SIEMCHILBU 48

Jakob in Ephraim leh Manaseh a guolzawlna

1Tualeh tam silte nuain hichi ahing hi a, Joseph kungah “En in, na pa achina ahi” chi’n ahil ua, tuachiin aman a tapa tegel Manaseh leh Ephraim a zawpi a. 2Tualeh Jakob kungah “Envawi, na tapa Joseph na kungah ahing pei hi” chiin ahil ua, khumin Israel ahing hal a, lupna tungah atouta hi. 3#Siem. 28.13,14Tuachi’n Jakob in Joseph kungah, “bangkimbawlthei Pasian khu Kanaan gam a Luz khuo ah ka kungah ahing kilah a, ahing guolzawl hi.’ 4Ka kungah hahlesuon tampi ka hing neisah dinga, ka hing pungsah nalai dinga, nangma apat Nam tampi ka siemdoh ding, tualeh tam gam pen na nua a nahah nasuonte kungah a kumtawn goutan dingun ka pe ding hi ahing chi hi.’

5“Tualeh tuin na tapa nite Izipt gam a na kunga ka hing pei masanga Izipt gam a na neite Ephraim leh Manaseh kei a ahi, Reuben leh Simeon mabangin keia ahi ding uhi.’ 6Tualeh amauh nua a na hinte nanga hivanin, a goutan uah a ute uh min akikop mai ding uhi.’ 7#Siem. 35.16-19Hinanleh kei ka hileh Padan gam apat a ka hing pei laiin Rachel Kanaan gamah lampi ah Ephrath khuo tunna ding nainou khat aum laiin ka kungah ashita a, khummun Ephrath khuo lampi ah ka vuita hi.” (Tuami Bethlehem ahi) achi hi. 8Tuachi’n, Israel in, Joseph tapate a en a, “Tamte koite ahiei?” achi hi.

9Tualeh Joseph in apa kungah “Tam mun a Pasian in ahing pieh ka tapate ahi uh,” achi hi. Tualeh aman, hepitahin ka kungah “Hing puiin, amauh guolzawl vang” achi hi. 10Tuin Israel mit pen a upat tah ziehin amiel ta a, tuachi’n amuchien thei tasih hi, Tualeh amauh a kungah ahing pei ua, aman ana tawpa ana pom hi. 11Tualeh Israel in Joseph kungah, “Na mel muding kilam en nawnlou hinga, hinanleh envawi, Pasian in nahah nasuon nasan ahing musahta hi” achi hi. 12Tualeh Joseph in atapate apa pheipi kaal apat in a puikhie a, amai ah lei suin akunta hi.

13Tualeh Joseph in amautegel akai a, akhut zietlam in Ephraim khu Israel khut veilam pangah a koia, Manaseh pen akhut veilam in Israel khut zietlam pangah ahing koi nai hi. 14Tuachi’n Israel in akhut zietlam phongin a naupang zaw Ephraim lutung ah anga a, akhut veilam Manasseh lutung ah anga hi, a theisa in akhut in asawh kokal a, Manasseh lah ta upa zaw ahi ngal a. 15Tualeh aman Joseph a guolzawla, “Ka pu leh pate Abraham leh Isaak masanga aum zingna Pasian, tuni donga ka dam sung ni teng teng hing vahpa Pasian, 16Sietna teng teng laha kipata hing tanpa Vansawlsiengin naupangte guolzawl ta hen. Ka min leh ka pulepate Abraham leh Isaak min amauh min in puo u henlen, tualeh leitung ah mipi thupitah hi dingin hing khang uhen” achi hi.

17Tualeh Joseph in Ephraim lutunga apan akhut zietlam akoi amu tahin a lungkim tasih a, Ephraim lutunga pat Manasseh lutunga koi dingin apa khut adom kanga. 18Tualeh Joseph in apa kungah “Pa tambang ding ahisih, tampa hibou ta masa, nakhut zietlam a lutungah koiin,” achi hi.

19Hinanleh apa a utsih a, “Ka tapa aw ka theina hi, amazong nam khat ahing hi dinga, ahing thupi ding hi, hinanleh anaupa pen ama sangin thupi zaw vanin, ahah asuonte pen nam tampi hing hi va uh” achi hi. 20#Heb. 11.21Tuachi’n Jakob in “Israelten Ephraim leh Manasseh bangin Pasian in nang hing umsah hen,” chi’n nouma min louin ahing guolzawl zel ding uh chi’n tuani in amaute a guolzawl a. Tuachi’n Ephraim khu Manasseh masangah a umsahta hi.

21Tuachi’n Israel in Joseph kungah, “Ngaiin, shi ding ka hita a, hinanleh Pasian in nang hing umpi vanin, na pulepate gamah hing puilut kia ding hi.’ 22Tuathamlouin na unaute tanvou sangin tankhat in ka hing petuon hi, ka namsau leh ka thalpi a Amormite khuta kipat ka lah pieh pen khu” achi hi.

Currently Selected:

SIEMCHILBU 48: ZOUBSI

Highlight

Copy