi gei a kete khu thu zakhate ahi ua, tuachi’n diabol ahing pei a agintat lou ua, hundam ahi thei louna ding un, alungtang ua kipat thu khu alah mangpieh zel hi. 13Hinanleh suong tunga kete ahileh azah tah ua thu kipah tah a pom paite ahi ua, hinanleh tamten bulbal anei sih ua, bakhat sung agingta ua, solna atuoh chieng un apua pai zel uhi. 14Tualeh loulingnei lah a kete ahileh, thu azah nua un apei ua, khosah dingdan ngaituonate, hausatnate leh damsung nopsahnate’n adep a, aga piching ngai sih uhi. 15Hinanleh lei hoia kete pen, thu khu za a, lungtang hoitah leh za um tah a pomdet thuohhatna toh ga suongte ahi uhi.

Meivah akipat a kihilna

16 # Mat. 5.15; Luk. 11.33 “Mi koima’n thaumei adet chiengun law akhu ngai sih, ahisihleh lupna nuoi ah akoi ngai sih hi, hinanleh alut pouma in amu theina dingun atunna ah akoi zaw uhi. 17#Mat. 10.26; Luk. 12.2Akiphuonglou dinga im bangma a um sih a, tualeh theilou ding leh langlou dinga phuolguh bangma a um sih hi. 18#Mat. 25.29; Luk. 19.26Tuaziehin bangchibanga na zah uh ahiei, pilvangun; aziehpen koipou anei khu pieh belap ahi dinga, tualeh koipou aneilou khu nei a akingaisut nasan zong lahpieh ahi ding achi hi.

Ki unauna dih

(Mat. 12.46-50; Mak. 3.31-35)

19Tualeh anu leh asanggamte Jesu kungah ahing pei ua, hinanleh mipi ziehin akung ahing tung thei sih uhi. 20Tualeh “Na nu leh na sanggamte nang hing mu nuom in inn pulang ah ading uhi,” chi’n ahil uhi. 21Tuachi’n Aman adawnga akung uah, “Ka nu leh ka sanggamte khu tam Pasian thu ngai a, zuite ahi uh,” achi hi.

Jesu’n tuipi kihot adai sah

(Mat. 8.23-27; Mak. 4.35-41)

22Tuachi’n hichi ahing hia, ni khat anuazuite toh kuong ah atuong a, tualeh akung uah “Dil gal langkhat ah galkai va ui,” achi hi. Tualeh kuongte asut ua, atawlta uhi. 23Hinanleh akitawl lai un Ama a imuta a; tualeh dil ah huipi ahing laang suh a, akuong sung uah tui adim khielkhiel a, zauhuoi tahin aumta uhi. 24Tuachi’n akungah ahing pei ua, aphawng ua, “Siepa, Siepa, mangthang ding ka hita uh” achi uhi. Tuachi’n Ama ahing thou a, huipi leh tui kihot khu aphawhta a, tuachi’n atawp ua tualeh asipta uhi. 25Tuachi’n Aman akung uah, “Na ginna uh hei a um ahiei?” achi hi. Tuachi’n a zau ua lamdang asa mama ua, “Tam mipa koi ahiei? Aman huipi leh tui nangawn thu apie a, Athu aman mai uh” akichi uhi.

Gadara gam a dawibua nei damna

(Mat. 8.28-34; Mak. 5.1-20)

26Tualeh Galili gam gallang khat a um Gadara mite gam ahing tung uhi. 27Tualeh Ama tuol a akumkhiet tahin, hun sawtpi dawi mat koi ahiei khat in khopi apat Ama ana lamdot a, tualeh aman puon mawngmawng asil sih a, inn ah zong aum ngai sih a, han mun lah pou ah a um zel hi. 28Aman Jesu amu tahin akikou a, Amasangah apua a, aw ngaitah in, Jesu, Nang Pasian tungnung pen Tapa, “Kei bang hing law sawm na hiei? hing sugenthei lou dingin ka hing ngen ahi,” achi hi. 29Jesu’n dawibua khu tua mipa sunga kipat pawtkhe dingin thu ana peta hi. Tua mipa khu dawiin tamveipi amanta a, tualeh miten ama aveng zing ua, Khainieng leh kol abun sah ua, hinanleh aman akigahna kolte aphutan a, gamdai ah dawi delmangin a um zel hi. 30Jesu’n akungah, “Na min bang ahiei?” chi’n adong hi. Aman “Legion”#Legion-Ligion chi ding ahia, tul tampi china ahi. achi hi, asunga dawi tampi alut ziehin. 31Tualeh amaun kokhuh mongbei a pei ding a thu pelou ding in Jesu kungah angen uhi.

32Tua muna muol tungah, voh hon tampi annmai in ata uhi. Tualeh amaun vohte sunga luttheina ding phalna akungah angen uhi. Tualeh Aman aphalpiehta hi. 33Tuachi’n dawite tua mipa sunga kipat apawt ua, vohte sungah alut ua, tualeh voh hon khu dil gei ken lah ah a tai suh ua, dil ah atai lut ua, tui valin ashi siengta uhi.

34Voh khawiten sil umdan amu tah un, atai ua, tam thu khopi leh khoneute ah ava agenta uhi. 35Tuachi’n bang thu um atai? chia en dingin mipite apawtdoh ua, Jesu kung ahing tun un, dawi matpa khu puon sil a, lungsim dihtah puo a Jesu kengbul a tou amu ua, tuachi’n azauta uhi. 36Dawi matpa suhdama a umdante mit a muten ama uh ana hil uhi. 37Tuachi’n Gadara mite gam kiim a um mipite zousie in azau mama ziehun Ama khu akung ua kipat a peimang dingin angen ua, tuachi’n Ama zong kuongah atuong a, apei kiata hi. 38Asunga kipat dawite pawtdohna mipain Ama kunga umden ding angen a, hinanleh Jesu’n asawlkhie a, 39“Na inn ah peikia inlen, Pasian in nang dinga sil thupitah ahing bawl pieh dan va hil in,” achi hi. Tuachi’n ama zong apeita a, Jesu’n ama a dinga sil thupitah abawl pieh dan khopi sung pumpi ah aphuongzah ta hi.#Tana Jesu thugen pen mun dang a koima kung genlou ding a akham toh akikhie hi: Dawi pawtdohna pa khu Juda mi hilou in (Non-Jew) Jentel mi ahia asil bawl phuong zaw dinga asawl ahi.

Numei sipawt damsahna

(Mat. 9.12-22; Mak. 5.21-34)

40Jesu ahing kinuale kia in, mipi in Ama ana kipahpi ua, abawn ua Ama na ngah, zing ahi zieh un. 41Tualeh Ngai vawi, mi khat amin Jairas kichi kikhopna inn a vaihawmpa ahing pei a, Jesu kengbul ah akhupboh a, a inn a haw dingin angen vangut hi. 42Aziehpen aman tanu tangkhat kum sawm leh kum ni vel pha pan khat anei a, amanu shi dingin akisata hi. Hinanleh Jesu apei laiin mipi hon in abaw valuoi uhi. 43Tualeh numei khat kum sawm leh kum ni si pawt, anei alam zousie daktorte kungah azangbeita a, koiman asuhdam zoulou uh, 44Anua ah ahing pei a, apuon mong akhoi a, tuachi’n thakhat in asi pawt akangta hi. 45Tualeh Jesu’n “Koi ahiei ahing khoi?” achi hi. Tualeh mi zousie’n kei hilou achi chiet bep un, Peter leh akunga umten, “Siepa aw, mipi hon in ahing baw valuoi ua, ahing tuom hehu uh hilou ahiei mah, Koi ahiei kei hing khoi na chi,” achi uhi.

46Hinanleh Jesu’n “Koi ahiei khat in hing khoi hi ve aw, aziehpen silbawltheina kei a kipat in apawt chi ka thei hi,” achi hi. 47Tuachi’n numei in akiphuol thei sih chi athei in chitun pumpumin ahing pei a, amaiah akhupboh a, akhoina zieh leh thakhat a adamtah dan mi zousie masangah agendohta hi. 48Tualeh Jesu’n akungah, “Tanu lungnuom tahin um in; na ginna in ahing damsahta hi, hamuong tah in peita’n,” achi hi.

Jairas tanu kaithawna

(Mat. 9.23-26; Mak. 5.35-43)

49Aman thu agen zing lai in, kikhopna inn vaihawmpa inn akipat in mi khat ahing pei a, “Na tanu ashita hi, Siepa subuoi nawnda mai in,” achi hi. 50Hinanleh Jesu’n tam thu azah tahin adawnga, akungah, “Zau sin, gingta maiin, tuachi’n adamkia ding hi,” achi hi.

51Tualeh inn sunga lut tahin, Peter, Jakob leh Johan tualeh naupang nu leh pa chilou koima lut aphal sih hi. 52Tualeh abawn un amanu ana kaa lieiluoi ua, amau vengvung uhi; hinanleh Jesu’n “Kap sih un, ashi ahisih a, a imu ahi zaw hi,” achi hi. 53Amaun amanu ashita chi athei zieh un, zumhuoi sain anuisan uhi. 54Hinanleh Jesu’n abawn un asawldoh sienga, amanu khu akhut in atu a, “Nungah thou in” chiin ahan hi. 55Tuachi’n ahagau ahing kinuale kia a, thakhat in athou pai a, tualeh bang ahiei neh ding pe ding in thu apie hi. 56Tualeh anu leh apa’n lamdang asa mama ua, hinanleh Aman asilbawl khu koima hil lou dingin akhamta hi.

Currently Selected:

LUK 8: ZOUBSI

Highlight

Copy