SIEMCHILBU 47

Jakob leh ahahasuonte kitawisang

1Tuachi’n, Joseph Pharoah kungah “Ahing pei a, a kungah ka pate, ka sanggamte a belam honte uh, a bawng honte uh, tualeh anei alam zousie utoh Kanaan gam a kipat ahing pei ua, tualeh tu’n, Goshen gamah aumta uhi” achi hi. 2Tualeh, aman a unaute lah a mi nga azawpi a, Pharoah mai ah akilah sah hi. 3Tuachi’n Pharoah in a sanggamte kungah, “Bang nasemmi na hi uoi?” achi hi, Amaun Pharoah kungah, “Na suohte ka pu ka pa ua kipat a belam chingmi kahi uhi” achi uhi. 4Tualeh amaun Pharoah kungah, “Ka ganhonte uh neh ding aumlou ziehin na suohte na gam a umtadi dingin ka hing pei uhi. Kanaan gam kiel akhawh seng ziehin. Tuaziehin hepitahin na suohte Goshen gam ah hing teng sahin” achi uhi. 5Tuachi’n Pharoah in Joseph kungah, “Na pa leh na unaute na kungah a hing peita uhi. 6Izipt gam na masang ah aum hi, gam sung hoina mun pen Goshen gamah na pa leh na unaute tengsah inlen, tualeh alah ua mi silbawlthei tah nathei leh ka ganhonte tungah houtuin koiin” achi hi.

7Tualeh Joseph in apa Jakob a zawpi a, Pharoah masangah ading sah hi, tualeh Jakob in Pharoah a guolzawl a. 8Tualeh Pharoah in Jakob kungah “Kum bangza na hi tai?” achi hi.

9Jakob in Pharoah kungah “Ka khuol zinna hun sung kumte kum za leh sawmthum ahi ta a, ka dam sung kumte a tawma, hinanleh genthei ahuoi hi, ka pu leh pate akhuolzin lai ua a dam kum tan zong ka pha nai sih hi,” achi hi. 10Tuachi’n Jakob in Pharoah aguolzawl kia a, Pharoah masang apat a peikheta hi. 11Tuachi’n Joseph in apa leh a unaute Izipt gamah tenna a bawl pieha, Pharoah thupieh bangin gam sung hoina pen ah Rameses gam agou tan dingun apeta hi. 12Tuachi’n Joseph in apa leh a sanggamte leh apa innsung mite zousie a innkuon dungzui in neh ding apie a, avaa ta hi.

Joseph In izipt gam abawlhoi

13Tualeh gam sung zousie ah neh ding mawngmawng aumta sih hi, kiel akhawh seng ziehin, tuachi’n Izipt gam leh Kanaan gam zousie kiel ziehin agim gawpta uhi. 14Tualeh Joseph in Izipt gam sung leh Kanaan gam sung zousie bu lei na man sum zousie adon pieh sienga, Pharoah inn ah ahing tawi hi. 15Tuachi’n Izipt gam leh Kanaan gam sunga sum zousie ahing bei bepin Izipt mite zousie Joseph kungah ahing pei ua, “Ann hing piein bang dinga kiel shi ding ka hi uoi? ka sum ulah abei siengta hi achi” uhi.

16Tuachi’n Joseph in “Na gantate uh hing pemai un, sum nanei nawnsih u’leh, na gantate uh manin bu kang peding,” achi hi. 17Tuachi’n agante uh Joseph kungah ahing kai ua, Joseph in sakolte man ding, belam honte man ding ganhonte man ding, bawnghonte manding leh sabiltung man dingin neh ding ana pe zela, tuami kumin agantate uh manin amauh neh ding a pie a, avaa chiet hi.

18Tua kum ahing beita a akum kia in a kungah ahing peikia ua, “Ka sumte uh ka zah bei dan uh ka pu uh kungah imsih va ung, ka pu un ka ganhonte uh na tangta a, ka tahsa u’leh ka gam uh chilou ka pu uh mitmu in bangma aum nawn vawtsih hi.’ 19Bangzieh a kou leh ka gam uh na mitmu a shi ding ka hi uoi? kou leh ka gam uh ann manin hing lei maiin, tuachi’n kouma leh ka gam uh Pharoah suohte himai va ung; tuachia shilou a ka hin thei na ding un, tualeh gam asiet louna dingin bu chi hing pie in” achi uhi. 20Tuachi’n Joseph in Izipt gam tengteng Pharoah dingin alei pieh a, kiel anat seng ziehin michin in alou uh azuata uhi. Tuachi’n gam zousie Pharoah gam ahi siengta hi. 21Tualeh mite pen Izipt gamgi tawpna langkhat apat alaang khat dongin khopite ah abawnun akisuon ta uhi. 22Siempute gam pen aleipieh sih a, aziehpen Siemputen Pharoah in apieh tanvou anei ua, Pharoah in apieh a tanvou uh ane ua, tuaziehin ama un agam uh azua sih uhi. 23Tualeh Joseph in mite kungah, “Ngaivawi un, tunin nouma leh na gam uh Pharoah dingin ka hing leita a, envawi un, tanah bu chi nou ading aum hi, tam gam ah na tu ding uh hi, achi hi.’ 24Tualeh bu lah hun chiengin tambang ahi ding hi; Pharoah a dingin Se-nga-suo sekhat na pe ding ua, Seli teng nou a ahi ding, tuapen na lou buchi ding uh, na neh ding uh, nouma leh na innkuonpite uh neh ding, nata neute uh neh ding, ahi ding hi,” achi hi.

25Tuaziehin amaun, “Nang ka hinna uh nang humbit piehta a, ka pu uh mitmu ah hepina hing musah inlen, tuachi’n Pharoah suohte hi mai va ung” achi uhi. 26Tualeh Joseph in, Pharoah in se-nga suo sekhat atan ding chi Izipt gam pumpi ah tuni dongin danin a bawlta hi. Siempute gam pen ahileh Pharoah a hilou.

27Tuachi’n Israel khu Izipt gam a Goshen gamah atengta a, tuanah innbul tahin aumta uhi. Tualeh chi tampi suongin nasatahin a khang ua apungta uhi. 28Tualeh Jakob Izipt gamah kum sawm leh sagi a tenga, tuachi’n Jakob damsung pumpi kum za leh sawmli leh sagi ahi. 29#Siem. 49.29-32; 50.6Tualeh Israel khu ashi hun ding ahing naita a, tuachi’n atapa Joseph ahan a, a kungah, “Tuin na mitmu a hepina katan leh, hepitahin na khut ka malpi neiah gol inlen, ka tungah boh in, Hepitahin Izipt gamah hing vui mawngmawng sin. 30Hinanleh, ka pu ka pate kungah lum vangin, Izipt gam a kipat na hing paw ding ua, tualeh akivuina mun uah na hing vuizaw ding hi achi hi, khumin aman na gen bangin ka hing bawl ding” achi hi. 31Tualeh aman ka kungah “Kichiem in leh;” achi hi, tuachiin a kungah a kichiemta hi, Tuachi’n Israel khu lupna luhung ah akunsuh ta hi.

Currently Selected:

SIEMCHILBU 47: ZOUBSI

Highlight

Copy