LUK 7

Galkap lamkaipa suohpa suhdamna

(Mat. 8.5-13)

1Jesu’n mite zah a athugen zousie azaw nuain Kapernaum khuo ah alut a; 2Tualeh galkap zahoutu koi ahiei khat asuohpa deitah china in ashi dihdih hi. 3Tuachi’n Jesu tanchin azah tahin, asuohpa hing sudam dinga ngen dingin Juda upate akungah asawl hi. 4Tualeh amauh Jesu kung avatun un, “Tam sil ama a dinga na bawlpieh taah ahi chiin angen uhi” 5Aziehpen aman ka nam uh a it a, ka kikhopna inn u’zong ama hing lampieh ahi, achi uhi.

6Tuachi’n Jesu amautoh ahing peita hi. Tualeh inn akipat gamlalou ahing tun un galkap zahoutupa’n alawmte asawl a akungah, “Mangpa kisugim nuomda mai in, aziehpen ka innsung na lutna taah ahi sih hi. 7Tuaziehin kei zong na kunga hing haw taahin ka kisim sih hi. Hinanleh athuin gen poulachin ka suohpa adam mai ding hi. 8Aziehpen Kei zong mi thunuoi a um ka hi a, ka nuoi ah galkapte a um ua, khat kungah peiin, ka chi leh apei a, tualeh adang khat kungah, hing peiin, ka chi leh ahing pei hi; tualeh ka suohpa kungah tami bawlin, ka chi leh abawl hi, achi hi.

9Jesu’n tam thute azah in, amapa khu lamdang asa mama a, akihei kuol a, mipi ama zuite kungah “Ka hing hil ahi, Israelte lah ah zong hichi va-ia a ginna thupi ka mu kha mawngmawng sih hi,” achi hi. 10Tualeh ami sawlte inn langah anua pei kia ua, suoh damloupa khu, dam in amuta uhi.

Nain khuo a meithainu tapa kaithawna

11Tuachi’n hun sawt lou nua in, Nain kichi khuo khat ah ahaw a, tualeh anuazuite tampi leh mipi tamtah in Ama azui uhi. 12Tualeh khopi kotpi kung ahing tunin, Ngai vawi, mishi khat ahing zawngkhie ua, anu tapa neisun ahi a, amanu meithai ahi a, tua khuo a mipi tampi akungah a um uhi. 13Mangpa’n meithainu a mutahin ahepita mama a, “Kap sin” achi hi. 14Tuachi’n ava pei a, kuong kihongsa khu ava tham a, tualeh azawngte adingta uhi; tuachi’n “Aman tangval thou in, ka hing chi ahi,” achi hi. 15Tualeh mishi khu ahing toudoh a, ahing hamta hi, tuachi’n Jesu’n amapa khu anu kungah apeta hi. 16Tuachi’n mi zousie azauta ua, Pasian aphat ua, “I lah uoh guolnei thupitah ahing umta,” tualeh “Pasian in amite ahing veta hi,” achi uhi. 17Tualeh Ama tungtang thu khu Judia gamsung pumpi leh akimvel gamte ah athang suohta hi.

Baptispa Johan in a nuazuite Jesu kunga asawlna

(Mat. 11.2-6)

18Tuachi’n Johan nuazuiten tam thu zousie Johan kungah ahilta uhi. 19Tualeh Johan in anuazuite lah a mi ni ahan a, Jesu kunga “Ahing pei dingpa na hiei mah? ahisihleh midang hungai nalai ding ka hi uoi mah?” chi ding in asawlta hi. 20Mi nitegel akung ahing tun tahun, akungah “Baptispa Johan in, Ahing pei dingpa na hiei mah? ahisihleh midang hungai nalai ding ka hi uoi mah? chi a na kunga ahing sawlte ka hi uhi,” ava chi uhi.

21Tua hun lai tahin chinate hipi veite, dawi matte tampi asudam a, tualeh mitto tampite zong amit uh avah sah hi. 22#Isai. 35.5,6; Isai. 61.1Jesu’n adawnga akung uah, “Peita unlen na sil mute u’leh na zahte uh Johan vahil un; mittote mit ahing vahta a, Kengbaite kengin ahing peita ua, phate ahing siengthouta ua, bilbingten ahing za theita, mishite kaithawin a umta ua, tualeh mi gentheite kungah khantan hoi genin a umta hi. 23Tualeh koipou ka tunga lungkimlouna muloute ahampha uhi,” achi hi.

Jesu’n Johan apahtatna

(Mat. 11.7-15)

24Tualeh Johan mi sawlte apei nua un, Jesu’n mipite kungah, “Johan tungtang thu agen panta a, Bang en ding a gamdai a peidoh na hi uoi? pumpeng hui sem kinuh en dingin maw? 25Ahisihleh bang en ding pen a peidoh na hi uoi? Puonnem silmi maw? Ngai un puon thupi sil leh mi nuomsate pen leengte innpi ah a um uhi. 26Ahileh bang pen en dinga peidoh na hi uoi? guolnei maw? Ahi na kung uah ka gen ahi, Guolnei sanga thupi zaw ahi. 27#Mala. 3.1En un, ka sawltah na masang ah ka sawl a, aman na masang ah na lampi asiel ding chia atanchin kigiel khu ama ahi. 28Numei sunga pieng lah ah, Baptispa Johan sanga thupi zaw guolnei a um sih hi, hinanleh Pasian gama neupen zong ama sangin athupi zaw hi, chi ka hing hil ahi.”#Tana Jesu’n agen noppen khu Baptispa Johan pen Thuhunlui a guolneite sangin alien zaw a, Thuhuntha a Khristiante Jesu vangin Ama sangin alien zaw hi, achi nopna ahi. Achi hi.

29 # Mat. 21.32; Luk. 3.12 Tualeh athu za zousie leh siedong mite zong Johan baptisma tangin, Pasian siem atan uhi. 30Hinanleh Pharisaite leh dansiem miten akunga baptisma tanglouin, Pasian in ama ua dinga aguotsa khu anuolta uhi. 31“Tuachi’n Mangpa’n tulai khangthate bang toh ka gente ta diei? Tualeh bang chibang ahi uoi? 32Amaute khu naupang vanzuona mun a tou a, khat leh khat,

Theile hing tumpieh ung a,

na lam sih ua,

ka hing dapi u’leh lah na kap tuom sih ua,

kichituate bang ahi uhi.

33Aziehpen Baptispa Johan ahing pei a, tanghou ane sih a, uoin zong adawn sih hi, noute’n Dawi pai ahi na chi uhi. 34Mihing Tapa ahing pei a, ane in adawn a, nouten En vawi uo, ann haipa, uoin haipa, siedongmite leh mikhielte lawmpa na chi zel uhi. 35Hinanleh pilna khu atate zousie in siem atan chiet uhi, achi hi.

Numei khat in Jesu keng sathau anuna

36Tuachi’n Pharisaite lah a khat in, Ama ann neh khawmpi dingin achiel a, tuachi’n Ama Pharisaipa inn ah alut a, annkuong ah atouta hi. 37#Mat. 26.7; Mak. 14.3; Jn. 12.3Tualeh Ngai vawi, tuami khuo a um khelnanei numei khat in Jesu Pharisaipa inn ah ann ne in atou chi atheitahin alabastar bawm in thau namtui ahing tawi a, 38Anualang ah akengbul ah kap kawmin adinga akephangte ahitui in asawp pieh a, asam in asia a, akephang atawp a, thau namtui anu hi. 39Ama ann ne dinga chielpa Pharisai in tami amu tahin alungsimin “Tam mipa guolnei ahileh akhoinu koi ahiei, tualeh mi bangchibang ahiei, chi thei leh kilawm a, amanu lah mikhiel ahi ngal a,” achi hi.

Leiba ba nite gentena

40Tuachi’n Jesu’n adawnga, akungah, “Simon na kungah thu gen ding khat ka nei hi,” achi hi; tuachi’n aman “Siepa gen in” achi hi. 41“Sum leitawisah mi koi ahiei in, sum leitawi mi ni anei hi. Khatin makhai za nga aba a, tualeh khat in sawmnga aba hi. 42Tualeh asanna ding aneilou tah un, ani un angaidam tuohta hi. Tuazieh in hing hil in, tua mite gel koi zohin amapa a it zaw ding uoi?”

43Simon in adawnga, “Angaidam tam zoh pen pain hi dingin ka ngaituo hi,” achi hi. Tuachi’n Aman akungah “Na gen dih hi,” achi hi. 44Tuachi’n numei lam anga a, Simon kungah, “Tam numei na mu ei? Na inn ah ka hing lut a, ka kephang silna ding tui na hing pe sih a, hinanleh amanu’n ahituiin ka kephang asil a, asam in asia hi. 45Nang tawp zong na hing tawpsih a, hinanleh tam numeinu’n ka hing lut akipat in ka kephang tawp akhawl nai sih hi. 46Nang ka lu sathau na hing nu sih a, hinanleh tam numei in ka kephang thau namtui ahing nu hi. 47Tuaziehin ka hing hil ahi, akhelna tampite ngaidam ahita, amanu’n nahpitaha ahing it zieh in, hinanleh ngaidam tawmten a it tawm uhi,” achi hi.

48Tuachi’n Aman numeinu kungah “Na khelnate ngaidam ahita,” achi hi. 49Tualeh ama toh annkuong a impiten “Mikhielte nangawn ngaidam thei, tam koi ahiei?” akichi uhi. 50Tuachi’n Aman numeinu kungah, “Na ginnain ahing hundamta hi, hamuong tah in pei ta’n” achi hi.

Currently Selected:

LUK 7: ZOUBSI

Highlight

Copy